Nisoratin’i Matio 16:1-28
16 Le namonjy azy ty Fariseo noho ty Sadoseo, ka nangataky azy hampiseho famantara baka an-danitsy any, mba hamandriha azy.
2 Le hoy ty navaliny an-drozy: “Lafa hariva ty andro, le mivola nareo hoe: ‘Ho soa ty andro hamaray satria mena lanitsy iny.’
3 Lafa maraindray koa ty andro le mivola nareo hoe: ‘Hanintsy ty androany sady ho avy ty ora, satria mena lanitsy iny fe maìky.’ Hainareo ty manazava ty raha miseho amy lanitsy eny, fe tsy hainareo ty manazava ty dikan’ny raha miseho henanizao toy.
4 Mila famantara avao ty taranaky raty fanahy noho mpandranto,* fe tsy misy famantara hamea an-drozy laha tsy famantara mikasiky an’i Jona iny avao.” Bakeo nengany rozy le nandeha ie.
5 Bakeo nandeha ampita eny mpianatsy rey, fe nanalino nanday mofo.
6 Le hoy Jesosy tamin-drozy: “Mba mimarikariha le miambena amy leviran’ny Fariseo noho Sadoseo.”
7 Nifampiresaky amy zay rozy hoe: “Hay ndre tsika tsy nanday mofo iny volaniny io.”
8 Nihain’i Jesosy raha zay ka hoy ty asany: “Kely finoa nareo zao! Ataonareo hoe nareo tsy nanday mofo iny moa resahiko io?
9 Mbo tsy hainareo avao va, sa tsy tiaronareo mofo limy ho an’olo 5 000 iny, kanefa mbo nisy paniè firy ty nivoavorinareo?
10 Sa tsy tiaronareo mofo fito ho an’olo 4 000 iny, kanefa mbo nisy sobiky be* firy ty nivoavorinareo?
11 Ka manino ro tsy hainareo hoe tsy mofo niresahiko taminareo iny? Fe miambena amy leviran’ny Fariseo noho Sadoseo.”
12 Zay vo nihain-drozy ty teany hovolany hoe tokony hiamby soa amy fampianaran’ny Fariseo noho Sadoseo rozy, fa tsy amy leviran’ny mofo.
13 Lafa niavy tamy faritsin’i Kaisaria-Filipo ao Jesosy, le nanontaneany mpianatsiny rey hoe: “Ia fahaizan’olo Anak’olo zao?”
14 Le hoy ty asan-drozy: “Misy mivola hoe Jaona Mpanao Batisa. Misy koa mivola hoe Elia, le misy koa mivola hoe Jeremia na ty raiky amy mpaminany rey.”
15 Le hoy ty asany: “Ka nareo, ia ty fahaizanareo ahy?”
16 Le namaly Simona Petera hoe: “Iha Kristy Anakini-azy Ndranahary velo iny.”
17 Le hoy Jesosy taminy: “Sambatsy iha, Simona anan’i Jona, satria tsy olombelo* ro nanambara ani-zay taminao, fa Babako an-danitsy any iny.
18 Ankoatsini-zay, zaho mivola aminao hoe: Petera iha, le anabon’ny vatolampy toy eto ro hanorenako ty fiangonako, ka tsy haharesy azy ty vavahadin’ny Lolo.*
19 Hameako anao ty lakilèn’ny Fanjakàn’ny lanitsy, ka ze hofehezinao an-tany etoy, le fa voafehy an-danitsy any, le ze hovahànao an-tany etoy, le fa voavaha an-danitsy any.”
20 Bakeo nafepetsiny mpianatsiny rey mba tsy hivolambola amin’olo hoe ie ro Kristy.
21 Nanomboky teo le nanazava tamy mpianatsiny rey Jesosy hoe tsy maintsy mandeha a Jerosalema any ie, le hampijalijalìn’ny anti-panahy noho ty sefon’ny mpisoro noho ty mpanora-dalàna, ka hovonoa bakeo hovelomy amy andro fahatelo.
22 Nihalan’i Petera raha nivolaniny iny, ka nandesiny nisitaky tan-tsisiny eny Jesosy le nivolaniny hoe: “Mba diniho avao ze hahasoa anao Tompo! Tsy hahazo anao mihintsy zay.”
23 Fe niambohoany Petera le nivolaniny hoe: “Mandehana afarako any iha Satana! Vato maminga alohako eto iha, satria tsy hevitsi-Ndranahary ahinao zay, fa hevitsin’olombelo.”
24 Bakeo nivola tamy mpianatsiny rey Jesosy hoe: “Laha misy ta hanaraky ahy, le tsy maintsy mandà ty vatany ie ka manday ty hazo fijaleany* sady manaraky ahy avao.
25 Satria ze ta hanavotsy ty ainy ro hamoy ty ainy, fa ze mamoy ty ainy satria mpanori-dia ahy ro hanavotsy ty ainy.
26 Ino vatany moa ty soa ho azon’olo raiky laha azony zao tontolo zao fe afoiny ty ainy? Sa ino ty hamean’olo hatakalo ty ainy?
27 Satria ho avy miaraky amy voninahitsin’ny Babany ty Anak’olo noho ty anjeliny, ka hamaly ty kiraidraiky arakarakini-ze nataony.
28 Ambarako anareo mazava fa misy amin’olo mitsanga eto reto tsy ho maty mihintsy, laha tsy fa hitany avy amy Fanjakàny ao ty Anak’olo.”
