Nisoratin’i Matio 15:1-39
15 Bakeo nisy Fariseo noho mpanora-dalàna baka a Jerosalema any namonjy an’i Jesosy, ka nivola hoe:
2 “Manino va mpianatsinao reo tsy manaraky lilin-draza io? Tsy manasa tana,* ohatsy, rozy lafa hihina.”
3 Le namaly Jesosy hoe: “Ka manino nareo ro tsy manoriky ty didi-Ndranahary fa manoriky ty lilin-drazanareo?
4 Nivola, ohatsy, Ndranahary hoe: ‘Hajao ty babanao noho ty reninao.’ Nivola koa ie hoe: ‘Tokony hovonoa ze manozo* ty babany noho ty reniny.’
5 Fe hafa ty raha ampianarinareo. Lafa misy olo mivola amy ty babany na amy ty reniny hoe: ‘Ze raha iaby ananako ka azoko anampea anao, le fa fanomeza voatoka ho ahi-Ndranahary’,
6 le mivola nareo hoe: ‘Tsy voatery hanaja ty ray aman-dreniny ie.’ Tsy dareanareo zany ty safà-Ndranahary lafa mahita ty lilin-drazanareo nareo.
7 Mpiatsaravelatsihy nareo! Rariny laha naminany mikasiky anareo Isaia hoe:
8 ‘An-tsony avao ro anajan’ny vahoaky toy ahy, fa ty fon-drozy lavitsy ahy.
9 Vozaky avao rozy manompo ahy satria didin’olombelo ro ampianarin-drozy.’”
10 Le nikaihiny ho aminy eny ty vahoaky ka hoy ty asany: “Janjino safàko toy, le anovo azo soa ty dikany:
11 Tsy ze militsy am-bavan’olo ro mampaloto azy, fa ze miboaky baka am-bavany ao.”
12 Bakeo namonjy azy mpianatsy rey ka nivola hoe: “Hainao va fa neloky Fariseo reo lafa naharè an’ny raha nivolaninao teo iny?”
13 Le hoy ty asan’i Jesosy: “Hombota ze raha tsy nambolen’ny Babako an-danitsy any iny.
14 Engao rozy fa jiky mitariky jiky. Fa laha olo jiky ro mitariky jiky, le samby ho latsaky an-davaky any rozy.”
15 Le hoy Petera: “Mba hazavao aminay fanohara teo iny.”
16 Le hoy ty asany: “Ndre nareo koa va mbo tsy mahay?
17 Tsy hainareo va fa ze raha militsy am-bava ao le mandalo an-kibo* ao, bakeo miboaky ndraiky?
18 Fe ze miboaky amy vava le baka am-po ao, ka zay ro mampaloto ty olo,
19 satria baka am-po ao ro iboahan’ny eritseritsy raty, ohatsy hoe famonoa olo, fandrantova, fijangajangà,* halatsy, fitsangana ho vavolombelo mavandy, noho fitivà raha masy.
20 Reo ro mampaloto ty olo, fa tsy ty fihinana amy tana tsy misasa.”*
21 Bakeo niala teo Jesosy ka nana amy faritsin’i Tyro noho Sidona any.
22 Le ingy nisy ampela fenisianina raiky baka amy faritsy iny ao, namonjy azy sady nitoreotoreo hoe: “Mba ferineso lahy aho Tompo Anan’i Davida! Tena mijaly anakampelako zay fa misy demonia.”
23 Fe tsy namaly azy mihintsy Jesosy. Farany namonjy azy mpianatsiny rey ka nivola taminy hoe: “Roaso any ie fa mitoreotoreo afarantsika ao avao.”
24 Le hoy Jesosy: “Ho amy aondry trobo amy taranakin’Israely eo avao ro naniraha ahy.”
25 Fe namonjy azy ampela iny, le niankohoky talohany teo sady nivola hoe: “Ampeo aho Tompo!”
26 Le hoy ty asany: “Tsy mety laha alà ty mofon’ajà ka atoraky ho ahi-ty anak’amboa.”
27 Fe hoy ty asan’ampela iny: “Marina zay Tompo! Fe ty anak’amboa koa anè mba mihina ani-ze potipotiny latsaky baka an-databon’ny tompony eny!”
28 Farany hoy Jesosy taminy: “Tena manam-pinoa vatany iha. Enganè ho tanteraky raha irinao zay!” Avy le niafaky ty aretin’ny anakampelany iny tamy fotoa zay.
29 Bakeo niala teo Jesosy, ka niavy tanilan’ny Riakin’i Galilia teny. Niakatsy tam-bohitsy teny ie, le nipetrapetraky teny.
30 Le nisy vahoaky maro namonjy azy sady nanday olo kombo, kilemaina, jiky, moa, noho marary maro sankarazany. Le napetrakin-drozy tan-tombony eo olo rey, ka nafahiny ty aretin-drozy.
31 Nitseriky amy zay vahoaky rey lafa nahita ty moa lasa nivola, ty kilemaina lasa salama, ty kombo lasa nandeha, le ty jiky lasa nahita. Le nanome voninahitsy an’ny Ndranaharin’ny Israely iny vahoaky rey.
32 Fe nikaihin’i Jesosy ho aminy eo mpianatsiny rey ka hoy ty asany: “Ferinesako olo retoa, satria fa telo andro rozy ro nijano tamiko eto, sady tsy mana raha hohany. Fe tsy teako hampolỳ rozy amy rozy mosarè* io, tsy no ho vozaky an-dala eny.”
33 Fe hoy mpianatsy rey taminy: “Aia ty hahitantsika mofo hahavintsy olo maro retoa amy pilasy mitoka toy atoy?”
34 Le hoy Jesosy tamin-drozy: “Firy ty mofo aminareo any?” Le hoy ty asan-drozy hoe: “Fito, le misy fia maliniky kelikely koa.”
35 Nampangalany pilasy tamy tany eo amy zay olo rey,
36 le nalany mofo fito noho fia rey. Lafa baka nisaotsy a-Ndranahary ie, le nitampahiny raha rey ka nizaràny tamy ty mpianatsiny, le mpianatsiny rey koa nizara an’ny raha rey tamy ty vahoaky.
37 Le nihina rozy iaby ka nivintsy. Bakeo nahoron’ny mpianatsy rey ty sisa tsy lany ka nahafeno sobiky be fito.*
38 Lahilahy 4 000 ro nihina, ankoatsy ty ampela noho ty ajà.
39 Tamy farany, nampolìny vahoaky rey. Bakeo niakatsy anaty laka ie, le nandeha tamy faritsin’i Magadana any.
Fanamariha ambany pejy
^ Mana ty lilin-drazany ty Jiosy lafa manasa tana, le zatsy nanao ani-zay ty Fariseo noho ty Jiosy hafa.
^ Na: “manaboka.”
^ Na: “an-troky.”
^ Zany hoe tsy diovy mifanaraky amy takin’ny Lalàna.
^ Na: “tsy mihinan-kany.”
^ Na: “sobiky fito fandaisa vatia.”
