Nisoratin’i Marka 5:1-43
5 Lafa niafaky an’ny riaky iny rozy, le niavy tamy faritsy nisy ty Gerasianina.
2 Laha vo niala baka anaty laka ao Jesosy, le nitojiky lahilahy raiky nisy fanahy maloto. Baka an-dolo eny lahilahy io.
3 Tan-dolo eny avao ty nisy azy, le mbo tsy nisy olo nahavita namehy azy ndre tamy seny aza fa nibototsy avao ie.
4 Matetiky nirohiza seny ty tombony noho ty tanany, fe nitampatampahiny noho nipotepotehiny seny rey. Tsy nisy olo nahatanjaky azy mihintsy.
5 Tsy nienieny ie fa nikoaikoaiky tan-dolo eny noho tam-bohitsy eny, ndre andro ndre haly. Le nililililiany tamy vato ty vatany.
6 Fe laha vo nahita an’i Jesosy baka a lavitsy eny ie, le nilay taminy eny ka niankohoky taminy.
7 Le nivola marè biby ie hoe: “Ino ankadalananao ahy atoy io* Jesosy Anakini-azy Ndranahary Farany Anabo iny? Mifantà amy Ndranahary iha hoe tsy hampijaly ahy.”
8 Fa nivola tamy fanahy maloto iny Jesosy tamy zay hoe: “Miboaha baka amy lahilahy io ao iha!”
9 Fe nanontany azy Jesosy hoe: “Ia ty anaranao?” Le hoy ty navalin’ny fanahy maloto iny: “Tafiky* ty anarako, satria maro zahay ato.”
10 Le nisoloho tamy Jesosy ie mba tsy horoasin’i Jesosy hiala amy faritsy iny eo fanahy maloto rey.
11 Nisy kosò maro biby nihina tam-bohitsy eny tamy zay.
12 Le nisoloho tamy Jesosy fanahy maloto rey hoe: “Mba engao zahay hilitsy amy kosò reroy ao!”
13 Le naneky Jesosy. Farany niboaky fanahy maloto rey, le nilitsy tamy kosò rey tao. Le namoko ty lay nana an-teva* any kosò rey ka nilatsaky tan-driaky any, le nimaty an-drano iaby. Nisy 2 000 teo ho eo rozy.
14 Fe nilay mpiamby kosò rey, ka nitantara an’ny raha iny tan-tanà ao noho ta ambanivohitsy any. Le niavy ty olo mba hanenty an’ny raha niseho iny.
15 Farany namonjy an’i Jesosy rozy, le nahita an’ny lahilahy nisy demonia iny, azy nisy an’ny Tafiky iny. Fa nipetraky noho nisiky soa ie sady fa nisalama say soa. Natahotsy amy zay olo rey.
16 Ze nahita an’ny raha iny koa le mbo nitantara tamin-drozy hoe ino ty raha niseho tamy lahilahy nisy demonia iny noho tamy kosò rey.
17 Farany Jesosy nangatahin-drozy mba hiala amy faritsy misy an-drozy iny.
18 Lafa niakatsy tanaty laka ao ie, le nangataky hiaraky aminy lahilahy nisy demonia iny.
19 Fe tsy nandesin’i Jesosy ie fa nivolaniny hoe: “Ndany moly aminareo any, le tantarao amy longonao reo iaby ze raha nataon’i Jehovah taminao noho ty fiferinesany anao.”*
20 Le nandeha lahilahy iny, ka nanomboky niresahiny tamy faritsin’i Dekapolisy* any ze raha nataon’i Jesosy taminy. Le nitseriky iaby ty olo.
21 Nandeha laka ndraiky Jesosy, ka lafa narìny ho avy an-tety ie, le nivorian’olo maro tamoron-driaky eny.
22 Laha vo nahita azy mpiandraikitsy synagoga mana anara Jairo zay, le namonjy azy ka nandohaliky tan-tombony eo.
23 Nampimpolimpoly nangataky tamy Jesosy ie hoe: “Fa atahora aretin’ny anakampelako* zay. Ndao lahy ho any, le ametraho tana ie mba tsy hanahy ka ho velo.”
24 Le nandeha niaraky amy lahilahy iny Jesosy. Nisy olo maro nanaraky azy sady nisisiky taminy eo.
25 Nisy ampela nandeha lio fa tanatin’ny 12 tao tamy zay.
26 Fa maro ty dokotera nitsabo azy. Tena nampijaly azy ty fitsaboa nataon-drozy sady nandany ty hananany iaby, fe tsy nihasalama ie fa vomaiky nihanarary.
27 Lafa naharè mikasiky an’i Jesosy ie, le nandeha tamin’olo maro rey teo ka namonjy an’i Jesosy baka afarany ao, le nikasiky ty sikiny,*
28 satria hoy ty asany: “Ndre sikiny* iny avao ro kasihiko, le ho afaky ty aretiko.”
29 Avy le nijano lio nandeha taminy iny, ka nitsapany* hoe niafaky arety nampijaly azy iny.
30 Avy le niarakin’i Jesosy hoe nisy hery niala taminy, ka nitolitoliky tanatin’olo maro rey tao ie sady nanontany hoe: “Ia nikasiky sikiko* teo iny?”
31 Fe hoy mpianatsiny rey taminy: “Tsy fa hitanao va olo maro misisiky aminao reo, le mbo manontany koa iha hoe: ‘Ia nikasiky ahy teo iny?’”
32 Fe mbo nitolitoliky avao ie mba hahitany hoe ia nikasiky azy io.
33 Le namonjy azy ampela iny sady natahotsy noho nangitikitiky. Nihainy koa hoe niafaky aretiny iny. Le nandohaliky tamy Jesosy eo ie ka nambarany azy iaby ty marina.
34 Le hoy ty asany tamy ampela iny: “Ty finoanao ro nahafaky an’ny aretinao iny anako. Soasoava! Enganè tsy ho tratsin’ny arety nampijaly anao iny sasy iha!”
35 Mbo tsy tampitsy iaby safàny iny, le nisy lahilahy baka an-tranon’ny mpiandraikitsy synagoga iny any niavy, le nivola hoe: “Fa maty ananao iny, ka manino laha tsy sahiraninao sasy Mpampianatsy io?”
36 Fe niren’i Jesosy resakin-drozy iny, ka hoy ty asany tamy mpiandraikitsy synagoga iny: “Ka matahotsy* fa minoa avao.”
37 Le tsy nisy nengany hanaraky azy, laha tsy Petera noho Jakoba noho Jaona rahalahin’i Jakoba.
38 Niavy tan-tranon’ny mpiandraikitsy synagoga iny any amy zay rozy. Le nihitan’i Jesosy olo tao rey nitabataba noho nitany noho nirohaky ty tany.
39 Lafa nilitsy ie le hoy ty asany tamin-drozy: “Manino nareo mitany noho mitabataba io? Tsy maty ajà io fa miroro.”
40 Le nihehezan-drozy ie. Fe nampiboahiny amonto any iaby rozy, bakeo nandesiny ty ray aman-drenin’ny ajà iny noho azy niaraky aminy rey, le nilitsy tamy pilasy nisy an’ny ajà iny ao ie.
41 Bakeo nirambesiny ty tanan’ny ajà iny ka hoy ty asany taminy: “Talita komy.” Laha adika zay le hoe: “Nao aka ajà ampela, zao ty volaniko anao: Miongaha!”
42 Avy le niongaky ajà ampela iny ka nanomboky nandeha. (Fa 12 tao ie tamy zay.) Laha vo nahita ani-zay ty ray aman-dreniny, le tena nifalifaly.
43 Fe nafepetsin’i Jesosy* rozy mba tsy hanambara an’ny raha iny amin’olo mihintsy. Le nivolaniny rozy hoe tokony hamea hany ajà ampela iny.
Fanamariha ambany pejy
^ Na: “Misy raha iharoako aminao va.”
^ Na: “Maramila toropy raiky.” Nisy maramila 4 000 zisiky 6 000 eo ho eo ty toropy raiky tamy tafikin’ny Romanina taloha tany.
^ Na: “amy kintsỳ.”
^ Abt: “namindrany fo taminao.”
^ Na: “azy Faritsy Misy Tanà Folo iny.”
^ Na: “Marary fa ho maty anakampelako.”
^ Na: “sikiny ivelany.”
^ Na: “sikiny ivelany.”
^ Abt: “nitsapany tamy vatany.”
^ Abt: “sikiko ivelany.”
^ Na: “Ka matahotsy sasy.”
^ Na: “niraran’i Jesosy imaro.”
