Nisoratin’i Marka 8:1-38
-
Nanome hany olo 4 000 Jesosy (1-9)
-
Nangataky famantara Fariseo rey (10-13)
-
Leviran’ny Fariseo noho leviran’ny Heroda (14-21)
-
Nampahitan’i Jesosy lahilahy jiky ta Betsaida ao iny (22-26)
-
Nihain’i Petera hoe Jesosy ro Kristy (27-30)
-
Fa nambaran’i Jesosy hoe hovonoa ie (31-33)
-
Ty tena mpianatsin’i Jesosy (34-38)
8 Tamy fotoa rezay, nisy vahoaky maro ndraiky teo, sady tsy nana raha hohany rozy. Farany nikaihin’i Jesosy mpianatsiny rey, le nivolaniny hoe:
2 “Ferinesako olo retoa, satria fa telo andro rozy ro nijano tamiko eto sady tsy mana raha hohany.
3 Laha rozy mosarè* reo ro alefako moly, le ho vozaky an-dala eny, sady baka lavitsy koa ty sisany amin-drozy.”
4 Le hoy mpianatsiny rey: “Ka aia amy pilasy mitoka toy ro hahità mofo hahavintsy an’ny olo reto?”
5 Le hoy Jesosy tamin-drozy: “Firy ty mofo aminareo any?” Le hoy ty asan-drozy: “Fito.”
6 Nampangalany pilasy tamy tany eo amy zay olo rey. Bakeo nalany mofo fito rey, le nisaotsy a-Ndranahary ie. Le nitampatampahiny mofo rey, ka nameany an’ny mpianatsiny rey mba hozaran-drozy. Le mpianatsy rey amy zay nizara an’ny raha rey tamy vahoaky iny.
7 Nana fia maliniky vitsivitsy koa rozy. Lafa baka nisaotsy a-Ndranahary ie, le nivolaniny mpianatsiny rey mba hizara an’ny raha rey koa.
8 Le nihina olo rey ka nivintsy. Bakeo nahoron’ny mpianatsy rey ty sisa tsy lany, ka nahafeno sobiky be fito.*
9 Lahilahy 4 000 teo ho eo ty nihina tamy zay. Nampolìny olo rey bakeon’iny.
10 Avy le niondra laka rozy amy mpianatsiny rey, ka niavy tamy faritsin’i Dalmanota any.
11 Le namonjy azy ty Fariseo ka nanomboky nialy hevitsy taminy, sady nangataky famantara baka an-danitsy any mba hitsapà azy.
12 Le nifoay marè Jesosy satria tena nalahelo, ka hoy ty asany: “Manino taranaky toy ro mila famantara? Ambarako anareo mazava fa tsy hisy famantara hamea an’ny taranaky toy.”
13 Bakeo nengany rozy, le niondra laka ndraiky ie ka nandeha ampita eny.
14 Fe nihalinon’ny mpianatsy rey ty nanday mofo, ka tsy nana ankoatsin’ny mofo raiky rozy tanaty laka ao.
15 Le nampitandreminy mazava soa rozy hoe: “Mba mimarikariha, le miambena amy leviran’ny Fariseo noho amy leviran’i Heroda.”
16 Nanomboky nialy hevitsy amy zay rozy satria tsy nanday mofo.
17 Nihitan’i Jesosy raha zay ka hoy ty asany tamin-drozy: “Manino nareo ro mialy hevitsy amy nareo tsy nanday mofo zao io? Le mbo tsy hainareo noho tsy azonareo avao va? Mbo tsy mivoha va ty fonareo* ka tsy azonareo ty dikan’ny raha zay?
18 ‘Nareo va mana maso fe tsy mahita sady mana sofy fe tsy maharè?’ Tsy tiaronareo va
19 tamy zaho nanapatampaky mofo limy ho an’ny lahilahy 5 000 iny? Nahafeno paniè firy ty ambiny nivoavorinareo?” Le hoy ty asan-drozy taminy: “Folo roe amby.”
20 Ka tamy zaho nanapatampaky mofo fito ho an’ny lahilahy 4 000 iny? Nahafeno sobiky be* firy ty ambiny nivoavorinareo?” Le hoy ty asan-drozy taminy: “Fito.”
21 Le hoy ty asany tamin-drozy: “Mbo tsy azonareo avao va ty dikan’ny raha rey?”
22 Le niavy ta Betsaida ao rozy. Bakeo nisy lahilahy jiky raiky nandesin’olo taminy eo, le nangatahin’olo rey ie mba hikasiky an’ny lahilahy jiky iny.
23 Le nitanjahiny ty tanan’ny lahilahy iny ka nandesiny ivelan’ny tanà iny any ie. Le nandoràny ty masony, bakeo nametrahany tana ie sady nanontaneany hoe: “Misy raha hitanao va?”
24 Le niandra lahilahy iny sady nivola hoe: “Mahita olo aho, fe atao raha hazo mandehandeha ty fahitako an-drozy.”
25 Bakeo nataony tamy mason’ny lahilahy iny teo ndraiky ty tanany, le nahita lahilahy iny. Lasa nahita soa ie, sady nihainy soa ty nanavaky ze raha nihenteany.
26 Bakeo nampolìn’i Jesosy ie, le nivolaniny hoe: “Ka militsy an-tanà ao tse.”
27 Le nandeha Jesosy noho mpianatsiny rey, ka nana amy tanà a Kaisaria-Filipo any rey. Lafa tan-dala eny rozy, le nanontaneany mpianatsiny rey hoe: “Ia va ty fahaizan’olo ahy?”
28 Le hoy ty asan-drozy taminy: “Misy mivola hoe Jaona Mpanao Batisa. Fe misy koa mivola hoe Elia, le misy koa mivola hoe raiky amy mpaminany rey.”
29 Bakeo nanontaneany rozy hoe: “Ka nareo, ia ty fahaizanareo ahy?” Le namaly Petera hoe: “Iha azy Kristy iny.”
30 Nafepetsiny rozy tamy zay mba tsy hivolambola amin’olo mikasiky azy.
31 Nanomboky nampianatsy an-drozy koa ie hoe tsy maintsy hampijalijalỳ ty Anak’olo, ka tsy haneky azy ty anti-panahy noho ty sefon’ny mpisoro noho ty mpanora-dalàna. Bakeo hovonoa ie, le hovelomy afaky telo andro.
32 Navantan’i Jesosy mihintsy raha zay lafa nivolaniny. Fe nandesin’i Petera nisitaky tan-tsisiny eny ie, le nivolambolaniny.
33 Bakeo nitoliky ie, le nihenteany mpianatsiny rey ka nihelofany Petera. Hoy ty asany: “Mandehana afarako any iha Satana, satria tsy hevitsi-Ndranahary ahinao zay fa hevitsin’olombelo.”
34 Nikaihiny ho aminy eo amy zay vahoaky rey noho mpianatsiny rey, ka hoy ty asany tamin-drozy: “Laha misy ta hanaraky ahy, le tsy maintsy mandà ty vatany ie ka manday ty hazo fijaleany* sady manaraky ahy avao.
35 Satria ze ta hanavotsy ty ainy ro hamoy ty ainy, fa ze mamoy ty ainy satria mpanori-dia ahy noho maneky ty vaovao soa ro hanavotsy ty ainy.
36 Ino vatany moa ty soa ho azon’olo raiky laha azony zao tontolo zao fe afoiny ty ainy?
37 Le ino vatany ty hamean’olo hatakalo ty ainy?
38 Mpandranto* noho mpanota taranaky toy! Ka ze menatsy hampiseho amin-drozy hoe mpanori-dia ahy sady menatsy manoriky ty safàko, le ho menatsy aminy koa ty Anak’olo, lafa ho avy amy voninahitsin’ny Babany ao miaraky amy ty anjely masy.”
Fanamariha ambany pejy
^ Na: “tsy mihinan-kany.”
^ Na: “sobiky fito fandaisa vatia.”
^ Abt: “Mbo bamby va ty fonareo.”
^ Na: “sobiky fandesa vatia.”
^ Na: “Mivaliky.”
