Nisoratin’i Matio 21:1-46
-
Nilitsy tamim-boninahitsy ta Jerosalema ao Jesosy (1-11)
-
Nidiovin’i Jesosy ty tempoly (12-17)
-
Niozonin’i Jesosy aviavy iny (18-22)
-
Baka aia ty fahefàn’i Jesosy? (23-27)
-
Fanohara mikasiky anaky roe lahy (28-32)
-
Fanohara mikasiky mpamboly namono olo (33-46)
-
Vato fehizoro tsy nitean’ny mpanao trano (42)
-
21 Lafa nihanarìny an’i Jerosalema rozy, le nijano ta Betifaga, zany hoe tamy Vohitsy Oliva teo. Bakeo naniraky mpianatsy roe Jesosy,
2 le nivolaniny rozy hoe: “Mandehana amy tanà kelikely roy eny, fa avy le hahita ampondra mifehy miaraky amy ty anany nareo. Vahao rozy le andeso amiko atoy.
3 Laha misy manontany anareo, le volano hoe: ‘Ilàn’ny Tompo raha reto.’ Le avy le hameany raha rey.”
4 Niseho vatany raha zay mba ho tanteraky raha nampivolany an’ny mpaminany iny hoe:
5 “Volano anakampelan’i Ziona iny hoe: ‘Ingy mana aminao atoy mpanjakanao iny! Soa fanahy ie sady mitikitsy ampondra. Anak’ampondra raha io, zany hoe anan’ny biby mpanday enta.’”
6 Le nandeha mpianatsy rey ka nanao ze raha nampanovin’i Jesosy an-drozy.
7 Nandesin-drozy ampondra iny noho anany iny, ka nataon-drozy tanabon’ny raha rey teo ty sikin-drozy,* le niondra teo Jesosy.
8 Namelatsy ty sikin-drozy* tan-dala teo ty ankamaroan’olo. Ty ilany koa nanampaky sampan-kazo le nametraky an’ny raha rey tan-dala teo.
9 Nisy olo maro koa nandeha talohan’i Jesosy teo noho nanaraky tafarany tao sady nikaikaiky avao hoe: “Mba arovo* lahy Anan’i Davida io! Enganè mba hahazo fitahia azy avy amy anaran’i Jehovah iny! Iha azy amy farany anabo any iny, mba arovo* lahy ie!”
10 Lafa nilitsy ta Jerosalema tao ie, le nisabadida ty olo tan-tanà tao sady nivola hoe: “Ia toy io?”
11 Le nampolimpolin’olo rey avao hoe: “Jesosy io. Mpaminany baka a Nazareta a Galilia any ie!”
12 Le nilitsy tamy tempoly tao Jesosy ka niroasiny iaby ze namarotsy noho nivily raha tao. Naongany koa latabon’ny mpanakalo drala noho sezin’ny mpamarotsy pizon rey.
13 Le hoy ty asany tamin-drozy: “Voasoratsy hoe: ‘Ty tranoko hokaihy hoe trano fivavaha’, kanefa ataonareo lakato fivonian’ny malaso.”
14 Nisy jiky noho kombo koa namonjy azy tamy tempoly tao, le nafahiny ty aretin-drozy.
15 Neloky ty sefon’ny mpisoro noho ty mpanora-dalàna, lafa nahita ty raha mahatseriky nataony noho nahita ajà lahilahy nikaikaiky tamy tempoly tao rey hoe: “Mba arovo* lahy Anan’i Davida io!”
16 Le hoy ty asan-drozy: “Renao va raha volanin-drozy zao?” Le hoy Jesosy tamin-drozy: “Eka. Ka mbo tsy nivakìnareo mihintsy va azy ho zao iny hoe: ‘Baka amy vavan’ajà noho anakajà kelikely ro ampiboahanao fiderà’?”
17 Bakeo nengany rozy ka niala tan-tanà tao ie le nandeha ta Betania tany, le niroro tany tamy haly iny.
18 Vo maraindray ie le fa nimpoly tan-tanà ao. Nimosarè ie tamy zay.
19 Nahita aviavy nitiry tan-tsisin-dala teny ie le namonjy teny, fe tsy nahita voany ie fa raviny avao. Le hoy ty asany tamy hazo iny: “Enganè tsy hamoa sasy* iha!” Avy le nalazo hazo iny.
20 Nitseriky mpianatsy rey lafa nahita an’ny raha zay ka nivola hoe: “Manino aviavy iny ro avy le nalazo?”
21 Le hoy ty navalin’i Jesosy an-drozy: “Ambarako anareo mazava fa laha manam-pinoa nareo ka tsy misalasala, le ho vitanareo raha nataoko tamy aviavy iny. Ndre mivola amy vohitsy toy koa aza nareo hoe: ‘Mialà eto le miravoha an-driaky any, le ho tanteraky zay.
22 Le ho azonareo iaby ze raha angatahinareo amy vavaky laha manam-pinoa nareo.”
23 Lafa tamy tempoly tao Jesosy, le namonjy azy ty sefon’ny mpisoro noho ty anti-panahin’ny vahoaky. Amy ie mbo nampianatsy iny, le hoy ty asan-drozy: “Fahefà baka aia anaovanao raha ataonao reto io? Le ia ty nanome anao an’ny fahefà zay?”
24 Le hoy ty navalin’i Jesosy an-drozy: “Zaho koa mba hametraky fanontanea raiky aminareo. Laha valeanareo zay, le hovolaniko aminareo koa hoe baka aia ty fahefà anaovako an’ny raha reto:
25 Baka aia ty nahazoan’i Jaona fahefà hanao batisa? Baka an-danitsy any sa baka amin’olo?” Le nifampiresaky rozy hoe: “Laha tsika mivola hoe: ‘Baka an-danitsy any’, le hivola ie hoe: ‘Ka nanino nareo ro tsy nino azy?’
26 Fe laha mivola tsika hoe: ‘Baka amin’olo’, le ty vahoaky koa ro hatahorantsika satria mieritseritsy rozy iaby hoe mpaminany Jaona.”
27 Ka hoy ty navalin-drozy an’i Jesosy: “Tsy hainay.” Le hoy Jesosy: “Zaho koa tsy hivola aminareo hoe fahefà baka aia ty anaovako ani-reto.
28 “Akory ty hevitsinareo? Nisy lahilahy nana anakilahy roe. Namonjy an’ny raiky voalohany iny ie le nivola hoe: ‘Ndany iha anako hiasa an-tanimboaloboky any androany.’
29 Le namaly anany iny hoe: ‘Zaho tsy handeha.’ Fe bakeo ie naneny le nandeha avao.
30 Namonjy an’ny anany faharoe iny koa ie, le nivola ho zay ndraiky. Le nivola anany iny hoe: ‘Ndao nahoda fa ho mbeo aho.’ Fe tsy nandeha ie.
31 Ia amin-drozy mirahalahy zany ro nanao ty sitrapon’ny babany?” Le hoy ty asan-drozy: “Azy voalohany iny.” Le hoy Jesosy tamin-drozy: “Ambarako anareo mazava fa ty mpitaky hetra noho ty makorely ro hilitsy alohanareo amy Fanjakà-Ndranahary any.
32 Satria niavy taminareo teo Jaona, le nampianatsy ty lalan’ny fahamarina, fe tsy nino azy nareo. Fa ty mpitaky hetra noho ty makorely nino azy. Ndre fa nahita ani-zay aza nareo, le mbo tsy naneny avao, sady tsy nino azy.
33 “Janjino koa fanohara raiky toy: Nisy lahilahy raiky nana tany. Nanaovany tanimboaloboky ty teo, le nasiany lakoro manodidy azy. Bakeo nihaly lavaky fanamboara divay* ie, le nananga tilikambo. Bakeo nampanoviny taravay tamy mpamboly raha iny, le nandeha an-tany hafa any ie.
34 Lafa niavy ty fotoa famoria vokatsy, le nirahiny ho amy mpamboly rey any ty mpanompony mba hangalaky ty anjarany.
35 Fe nisamborin’ny mpamboly rey rozy, ka ty raiky nivangoan-drozy, ty raiky nivonoan-drozy, le ty raiky nitorahin-drozy vato.
36 Naniraky mpanompo maro mandilatsy ani-tamy voalohany rey ndraiky lahilahy iny, fe mbo nataon-drozy ho zay avao.
37 Farany, nirahiny ho amin-drozy any ty anakilahiny satria nieritseritsy ie hoe: ‘Hanaja an’ny anako io rozy.’
38 Fe lafa nahita an’ny anany iny mpamboly rey, le nifampiresaky hoe: ‘Ingy mpandova iny! Ndao hovonoantsika ie, amy zay azontsika ty lovany!’
39 Le nisamborin-drozy ie, ka nitaritaritin-drozy tambalikin’ny tanimboaloboky iny any, bakeo nivonoan-drozy.
40 Ka lafa avy zany tompon’ny tanimboaloboky iny, hataony akory mpamboly rey?”
41 Le hoy ty asani-azy nijanjy azy rey: “Haripakiny iaby rozy satria raty fanahy. Fa tanimboaloboky iny hampanoviny taravay amy ze mpamboly hanome azy ty anjarany lafa miakatsy ty vokatsy.”
42 Le hoy Jesosy tamin-drozy: “Mivola ty Soratsy Masy hoe: ‘Ty vato tsy nitean’ny* mpamboatsy trano ro lasa vato fehizoro farany bevata.* Baka amy Jehovah raha zay ka mahatseriky antsika.’ Mbo tsy nivakìnareo mihintsy va raha reo?
43 Ka zao ty raha ambarako anareo: Halà aminareo ty Fanjakà-Ndranahary, le ze firenena mamokatsy voa maeva an’ny Fanjakà iny ro hamea azy.
44 Ho potipotiky ze miravoky amy vato io eo, le ho torotoro ze iravohany.”
45 Lafa naharè an’ny fanohara reo ty sefon’ny mpisoro noho ty Fariseo, le nihain-drozy hoe rozy niresahin’i Jesosy io.
46 Ta ho nanambotsy azy rozy fe natahotsy an’ny vahoaky rey, satria vahoaky rey nieritseritsy hoe mpaminany Jesosy.
Fanamariha ambany pejy
^ Abt: “sikin-drozy ivelany.”
^ Abt: “sikin-drozy ivelany.”
^ Abt: “avoto.”
^ Abt: “avoto.”
^ Abt: “avoto.”
^ Abt: “tsy hamoa sasy mandrakizay.”
^ Na: “vato tsy neken’ny.”
^ Abt: “lasa lohan’ny zoro.”
