Nisoratin’i Marka 3:1-35
3 Nilitsy tamy synagoga ao ndraiky ie, le nisy lahilahy maty tana ty tao.
2 Sabata ty andro tamy zay, ka nanenty azy soa ty olo vasa hanafaky ty aretin’ny lahilahy iny ie, amy zay hisy raha hasaran-drozy azy.
3 Le hoy ty asany tamy lahilahy maty tana iny: “Miongaha le mandehana anivo etia.”
4 Nivola tamin’olo rey ie bakeo hoe: “Aia ty tokony hatao* amy andro sabata? Manao raha soa sa manao raha raty? Manavotsy ay sa mamono olo?” Fe tsy nisy nivola rozy.
5 Lafa nanenty an-drozy Jesosy le neloky sady tena nalahelo satria tsy niferinay olo rozy,* ka hoy ty asany tamy lahilahy iny: “Amparo tananao iny.” Le naampatsiny ty tanany ka nimpoly amy pilasiny.
6 Le niboaky Fariseo rey, ka avy le nila hevitsy niaraky tamy mpanoha an’i Heroda rey satria ta hamono an’i Jesosy.
7 Fe niala teo Jesosy noho mpianatsiny rey, le nandeha tan-driaky any, le nisy olo maro* baka a Galilia noho Jodia nanaraky azy.
8 Nisy koa aza baka a Jerosalema noho Idomea, noho baka ampitan’ny Vavaranon’i Jordana, noho manodidy an’i Tyro noho Sidona. Tena nimaro ty olo niavy taminy eo lafa naharè ty raha maro nataony.
9 Le nivolaniny mpianatsiny rey hanoma laka kelikely ho azy, mba hiondranany laha manao kisitsy aminy eo vahoaky rey.
10 Nanafaky aretin’olo maro ie, ka nivorivory taminy eo iaby ze olo nana aretim-be mba hikasiky azy.
11 Ka ndre ty fanahy maloto aza niankohoky taminy eo saky nahita azy, le nikorakoraky sady nivola hoe: “Iha ro Anaki-Ndranahary!”
12 Fe nivolaniny mazava soa rozy mba tsy hanambara amin’olo ty mikasiky azy mihintsy.
13 Niakatsy tam-bohitsy eny ie, le nikaihiny ze teany hanaraky azy ka namonjy azy teny.
14 Le nifily* lahilahy 12 ie, le nikaihiny hoe apostoly koa rozy. Reo ro hiaraky aminy noho hirahiny hitory,
15 sady hameany fahefà handroaky demonia.
16 Retoa iaby lahilahy 12 nifiliny* reo: Simona, nikaihiny koa hoe Petera,
17 Jakoba anan’i Zebedio noho Jaona rahalahiny—rozy roe samby nikaihiny hoe Boanerjesy, midika hoe “Anan’ny Hotroky”—,
18 Andrea, Filipo, Bartolomeo, Matio, Tomasy, Jakoba anan’i Alfeo, Tadeo, Simona Kananeanina,*
19 noho Jodasy Iskariota, azy namadiky an’i Jesosy tafara atoy iny.
Bakeo nilitsy tamy trano raiky zay ie,
20 le mbo nivorivory taminy eo ndraiky vahoaky rey, ka ndre ty fotoa nihinanan-drozy amy mpianatsiny rey aza tsy nisy.
21 Lafa naharè ani-zay longony rey le niavy mba hanambotsy azy, satria hoy ty asan-drozy hoe: “Lasa adala ie.”
22 Nivola koa ty mpanora-dalàna nijotso baka a Jerosalema any hoe: “Belzeboba* aminy ao io, le sefon’ny demonia iny ahavitany mandroaky demonia io.”
23 Le nikaihin’i Jesosy ho aminy eo rozy, le nanao fanohara tamin-drozy ie. Hoy ty asany: “Akory ty ahafahan’i Satana mandroaky an’i Satana?
24 Laha misy fanjakà mialy an-trano, le tsy haharitsy fanjakà zay.
25 Laha misy fianakavia mialy an-trano, le hisaratsaraky fianakavia zay.
26 Manahaky ani-zay koa fa laha mialy an-trano Satana ka lasa voazarazara, le tsy haharitsy ie fa ho vita ty aminy.
27 Fa laha misy olo ta hilitsy an-tranon’ny lahilahy matanjaky raiky mba hangalatsy ty hananany, le tsy maintsy rohizany tse lahilahy iny vo ho afaky hangalatsy ty raha an-tranony ao ie.
28 Ambarako anareo mazava fa hengà iaby ze hadisoa ataon’olo, ndre ino ino fahotà ataony na fitivà* volaniny.
29 Fa ze mitiva fanahy masy, tsy hahazo fanengà hadisoa mihintsy, fa hambara mandrakizay hoe nanao raha raty.”
30 Nivola ani-zay ie satria hoasan-drozy hoe: “Misy fanahy maloto ie.”
31 Niavy ty reniny noho ty rahalahiny tamy zay, le nitsanga tamonto ao ka naniraky olo hikaiky azy.
32 Fe nisy olo maro nipetraky nanodidy azy teo, ka hoy olo rey taminy: “Amonto ao reninao noho rahalahinao rey mila anao.”
33 Fe hoy ty asany: “Ia moa ty reniko noho rahalahiko?”
34 Le nihenteany olo nipetraky nanodidy azy teo rey, ka hoy ty asany: “Reo ty reniko noho rahalahiko!
35 Fa ndre ia ia manao ty sitrapo-Ndranahary, le ie ro rahalahiko noho anabaviko noho reniko.”
Fanamariha ambany pejy
^ Na: “azo atao; mety.”
^ Abt: “tsy daitsy ty fon-drozy.”
^ Abt: “tena maro.”
^ Na: “nanendry.”
^ Na: “nitendreny.”
^ Na: “azy mafana fo iny.”
^ Anara ikaiha an’i Satana.
^ Mety ho fitivà a-Ndranahary na fitivà raha masy.
