Nisoratin’i Matio 2:1-23
2 Nateraky ta Betlehema a Jodia any Jesosy, tamy andron’i Heroda* Mpanjaka. Tafara kelikelini-zay, nisy mpanenty andro* baka Antinana any niavy ta Jerosalema ao,
2 ka nanontany hoe: “Aia ajà vo nateraky ho mpanjakan’ny Jiosy zao? Tsy zay fa nahita ty basiany zahay tamy zahay ta Antinana any, le avy zahay hiankohoky aminy.”
3 Vo naharè ani-zay Heroda Mpanjaka noho ty olo iaby ta Jerosalema ao, le navaka.
4 Le navorin’i Heroda iaby ty sefon’ny mpisoro noho ty mpanora-dalàna iaby tamy vahoaky teo, le nanontaneany hoe aia ty pilasy hahaterahan’i Kristy.*
5 Le nivola rozy hoe: “A Betlehema a Jodia any, satria zao ty nisoratin’ny mpaminany:
6 ‘Iha Betlehema amy tanin’i Joda, tsy iha mihintsy ro farany kelikely amy tanà fehezin’ny governeran’i Joda, satria baka aminao ao ro hiboaky azy mpitariky noho mpiarakandro ty vahoakiko iny.’”
7 Bakeo nikaihin’i Heroda mitoka mpanenty andro rey, le nanontaneany soa hoe nombia ty niboahan’ny basia iny.
8 Le nirahiny nana a Betlehema any rozy, ka nivolaniny hoe: “Ndany ilao mbaombao ajà zay, ka lafa hitanareo ie le volanonareo aho fa mba handeha hiankohoky aminy koa.”
9 Nandeha rozy lafa naharè an’ny safàn’ny mpanjaka zay. Le ingy nandeha talohan-drozy eo basia fa nihitan-drozy ta Antinana any iny, ka tsy nijano laha tsy tanabon’ny trano nisy an’ny ajà iny teo.
10 Nifalifaly biby rozy nahita an’ny basia iny.
11 Lafa nilitsy tamy trano iny tao rozy, le nahita an’ny ajà iny niaraky amy reniny, zany hoe Maria, ka nandohaliky noho niankohoky tamy ajà iny teo. Nisokafin-drozy koa ty fasian-drozy raha lafovily, le namean-drozy volamena noho ditin-kazo manitsy noho miora ajà iny.
12 Fe namepetsy an-drozy tanaty nofy Ndranahary mba tsy himpoly amy Heroda any. Farany nandeha lala hafa rozy lafa noly amin-drozy any.
13 Lafa noly rozy, le nisy anjelin’i Jehovah niseho tamy Josefa tanaty nofy, le nivola hoe: “Ndany andeso milay a Ejipta any ajà io noho reniny io, le ka miala any laha tsy fa mivola aminao aho. Tsy zay fa hila an’ny ajà io Heroda satria ta hamono azy.”
14 Tamy haliky iny avao le nandesin’i Josefa nana a Ejipta any ajà iny noho reniny iny.
15 Nijano tany ie zisiky nahafaty an’i Heroda. Tanteraky zany raha nampivolanin’i Jehovah an’ny mpaminaniny iny hoe: “Nikaihiko hiala baka a Ejipta any ty anako.”
16 Neloky biby Heroda lafa nihainy hoe nivoafitakin’ny mpanenty andro rey ie. Farany ie naniraky olo mba hamono ani-ze ajà lahilahy iaby ta Betlehema any noho tamy faritsy iaby manodidy mbeo, zany hoe ze ajà roe tao manambany, satria zay ty nivolanin’ny mpanenty andro rey.
17 Bakeo nitanteraky raha nampivolany an’i Jeremia mpaminany iny hoe:
18 “Nisy feon’olo nitany marè biby niren-drozy ta Rama any. Nitany an’ny anany rey Rahely ka tsy nimety nampitsìny, satria tsy eo sasy rozy.”
19 Lafa nimaty Heroda, le nisy anjelin’i Jehovah niseho tamy Josefa tanaty nofy, ta Ejipta any.
20 Nivola anjely iny hoe: “Ndany andeso mimpoly amy tanin’Israely any ajà io noho reniny io, fa fa nimaty azy ta hamono azy rey.”*
21 Le nandesiny nimpoly tamy tanin’Israely any ajà iny noho reniny iny.
22 Fe niren’i Josefa hoe Arkelaosy anan’i Heroda ro nilasa mpanjakan’i Jodia nisolo an’i Heroda, ka natahotsy ho a Jodia any ie. Nivola tamy Josefa tanaty nofy koa Ndranahary, farany ie nandeha amy faritsin’i Galilia any.
23 Niavy tamy tanà kaihy hoe Nazareta zay ie ka nipetraky tao, mba ho tanteraky raha nampivolany an’ny mpaminany iny hoe: “Hokaihy hoe Nazareanina* ie.”
Fanamariha ambany pejy
^ Na: “magy.”
^ Na: “Mesia iny; Voahosotsy iny.”
^ Na: “azy ta hanafaky ty ainy rey.”
^ Azo inoa hoe baka amy safà hebreo midika hoe “tirin-kazo.”
