Nisoratin’i Matio 12:1-50
-
“Tompon’ny Sabata” Jesosy (1-8)
-
Nimpoly amy pilasiny tanan’ny lahilahy maty tana iny (9-14)
-
Mpanompo tea-Ndranahary (15-21)
-
Fanahy masy ro nandroaha demonia (22-30)
-
Fahotà tsy ahazoa fanengà hadisoa (31, 32)
-
Ty voany ro ahaiza ty hazo (33-37)
-
Famantara mikasiky an’i Jona (38-42)
-
Lafa mimpoly ndraiky ty fanahy maloto (43-45)
-
Ty renin’i Jesosy noho ty rahalahiny (46-50)
12 Ndraiky andro, nandalo tan-tanimbary eny Jesosy noho mpianatsiny rey. Sabata ty andro tamy zay. Nimosarè mpianatsiny rey ka nangalaky vary tan-tanimbary teny, le nihina.
2 Lafa nahita ani-zay ty Fariseo le nivola hoe: “Henteo, manao raha tsy azo atao amy Sabata mpianatsinao reo!”
3 Le hoy ty asany tamin-drozy: “Mbo tsy nivakinareo va ty raha nataon’i Davida, lafa nimosarè rozy amy lahilahy niaraky aminy rey?
4 Nilitsy tan-trano-Ndranahary ao ie, le nihanin-drozy ty mofo aseho,* kanefa tsy nisy nahazo nihina an’ny raha iny ndre ie, ndre lahilahy niaraky aminy rey, laha tsy ty mpisoro avao.
5 Mbo tsy nivakinareo tamy Lalàna ao koa va fa miasa amy andro sabata ty mpisoro amy tempoly ao, fe tsy diso rozy?
6 Fe ambarako anareo fa misy anabo mandilatsy ty tempoly eto.
7 Ka laha mba niazonareo ty dikan’ny hoe: ‘Aleoko olo miferinay olo tozay olo manao soro’, le tsy ho nitsarànareo ty olo tsy diso,
8 satria Tompon’ny Sabata ty Anak’olo.”
9 Lafa niala teo ie, le nilitsy tamy synagoga ao,
10 le ingy nisy lahilahy maty tana tao. Le nisy olo ta hamandriky an’i Jesosy ka nanontany azy hoe: “Azo atao va ty mitaha* amy andro sabata?”
11 Le hoy ty asany tamin-drozy: “Laha mana aondry raiky nareo, fe latsaky anaty lavaky amy andro sabata aondry iny, le tsy handeha hampiboaky azy bakao va nareo?
12 Fe mbo sarotsy lavitsy mandilatsy ty aondry ty olombelo! Azo atao zany ty manao raha soa amy Sabata.”
13 Le hoy ty asany tamy lahilahy iny: “Amparo tananao iny.” Le naampatsiny ty tanany ka nimpoly amy pilasiny, sady lasa nanahaky tanany raiky iny koa.
14 Fe niboaky Fariseo rey, le nila hevitsy hamonoa azy.
15 Lafa nihain’i Jesosy raha zay, le niala teo ie. Nimaro koa ty olo nanaraky azy, le nafahiny iaby ty aretin-drozy.
16 Fe nafepetsiny rozy mba tsy hiresaky amin’olo mikasiky azy,
17 mba hahatanteraky an’ny raha nampivolany an’i Isaia mpaminany iny hoe:
18 “Ingo ty mpanompoko nifiliko, teako sady mahafalifaly ahy! Hameako ty fanahiko ie, le hohazavaniny soa amy firenena reo ty atao hoe rariny.
19 Tsy hifamaly amin’olo ie, na hikorakoraky, le tsy ho ren’olo an-dala be eny ty feony.
20 Tsy hataony torotoro ty bararata folaky, le tsy hovonoany ty lamesin-jiro fa ho maty, zisiky hiavian’ny fotoa hampanjakàny ty rariny.
21 Ie* vatany ro hotamanin’ny firenena iaby.”
22 Bakeo nisy lahilahy nisy demonia nandesin’olo taminy teo. Jiky lahilahy io sady moa, fe niroasiny demonia iny, ka afaky nivola noho nahita lahilahy iny.
23 Nitseriky iaby olo rey ka nivola hoe: “Hay ndre io Anan’i Davida zao?”
24 Lafa naharè ani-zay Fariseo rey le nivola hoe: “Belzeboba* sefon’ny demonia iny avao ahavitany mandroaky demonia io.”
25 Nihain’i Jesosy ty eritseritsin-drozy, ka hoy ty asany tamin-drozy: “Ho rava ze fanjakà mialy an-trano, le tsy haharitsy ze tanà na fianakavia mialy an-trano.
26 Manahaky ani-zay koa fa laha Satana ro mandroaky an’i Satana, le mialy an-trano ie. Ka laha zay ie, akory ty hampaharitsy ty fanjakàny?
27 Ankoatsini-zay, laha hery baka amy Belzeboba ro androahako demonia, hery baka amin’ia zany ro androahan’ny ananareo reo an-drozy? Laha zay zany ie, le ananareo reo ro hitsara anareo.
28 Fe laha ty fanahi-Ndranahary ro androahako demonia, le midika zay hoe fa niavy ty Fanjakà-Ndranahary fe tsy niambinareo.*
29 Akory koa ty hiliran’olo amy tranon’ny lahilahy matanjaky raiky ka hangalany ty hananany? Tsy maintsy rohizany tse lahilahy iny vo ho afaky hangalatsy ty raha an-tranony ao ie.
30 Ze tsy manoha ahy le manohitsy ahy, le ze tsy miaraky mamory amiko le manaparitaky.
31 “Zay ty antony mahavy ahy mivola aminareo hoe: Ze kila fahotà noho fitivà raha masy, le mbo hahazoa fanengà hadisoa, fa ty fitivà fanahy masy, tsy hahazoa fanengà hadisoa.
32 Ze mampiboaky safà manohitsy ty Anak’olo, ohatsy, le mbo hahazo fanengà hadisoa. Fa ze mampiboaky safà manohitsy ty fanahy masy, le tsy hahazo fanengà hadisoa mihintsy, ndre amy tontolo henany toy* ndre amy tontolo ho avy iny.
33 “Laha soa ty hazo nambolenareo le ho soa koa ty voany, fa laha raty hazo iny le ho raty koa ty voany, satria ty voany ro ahaiza an’ny hazo iny.
34 Taranakin’ny bibilava misy poizy nareo! Ka akory ty ahaizanareo mivola raha soa kanefa nareo raty fanahy? Ze mameno ty fon’olo anè ro volanin’ny vavany.
35 Ty olo soa le mampiboaky ani-ze raha soa nihajarìny tam-pony ao. Fa ty raty fanahy mampiboaky ani-ze raha raty nihajarìny tam-pony ao.
36 Ambarako anareo fa hatao ankety amy ze safà tsy misy dikany volaniny ty olo amy Andro Fitsarà.
37 Satria arakaraky ze safànao ro hivolana hoe olo marina iha sa olo raty.”
38 Le hoy ty mpanora-dalàna noho ty Fariseo sisany hoe: “Mpampianatsy e, ta hahita famantara baka aminao zahay.”
39 Le namaly ie hoe: “Mila famantara avao ty taranaky raty fanahy noho mpandranto,* fe tsy misy famantara hamea an-drozy laha tsy famantara mikasiky an’i Jona mpaminany iny avao.
40 Satria nijano telo andro noho telo haly tan-kibon’ny* fia be iny tao Jona, le manahaky ani-zay koa fa ho an-dolo* any telo andro noho telo haly ty Anak’olo.
41 Hiaraky hovelomy amy taranaky toy ty vahoakin’i Ninive amy Andro Fitsarà, ka hatoron-drozy hoe raty taranaky toy satria nibebaky rozy lafa nitory tamin-drozy Jona. Fe mbo misy anabo mandilatsy an’i Jona eto.
42 Hiaraky hovelomy amy taranaky toy ty mpanjakavavin’ny antimo amy Andro Fitsarà, ka hatorony hoe raty taranaky toy, satria baka amy faran’ny tany any ie ro niavy mba hijanjy ty fahendrean’i Solomona. Fe mbo misy anabo mandilatsy an’i Solomona eto.
43 “Lafa miboaky baka amin’olo raiky ty fanahy maloto, le mandalo mbamy tany maiky mbeny lafa mila pilasy hitofà, fe tsy mahita.
44 Bakeo hoy ty asany: ‘Himpoly amy trano nialako iny any aho.’ Lafa avy ie, le hitany hoe tsy misy mipetraky trano iny, fe fa voafafa malio sady misy pozipoziny.
45 Bakeo mandeha ie, le manday fanahy fito hafa raty mandilatsy azy lafa mimpoly. Bakeo militsy ao rozy le mijano ao. Le ho raty mandilatsy ani-tamy voalohany iny ty hiafaran’olo iny. Hanahaky ani-zay koa ty hiafaran’ny taranaky raty fanahy toy.”
46 Amy ie mbo miresaky amy vahoaky eo iny, niavy reniny noho rahalahiny rey. Nitsanga tamonto ao rozy fa ta hiresaky aminy.
47 Farany nisy olo nivola taminy hoe: “Mitsanga amonto ao reninao noho rahalahinao rey fa ta hiresaky aminao!”
48 Le nivola tamin’olo iny ie hoe: “Ia moa ty reniko, le ia ty rahalahiko?”
49 Le nitondroany mpianatsiny rey sady nivola ie hoe: “Reo ty reniko noho rahalahiko!
50 Ndre ia ia manao ty sitrapon’ny Babako an-danitsy any iny, le ie ro rahalahiko noho anabaviko noho reniko.”
Fanamariha ambany pejy
^ Na: “mofo atolotsy.”
^ Na: “manafaky aretin’olo.”
^ Abt: “Ty anarany.”
^ Anara ikaiha an’i Satana.
^ Abt: “fa nitratsin’ny Fanjakà-Ndranahary nareo.”
^ Na: “ndre amy fotoa henanizao.” Henteo F.S.B. “Zao tontolo zao.”
^ Na: “mivaliky.”
^ Na: “tan-tron’ny.”
^ Abt: “am-pon’ny tany.”
