Nisoratin’i Marka 9:1-50
-
Niova tarehy Jesosy (1-13)
-
Tsy nanahy sasy ajà lahilahy nisy demonia iny (14-29)
-
Tsy misy raha tsy vitan’olo manam-pinoa (23)
-
-
Nambaran’i Jesosy ndraiky hoe hovonoa ie (30-32)
-
Nialy hevitsy mpianatsy rey hoe ia amin-drozy ty farany anabo (33-37)
-
Ze tsy manohitsy antsika le miaraky amintsika (38-41)
-
Vato maminga (42-48)
-
“Manàna sira anatinareo ao” (49, 50)
9 Nivola tamin-drozy koa ie hoe: “Ambarako anareo mazava fa misy amin’olo mitsanga eto reto tsy ho maty mihintsy, laha tsy fa hitany hoe fa manjaka ty Fanjakà-Ndranahary.”
2 Enin’andro tafarani-zay, nandesin’i Jesosy niaraky taminy Petera noho Jakoba noho Jaona, le nandeha nitoka tamy vohitsy abo zay teny rozy. Le niova tarehy talohan-drozy teo ie.
3 Le lasa namirapiratsy ty sikiny* sady tena nifoty biby. Tsy misy mpanasa lamba mahafoty siky manahaky ani-zay mihintsy an-tany etoy.
4 Niseho tamin-drozy koa Elia noho Mosesy, le niresaky tamy Jesosy teo.
5 Le hoy ty asan’i Petera tamy Jesosy: “Tena soa ty eto Raby. Mba engao zahay hananga tanty telo, ka ty raiky ho anao, ty raiky ho an’i Mosesy, le ty raiky ho an’i Elia.”
6 Laha ty marina, tsy nihitan’i Petera ty hataony satria tena natahotsy rozy.
7 Le nisy rahona nanaloky an-drozy, bakeo nisy feo nivola baka amy rahona iny ao hoe: “Anako teako io. Janjino ie.”
8 Tampotampoky teo, nitolitoliky rozy fe Jesosy raiky avao sisa nihitan-drozy teo.
9 Tamy rozy nijotso baka am-bohitsy eny iny, le nafepetsiny rozy mba tsy hitantara an’ny raha nihitan-drozy iny ndre amin’ia ndre amin’ia, laha tsy fa velo ndraiky ty Anak’olo.
10 Nirambesin-drozy am-po* raha zay. Fe nifampiresaky rozy hoe ino ty teany hovolany amy hoe ho velo ndraiky ie.
11 Le nanontanean-drozy ie hoe: “Ka manino mpanora-dalàna reo ro mivola hoe tsy maintsy ho avy tse Elia?”
12 Le hoy ty asany tamin-drozy: “Marina aloha hoe ho avy tse Elia, le hampoliny amy pilasiny ty raha iaby. Fe manino ro voasoratsy hoe tsy maintsy hijalijaly ty Anak’olo ka tsy hasian’olo dikany?
13 Fe ambarako anareo fa fa niavy Elia, kanefa nataon-drozy taminy iaby ze tean-drozy hatao taminy, araky ty voasoratsy mikasiky azy.”
14 Lafa niavy tamy mpianatsy hafa rey teo rozy, le nihitan-drozy hoe nisy vahoaky maro nivorivory tamy mpianatsy rey teo sady nisy mpanora-dalàna nialy hevitsy tamin-drozy.
15 Fe laha vo nahita azy vahoaky iaby rey, le nitseriky ka nilailay namonjy azy mba hiarahaba azy.
16 Le nanontaneany rozy hoe: “Ino raha mampialy hevitsy anareo io?”
17 Le nivola ty raiky amin’olo rey hoe: “Mpampianatsy e, nandesiko aminao atoy anakilahiko io satria misy fanahy mahamoa.
18 Saky mihetsiky raha iny le aravokiny amy tany ie, le misy raha mitaboroboro ty vavany, sady mikitiky ty hiny, bakeo vozaky biby ie. Nangatahiko handroaky an’ny fanahy iny mpianatsinao reo, fe tsy nahafaky azy.”
19 Le hoy ty asan’i Jesosy: “Vahoaky* tsy manam-pinoa nareo! Zisiky ombia aho ro tsy maintsy mbo hijano aminareo eto? Zisiky ombia aho ro tsy maintsy handefitsy aminareo? Andeso bakao ie.”
20 Le nandesin-drozy taminy eo ajà lahilahy iny. Fe laha vo nahita an’i Jesosy fanahy iny, le nataony nitipatipaky ajà iny, bakeo niravoky tamy tany, ka nivalibaliky sady nisy raha nitaboroboro ty vavany.
21 Le nanontanean’i Jesosy baban’ny ajà iny hoe: “Fa liany nombia nampanao azy ho io?” Le hoy ty asany: “Fa liany nahakely azy.
22 Matetiky ajà toy atorakiny anaty afo noho anaty rano mba hamonoany azy. Mba ferineso lahy zahay laha mba misy azonao atao, le mba ampeo!”
23 Le hoy Jesosy taminy: “Laha misy azonao atao hoasanao? Tsy misy raha tsy vitan’olo manam-pinoa anè!”
24 Avy le nivola marè baban’ny ajà iny hoe: “Manam-pinoa aho, fe ampeo mba hanam-pinoa kokoa!”
25 Lafa nihitan’i Jesosy vahoaky rey nilay namonjy an-drozy, le nitrivotiny fanahy maloto iny. Hoy ty asany: “Fanahy mahamoa noho mampareny, mandidy anao aho, miboaha baka aminy ao le ka mimpoly ao sasy!”
26 Le nataon’ny fanahy iny nikoaikoaiky noho nitipatipaky marè ajà iny, bakeo niboaky fanahy iny. Atao raha fa maty io ajà iny bakeon’iny, ka nivola ty ankamaroan’olo rey hoe: “Maty ie!”
27 Fe nirambesin’i Jesosy tamy tanany ajà iny, ka nampiongahiny le nitsanga.
28 Bakeo nilitsy tamy trano raiky zay Jesosy, le nanontany azy mitoka mpianatsiny rey hoe: “Nanino zahay ro tsy nahavita nandroaky an’ny raha iny?”
29 Le hoy ty asany tamin-drozy: “Vavaky avao ro mahavita mampiboaky an’ny karazany raiky iny.”
30 Niala teo rozy le nandalo mba Galilia any, fe tsy teany ho hain’olo raha zay,
31 satria ta hampianatsy an’ny mpianatsiny rey ie. Nivola tamin-drozy ie hoe: “Fa hisy hamadiky ty Anak’olo, le ho azon-tanan’ny fahavalo. Hovonoan-drozy ie. Fe ndre maty ie, le hovelomy afaky telo andro.”
32 Fe tsy niazon-drozy raha nivolaniny iny sady natahotsy hanontany koa rozy.
33 Le niavy ta Kapernaomy ao rozy. Lafa tan-trano ao amy zay ie, le nanontany an’ny mpianatsiny rey hoe: “Ino raha nialianareo hevitsy tan-dala teny iny?”
34 Fe tsy nivola rozy, satria tamy rozy tan-dala teny iny, nialy hevitsy rozy hoe ia amin-drozy ty farany anabo.
35 Farany nipetraky ie, le nikaihiny Apostoly 12 rey ka nivolaniny hoe: “Laha misy ta ho voalohany, le tsy maintsy ho farany amin’olo iaby ie sady hanompo ty olo iaby.”
36 Bakeo nangalaky ajà raiky ie, le nampitsanganiny tanivon-drozy eo. Nirakofany ajà iny le hoy ty asany tamin-drozy:
37 “Ze mandramby ajà manahaky ani-toy amy anarako, le mandramby ahy. Le ze mandramby ahy, tsy hoe zaho avao ro rambesiny, fa Azy naniraky ahy iny koa.”
38 Hoy Jaona taminy: “Mpampianatsy e, nisy olo nihitanay nandroaky demonia tamy anaranao. Le nisakananay ie, satria tsy namantsika.”
39 Fe hoy Jesosy: “Ka sakantsakana ie, satria tsy hisy olo hanao fahagagà amy anarako ka avy le hahavita handratiraty ahy bakeon’iny.
40 Fa ze tsy manohitsy antsika, le miaraky amintsika.
41 Ka ze manome rano boly raiky hinominareo satria hoe ahin’i Kristy nareo, le ambarako anareo mazava fa tena hahazo fitahia ie.
42 Fe ze mametraky vato hamingana ty raiky amy maliniky manam-pinoa reo, le soa laha asia vato be fikoseha vary* ty vozony le atoraky an-driaky any ie.
43 “Laha mahavy anao hanota ty tananao, le tampaho. Fa aleo iha tapa-tana fe mahazo fiaina, tozay mana tana roe fe ho amy Gehena* amy afo tsy mety maty any.
44 ——
45 Laha mahavy anao hanota koa ty tombonao, le tampaho. Fa aleo iha tapa-tomboky fe mahazo fiaina, tozay mana tomboky roe fe hatoraky amy Gehena* any.
46 ——
47 Laha mahavy anao hanota koa ty masonao, le ario lavitsy anao. Fa aleo iha tsy misy maso raiky fe militsy amy Fanjakà-Ndranahary ao, tozay mana maso roe kanefa hatoraky amy Gehena* any,
48 satria ty any tsy maty ty holitsy amy faty, sady tsy mety maty ty afo.
49 “Fa tsy maintsy raraha afo ze olo manahaky ani-reo, le atao manahaky hany raraha sira rey.
50 Soa ty sira, fe laha lasa boka ty sira, akory ty hampimpolianareo ty tsirony? Manàna sira anatinareo ao nareo, le milongoa soa avao.”
Fanamariha ambany pejy
^ Abt: “sikiny ivelany.”
^ Na mety hoe “Tsy niresahin-drozy tamin’olo mihintsy.”
^ Abt: “Taranaky.”
^ Na: “vato fikoseha vary aodikin’ampondra.”
