Nisoratin’i Matio 13:1-58
-
FANOHARA MIKASIKY FANJAKÀ INY (1-52)
-
Mpamboly iny (1-9)
-
Ty antony nanaovan’i Jesosy fanohara (10-17)
-
Ty dikan’ny fanohara mikasiky an’ny mpamboly iny (18-23)
-
Vary noho akata raty (24-30)
-
Voan-tsinapy noho levira (31-33)
-
Nitanteraky ty faminania lafa nampiasa fanohara Jesosy (34, 35)
-
Ty dikan’ny fanohara mikasiky vary noho akata raty iny (36-43)
-
Hanana navony noho perla farani-ze soa (44-46)
-
Harato (47-50)
-
Raha vaovao noho raha fa ela baka amy trano fanajaria raha ao (51, 52)
-
-
Tsy nino an’i Jesosy ty olo tamy tanà nahabe azy ao (53-58)
13 Niala tan-trano tao Jesosy tamy andro io, le nipetraky tamoron-driaky eny.
2 Le nisy vahoaky maro nivorivory taminy teo, farany ie niakatsy anaty laka le nipetraky, fa vahoaky rey nitsanga tamy sisin’ny riaky iny eny.
3 Bakeo nampianariny raha maro rozy ka nampiasa fanohara ie. Hoy ty asany: “Nisy mpamboly niboaky mba hamboly vary.*
4 Lafa namafy ie le nilatsaky tan-dala eny ty voa sisany, ka niavy ty voro nihina an’ny raha rey.
5 Fa ty ilany nilatsaky tamy vatovato tsy de nisy tany, ka avy le nitiry satria tsy laliky tany iny.
6 Fe lafa niboaky ty masoandro, le nimain’ny masoandro raha rey le nalazo satria tsy nisy vahany.
7 Ty sisany nilatsaky tamy fatiky ka nivoatindry tao lafa nitiry fatiky rey.
8 Fa ty sisany nilatsaky tamy tany soa le nanomboky nitiry, ka nisy ty nahazoa vokatsy injatoni-azy nambolè iny, ty sisany inenimpolony, ty sisany intelopolony.
9 Ze mana sofy, le mijanjina soa.”
10 Le namonjy azy ty mpianatsiny ka nivola taminy hoe: “Manino va iha ro manao fanohara lafa mampianatsy an-drozy?”
11 Le namaly ie hoe: “Nareo ro nengà hahay ty dikan’ny sekirè masy mikasiky ty Fanjakàn’ny lanitsy, fa rozy tsy nengà hahay ani-zay.
12 Fa ze mana le mbo hamea maro ka hana maro biby. Fa ze tsy mana, ndre ty raha ananany aza halà aminy.
13 Zay mahavy ahy mampiasa fanohara lafa mampianatsy an-drozy io, satria manenty rozy fe tsy mahita, maharè fe tsy mba mijanjy, sady tsy hain-drozy ty dikan’ny raha rey.
14 Le tanteraky amin-drozy faminanian’i Isaia iny hoe: ‘Haharè vatany nareo fe tsy ho ho azonareo mihintsy ty dikan’ny raha renareo, le hanenty nareo fe tsy hahita mihintsy.
15 Satria lasa mihily ty fon’ny vahoaky toy. Fa naharè ty sofin-drozy fe tsy taitsy rozy, sady fa napìn-drozy ty mason-drozy, amy zay tsy hahita mihintsy ty mason-drozy, le tsy haharè mihintsy ty sofin-drozy. Amy zay koa ty fon-drozy tsy hahay ty dikan’ny raha zay, le tsy himpoly amiko rozy ka tsy hafahiko ty aretin-drozy.’
16 “Fe sambatsy nareo satria mahita ty masonareo sady maharè ty sofinareo.
17 Ambarako anareo mazava fa maro ty mpaminany noho ty olo marina ta hahita ty raha hitanareo fe tsy nahita, sady ta haharè ty raha renareo fe tsy naharè.
18 “Janjino amy zay moa fanohara mikasiky an’ny mpamboly iny:
19 Lafa misy olo maharè ty hafatsy* mikasiky an’ny Fanjakà iny fe tsy mahazo ty dikany, le avy azy raty iny mangalaky an’ny raha nambolè tam-pony ao iny. Io azy nilatsaky tan-dala eny iny.
20 Fa azy nilatsaky tamy vatovato teny iny, le ze maharè ty safà mikasiky Fanjakà iny, ka avy le maneky sady falifaly.
21 Fe tsy mamahatsy am-pony ao ty safà-Ndranahary fa mitiry tsiela avao, ka lafa tratsin’ny raha sarotsy na fanenjeha ie satria naneky an’ny safà iny, le avy le mihemotsy.
22 Le azy nilatsaky tamy fatiky teny iny, le ze maharè ty safà-Ndranahary fe mamono azy ty fiasan-doha amy fiaina amy zao tontolo zao* noho ty famitahan’ny hanana, ka lasa tsy mamokatsy ie.
23 Azy nilatsaky tamy tany soa iny, le ze maharè ty safà-Ndranahary ka mahazo ty dikany sady tena mahavokatsy, le nisy ty nahazoa vokatsy injatoni-azy nambolè iny, ty sisany inenimpolony, ty sisany intelopolony.”
24 Nanao fanohara hafa koa ie hoe: “Ty Fanjakàn’ny lanitsy le azo ampitovizy amy lahilahy raiky namboly vary* tan-tanimbariny eny.
25 Lafa niroro ty olo, le niavy ty fahavalony namafy akata raty* tamy vary teo, le nandeha.
26 Lafa nitiry vary rey ka niteraky, le niboaky koa akata raty rey.
27 Farany niavy ty mpiasan’ny lahilahy iny le nivola hoe: ‘Tsy vary moa nafafinao tamy tanimbarinao teny iny nahoda? Ka nanino lasa misy akata raty io?’
28 Le hoy ty asany: ‘Fahavalo ro nanao ani-zay.’ Le nivola rozy hoe: ‘Teanao va zany laha ombotanay raha reo?’
29 Fe nivola ie hoe: ‘Aha, tsy no hombotanareo miaraky amy akata raty rey koa vary rey.
30 Engao hiaraky hitiry eo rozy, zisiky hiavian’ny fotoa fanapaha vary. Amy fotoa zay aho vo hivola amy mpanapa-bary rey hoe: Avorio tse ty akata raty le aharò raiky, le fehezo, soa horoa. Bakeo avorio ty vary, le anovo amy trano fanajariako vokatsy ao.’”
31 Nanao fanohara hafa koa ie hoe: “Ty Fanjakàn’ny lanitsy le manahaky voan-tsinapy* nalàn’olo, ka namboleny tam-baibòny eny.
32 Io ty farani-ze kelikely amy voan-draha iaby. Fe lafa mitiry ie, le ie ro traka* farani-ze bevata ka lasa hazo. Avy amy zay ty voro mamboatsy trano amy sampany eny.”
33 Nanao fanohara hafa koa ie hoe: “Ty Fanjakàn’ny lanitsy le manahaky levira nalàn’ampela raiky ka naharony tamy lafariny intelon’ny meza bevata, zisiky nitomboan’ny koba iaby iny.”
34 Nanao fanohara avao Jesosy lafa niresaky an’ny raha iaby reo tamy vahoaky rey. Le tena tsy niresaky tamin-drozy ie laha tsy tamy fanohara,
35 mba ho tanteraky ty raha nampivolany ty mpaminany hoe: “Hanao fanohara aho, le hanambara raha navony liany tam-boalohany any.”*
36 Bakeo nampolìny vahoaky rey, le nilitsy an-trano ie. Namonjy azy ty mpianatsiny le nivola hoe: “Mba hazavao aminay ty dikan’ny fanohara mikasiky akata raty tamy tanimbary iny.”
37 Le namaly ie hoe: “Mpamboly vary iny manondro ty Anak’olo,
38 tanimbary iny manondro ani-zao tontolo zao, vary iny manondro ty anan’ny Fanjakà iny. Fa akata raty rey, manondro ty anani-azy raty iny.
39 Le fahavalo namafy akata raty iny, manondro ty Devoly. Fotoa fanapaha vary iny, manondro ty fotoa alohan’ny farani-zao tontolo zao.* Le mpanapa-bary rey, manondro ty anjely.
40 Manahaky akata raty avory noho oroa rey zany, le hanahaky ani-zay koa ty hatao lafa marìny ty farani-zao tontolo zao.*
41 Haniraky ty anjeliny ty Anak’olo, le havorin-drozy ze raha iaby mahavy ty olo hanota noho ze olo zatsy mandika lalàna, bakeo haboakin-drozy baka amy Fanjakàny ao iaby,
42 le hatorakin-drozy anaty laforo mirehitsy. Any rozy ro hitàny noho hangìtsy.*
43 Amy fotoa zay, le hamirapiratsy manahaky masoandro ty olo marina, amy Fanjakàn’ny Baban-drozy ao. Ze mana sofy, le mijanjina soa.
44 “Ty Fanjakàn’ny lanitsy le mitovy amy hanàna navony tam-baibò any, fe nihitan’olo le navonin’olo iny koa. Nifalifaly biby ie ka nandeha namarotsy ani-ze raha iaby nananany, le nivilìny baibò iny.
45 “Ty Fanjakàn’ny lanitsy koa le manahaky mpitety tsena mila perla farani-ze soa.
46 Lafa nahita perla raiky lafovily ie, le avy le nandeha namarotsy ty raha iaby nananany, le nivily an’ny perla iny.
47 “Ty Fanjakàn’ny lanitsy koa le mitovy amy harato nalatsaky tan-driaky any ka nahazo fia sankarazany.
48 Lafa nifeno harato iny, le nitarihin’ny mpihaza rey tan-tsisiny eny. Le nipetraky rozy, ka ze fia soa navorin-drozy amy mpisy azy, fa ze raty narian-drozy.
49 Ho zay koa ty hiseho lafa marìny ty farani-zao tontolo zao.* Hiboaky ty anjely le hanavaky ty raty fanahy amy ty olo marina,
50 le hanoraky an-drozy anaty laforo mirehitsy. Any rozy ro hitàny noho hangìtsy.*
51 “Azonareo va ty dikan’ny raha iaby zay?” Le namaly rozy hoe: “Eka.”
52 Le hoy ty asany: “Laha zay ie: Ty mpampianatsy* iaby nampianary mikasiky Fanjakàn’ny lanitsy, le mitovy amy tompon-trano mampiboaky raha vaovao noho raha fa ela baka amy trano fanajariany raha.”
53 Niala teo Jesosy lafa baka nanao an’ny fanohara reo.
54 Lafa niavy tamy tanà nahabe azy any ie, le nampianatsy ty olo tamy synagoga tao. Nitseriky olo rey ka nivola hoe: “Baka aia nahazoan’ny lahilahy tỳ fahendrea zao io? Sady akory ty ahaizany manao fahagagà manahaky ani-rey?
55 Tsy anan’ny mpandrafitsy iny va io? Tsy Maria va ty anaran’ny reniny, le ty rahalahiny Jakoba, Josefa, Simona, noho Jodasy?
56 Sady ty anabaviny va tsy amintsika etoa iaby? Ka baka aia ty nahaizany an’ny raha iaby rezao?”
57 Farany tsy nety nino azy* rozy. Fe hoy Jesosy tamin-drozy: “Amy tanà nahabe azy noho an-tranony ao avao ty mpaminany ro tsy hajàn’olo.”
58 Le tsy nanao fahagagà maro teo ie, satria tsy nino azy rozy.
Fanamariha ambany pejy
^ Na: “varimbazaha.”
^ Abt: “safà.”
^ Abt: “voa soa.” Varimbazaha resahy eto io.
^ Grika: zizaniôn. Karazan’akata ta Israely tany, le misy poizy ty voany.
^ Grika: sinapi. Raha mitiry sinapy io, le kaihy koa hoe motarda.
^ Na: “legimy.”
^ Na mety hoe “liany nanorena ani-zao tontolo zao.”
^ Henteo F.S.B. “Fotoa alohan’ny farani-zao tontolo zao.”
^ Zany hoe hangìtsy satria ho meloky noho kivy tanteraky.
^ Henteo F.S.B. “Fotoa alohan’ny farani-zao tontolo zao.”
^ Zany hoe hangìtsy satria ho meloky noho kivy tanteraky.
^ Na: “mpampianatsy an-kavoria.”
^ Na: “nitafitohina taminy.”
