Nisoratin’i Matio 17:1-27
17 Enin’andro tafarani-zay, nandesin’i Jesosy niaraky taminy Petera noho Jakoba noho Jaona rahalahiny, le nandeha nitoka tamy vohitsy abo zay teny rozy.
2 Le niova tarehy talohan-drozy teo ie, ka namirapiratsy manahaky masoandro ty tarehiny, le lasa nipelapelatsy* manahaky hazavà ty sikiny.*
3 Le ndreo fa niseho tamin-drozy koa Mosesy noho Elia, niresaky tamy Jesosy.
4 Le hoy ty asan’i Petera tamy Jesosy: “Tena soa ty eto Tompo. Laha teanao, le hananga tanty telo eto aho, ka ty raiky ho anao, ty raiky ho an’i Mosesy, le ty raiky ho an’i Elia.”
5 Tamy ie nivola iny, le ingy nisy rahona namirapiratsy nanaloky an-drozy. Le nisy feo nivola baka amy rahona iny ao hoe: “Anako teako io sady mahafalifaly ahy. Janjino ie.”
6 Natahotsy marè mpianatsy rey lafa naharè ani-zay, le niankohoky tamy tany.
7 Bakeo namonjy an-drozy Jesosy sady nikasiky an-drozy, le nivola hoe: “Mitsangàna fa ka matahotsy.”
8 Lafa niandra rozy, le Jesosy raiky avao ty nihitan-drozy teo.
9 Lafa nijotso baka amy vohitsy iny rozy, le nivolanin’i Jesosy hoe: “Ka resahy amin’olo mihintsy fahità iny, laha tsy fa velo ndraiky ty Anak’olo.”
10 Fe nanontany azy mpianatsiny rey hoe: “Ka manino mpanora-dalàna reo ro mivola hoe tsy maintsy ho avy tse Elia?”
11 Le namaly ie hoe: “Ho avy vatany Elia, le hampoliny amy pilasiny ty raha iaby.
12 Fe ambarako anareo fa fa niavy Elia, kanefa tsy nihain’olo ie le nataon-drozy taminy iaby ze tean-drozy hatao taminy. Hampijalijalìn-drozy manahaky ani-zay koa ty Anak’olo.”
13 Zay vo nihain’ny mpianatsy rey hoe Jaona Mpanao Batisa ty teany horesahy.
14 Lafa namonjy an’ny vahoaky rey rozy, le nisy lahilahy namonjy azy, le nandohaliky taminy teo sady nivola hoe:
15 “Mba ferineso anakilahiko zay Tompo fa voan’ny helatsy. Marary ie ao. Kindraiky ie lavo amy afo, le kindraiky amy rano.
16 Fa nandesiko tamy mpianatsinao reo ie, fe tsy niafakin-drozy.”
17 Le hoy ty asan’i Jesosy: “Vahoaky* tsy manam-pinoa noho raty fanahy nareo! Zisiky ombia aho ro tsy maintsy mbo hijano aminareo eto? Zisiky ombia aho ro tsy maintsy handefitsy aminareo? Andeso bakao ie.”
18 Bakeo nitrivotin’i Jesosy demonia iny, le niboaky tamy ajà lahilahy iny. Avy le niafaky ty aretiny tamy fotoa zay.
19 Bakeo namonjy an’i Jesosy mitoka ty mpianatsiny le nanontany hoe: “Nanino zahay ro tsy nahavita nandroaky an’ny raha iny?”
20 Hoy ty asany tamin-drozy: “Satria kely finoa nareo. Fa ambarako anareo mazava fa laha manam-pinoa nareo, ndre kelikely manahaky voan-tsinapy io avao aza, ka mivola amy vohitsy roy hoe: ‘Mifindrà eroy’, le hifindra ie. Le tsy hisy raha tsy ho vitanareo.”
21 ——
22 Lafa nitafiaraky ta Galilia tao rozy, le nivola Jesosy hoe: “Fa hisy hamadiky ty Anak’olo, le ho azon-tanan’ny fahavalo.
23 Hovonoan-drozy ie, le hovelomy amy andro fahatelo.” Le nalahelo biby mpianatsy rey.
24 Lafa niavy ta Kapernaomy tao rozy, le namonjy an’i Petera lahilahy nitaky hetra roe drakma rey, le nanontany hoe: “Tsy mandoa hetra va mpampianatsy anareo iny?”
25 Le hoy ty asany: “Mandoa ie!” Fe lafa nilitsy tan-trano tao Petera, le avy le nanontanean’i Jesosy hoe: “Akory ty hevitsinao Simona? Baka amin’ia moa ty ahazoan’ny mpanjaka an-tany etoa haba na hetra?* Baka amy ty anany sa baka amin’olo hafa?”
26 Lafa nivola ie hoe: “Baka amin’olo hafa”, le nivola Jesosy hoe: “Tsy mila mandoa hetra zany ty anaky!
27 Fe mba tsy hampeloky an-drozy, le mandehana an-driaky eny bakeo manoraha lelam-binta, le alao ze fia azonao voalohany. Lafa vohanao ty vavany, le hahita sekely volafoty* raiky iha. Alao raha iny le ameo azy, ho hetrantsika roe.”
Fanamariha ambany pejy
^ Na: “foty.”
^ Abt: “sikiny ivelany.”
^ Abt: “Taranaky.”
^ Hetra takỳ amin’olo kiraidraiky resahy eto io.
^ Abt: “statera”, nieritserety hoe tetradrakma.
