Nisoratin’i Matio 11:1-30
11 Lafa baka nanome toromariky an’ny mpianatsiny 12 rey Jesosy, le nandeha nampianatsy noho nitory mbamy tanà manodidy mbeny.
2 Fe naharè mikasiky ty asa nataon’i Kristy, Jaona, tamy ie tamy prizon tao, le naniraky an’ny mpianatsiny rey
3 mba hanontany an’i Jesosy hoe: “Iha va Azy ho avy iny, sa olo hafa ro tokony holinisanay?”
4 Le hoy Jesosy: “Ndany tantarao amy Jaona ty raha renareo noho hitanareo hoe:
5 Lasa mahita ty jiky, mandeha ty kombo, malio ty boka, maharè ty mareny, velomy ty maty, le itoria ty vaovao soa ty mahantra.
6 Sambatsy ze matoky ahy ka tsy misalasala mihintsy.”
7 Lafa nandeha mpianatsin’i Jaona rey, le niresaky mikasiky an’i Jaona tamy vahoaky rey Jesosy. Hoy ty asany: “Hanenty ino niboahanareo tamy dezera* any io? Hanenty bararata ahetsiketsikin’ny tsioky va?
8 Sa hanenty ino niboahanareo tany io? Hanenty olo manisy akanjo soasoa* va? An-tranon’ny mpanjaka any ro misy manisy akanjo ho zay.
9 Ino marina zany tena niboahanareo io? Hanenty mpaminany va? Ambarako anareo fa mbo anabo mandilatsy ty mpaminany ie.
10 Ho zao ty voasoratsy mikasiky azy: ‘Halefako alohanao eo* olo irahiko iny, le ie ro hanoma ty lala hombanao.’
11 Ambarako anareo mazava fa mbo tsy nisy olo naterakin’ampela ka hoe anabo mandilatsy an’i Jaona Mpanao Batisa. Fe mbo anabo mandilatsy azy ze farany kelikely amy Fanjakàn’ny lanitsy ao.
12 Liany tamy andron’i Jaona Mpanao Batisa zisiky henanizao, le manao kisitsy hilitsy amy Fanjakàn’ny lanitsy ty olo, ka ze tena misisiky ro tafilitsy.
13 Fa ndre ty Mpaminany ndre ty Lalàna, le samby naminany iaby zisiky niavian’i Jaona.
14 Ka ndre maneky nareo ndre tsy maneky, le ie azy ‘Elia ho avy iny.’
15 Ze mana sofy, le mijanjina soa.
16 “Hampitoviko amin’ino taranaky toy? Manahaky ajà mipetraky am-bazary eny rozy, le miresaky amy mpiaraky mihisa amin-drozy hoe:
17 ‘Fa nitsoky sody zahay, fe tsy nitsinjaky nareo. Fa nanao hira mampalahelo zahay, fe tsy nalahelo* nareo.’
18 Ho zay koa fa lafa niavy Jaona, le sady tsy nihina ie noho tsy nino divay, fe hoy ty olo hoe: ‘Misy demonia ie.’
19 Lafa niavy koa ty Anak’olo, le nihina noho nino, fe hoy ty olo hoe: ‘Henteo lahilahy tia! Tea hany noho mpiboboky divay, sady naman’ny mpitaky hetra noho ty mpanota.’ Fe ze raha ataon’olo ro ahità hoe hendry ie sa tsy hendry.”*
20 Le nameany tsiny ty olo tamy tanà nanaovany ty ankamaroan’ny fahagagàny rey, satria tsy nibebaky rozy.
21 Hoy ty asany: “Ho azon-draha iha Korazina! Ho azon-draha iha Betsaida! Satria laha ta Tyro noho ta Sidona tany ro nanaova an’ny fahagagà natao taminareo tao rey, le fa ela rozy ro nibebaky ka nisiky akanjo gony noho nipetraky tamy lavenoky.
22 Fe ambarako anareo fa mbo ho moramora ty raha hahazo an’i Tyro noho Sidona amy Andro Fitsarà, tany ty raha hahazo anareo.
23 Iha koa Kapernaomy, iha va le hasondrotsy zisiky amy lanitsy eny? Hijotso amy Lolo* any aza iha ka! Satria laha ta Sodoma tany ro nanaova an’ny fahagagà natao taminao tao rey, le mbo ho teo avao Sodoma zisiky henanizao.
24 Fe ambarako anao fa mbo ho moramora ty raha hahazo an’i Sodoma amy Andro Fitsarà, tany ty raha hahazo anao.”
25 Tamy fotoa zay, le nivola Jesosy hoe: “Baba, Tompon’ny lanitsy noho ty tany iha. Ataoko hitan’olo iaby reto hoe midera anao aho, satria fa navoninao raha rey soa tsy ho hain’olo hendry noho mahay raha, kanefa nambaranao tamy ty ajà kelikely.*
26 Zay mihintsy moa ty sitraponao Baba.”
27 Nivola koa Jesosy hoe: “Fa namean’ny Babako ahy iaby ty raha iaby. Tsy misy tena mahay soa ahy* laha tsy Babako, sady tsy misy tena mahay soa an’ny Babako laha tsy zaho noho ze olo teako hanambarà ty mikasiky azy.
28 Miavia bakao iaby nareo ze miasa mafy noho manday enta mavesatsy, fa hamelombelo anareo aho.
29 Andeso ty baoko* le engao aho hampianatsy anareo, satria soa fanahy noho miambany* aho, ka ho velombelo nareo.
30 Mora andesy ty baoko, sady maiva ty entako.”
Fanamariha ambany pejy
^ Na: “tan-diomonto.”
^ Na: “akanjo malemilemy.”
^ Abt: “alohan’ny tarehinao eo.”
^ Abt: “nanao vangotratra satria malahelo.”
^ Na: “Fe ty fahendrean’olo le hita amy vokatsin’ny raha ataony.”
^ Zany hoe ze miambany manahaky ajà kelikely.
^ Abt: “ty Anaky.”
^ Na: “jokoko.”
^ Abt: “miambany amy fo.”
