Nisoratin’i Matio 25:1-46
25 “Ka ty Fanjakàn’ny lanitsy, le azo ampitovizy amy virjiny folo samby nangalaky jiro, ka niboaky hitsena ty mpampakatsy.
2 Ty limy amin-drozy gegy, le ty limy mahihitsy.*
3 Gegy rey nanday jiro, fe tsy nanday menaky.
4 Fa azy mahihitsy rey nanday jiro sady nanday menaky tanaty fasia menaky.
5 Mbo nielaela mpampakatsy iny vo niavy, ka nikonkò iaby rozy le niazon-droro.
6 Lafa niavy ty matonaly,* le nisy nikaikaiky hoe: ‘Iny mpampakatsy iny! Miboaha hitsena azy.’
7 Le nitsanga iaby virjiny rey, ka nikarakara ty jiron-drozy.
8 Le hoy virjiny gegy rey tamy mahihitsy rey: ‘Mba anomezo amy menakinareo zahay, fa fa ho maty jironay retoa.’
9 Fe namaly virjiny mahihitsy rey hoe: ‘Mety tsy ho ampy antsika reto, fa ndany mivily amy mpamarotsy any.’
10 Fe niavy mpampakatsy iny lafa nandeha nivily menaky rozy. Fa virjiny mahihitsy rey fa niparè, ka niaraky amy mpampakatsy iny nilitsy tamy mariazy iny tao, bakeo nahily varavara iny.
11 Niavy amy zay koa virjiny hafa rey tafarani-zay le nivola hoe: ‘Azafady lahy nahoda! Mba vohao zahay!’
12 Le hoy ty asany: ‘Tsy misy fahaizako anareo mihintsy.’
13 “Miambena avao zany, satria tsy hainareo ndre ty andro ndre ty lera.
14 “Ty Fanjakàn’ny lanitsy koa, le manahaky lahilahy raiky handeha ho an-tany hafa any. Nampikaiky ty mpanompony ie, le nankininy tamin-drozy ty hananany.
15 Ty raiky nameany volafoty limy talenta,* ty raiky nameany roe talenta, le ty raiky nameany talenta raiky, samby arakaraky ty fahaizan-drozy iaby. Bakeo nandeha an-tany hafa any ie.
16 Avy le nandeha azy namea volafoty limy talenta iny, ka nampiasa an’ny raha rey, le nahazo limy talenta hafa.
17 Azy namea roe talenta iny koa, nahazo roe talenta hafa.
18 Fa azy namea talenta raiky avao iny, nandeha nihaly lavaky, le navoniny dralan’ny* tompony iny.
19 “Lafa ela ty ela, le niavy tompon-drozy iny ka nanontany an-drozy mikasiky an’ny dralany rey.
20 Le namonjy teo azy namea limy talenta iny, ka nanday limy talenta fanampiny sady nivola hoe: ‘Nanankinanao limy talenta aho tompo, fe henteo fa nahazo limy hafa aho.’
21 Le hoy tompony iny taminy: ‘Tena soa zay! Mpanompo soa noho azo atokisa iha! Niazo atokisa tamy raha vitsivitsy iha, ka hotendreko hiandraikitsy raha maro. Ndao hifalifaly miaraky amy tomponao.’
22 Bakeo namonjy teo koa azy namea roe talenta iny ka nivola hoe: ‘Nanankinanao roe talenta aho tompo, fe henteo fa nahazo roe hafa aho.’
23 Le hoy tompony iny taminy: ‘Tena soa zay! Mpanompo soa noho azo atokisa iha! Niazo atokisa tamy raha vitsivitsy iha, ka hotendreko hiandraikitsy raha maro. Ndao hifalifaly miaraky amy tomponao.’
24 “Farany, namonjy teo koa azy namea talenta raiky iny le nivola hoe: ‘Haiko fa olo miola iha tompo. Mangalaky avao iha ndre tsy namboly sady mamory avao ndre tsy nikororoky.
25 Farany natahotsy aho ka nandeha, le naleviko tse talentanao iny. Ingo dralanao iny.’
26 Le hoy tompony iny: ‘Mpanompo raty fanahy iha sady kamo! Fa hainao hoe mangalaky avao aho ndre tsy namboly sady mamory avao ndre tsy nikororoky.
27 Ka manino laha napetrakinao tamy banky dralako* iny, amy zay mba nahazoako anany lafa niavy aho?
28 “Nivola koa ie hoe: ‘Alao aminy talenta iny, le ameo ani-azy mana folo talenta iny,
29 satria ze mana, le mbo hamea maro ka hana maro biby. Fa ze tsy mana, ndre ty raha ananany aza halà aminy.
30 Sady atoraho amy maìky amonto any mpanompo tsy misy ilà azy io! Any ie ro hitàny noho hangìtsy.’*
31 “Ho be voninahitsy ty Anak’olo lafa avy miaraky amy ty anjeliny iaby, le hipetraky amy sezim-panjakàny be voninahitsy.
32 Le havoriny aminy eo ty firenena iaby, ka havahiny ty olo, manahaky mpiaraky aondry manavaky aondry amy aosy* rey.
33 Le hataony ankavanany eo ty aondry fa ty aosy* ankaviany eo.
34 “Le zao ty hovolanin’ny Mpanjaka amy ze ankavanany eo: ‘Avia nareo ze nitahin’ny Babako, mandovà an’ny Fanjakà fa nomany ho anareo liany nanorena ani-zao tontolo zao iny.
35 Satria lafa nimosarè aho le nameanareo raha hohany. Narandrano aho le nameanareo raha hinomy. Nivahiny aho le nampiantranònareo.
36 Tsy nisiky* aho le nampisikininareo. Narary aho le nikarakaranareo. Nigadra aho le nivangìnareo.’
37 Le hoy ty navalin’olo marina rey: ‘Ka nao Tompo, nombia iha ro nihitanay mosarè ka nameanay hany, na narandrano ka nameanay raha hinomy?
38 Nombia iha ro nihitanay hoe vahiny ka nampiantranònay, na tsy nisiky ka nampisikininay?
39 Nombia iha ro nihitanay narary na nigadra ka nivangìnay?’
40 Le hoy ty navalin’ny Mpanjaka iny an-drozy: ‘Ambarako anareo mazava fa ze nataonareo tamy raiky amy farani-ze maliniky amy rahalahiko reto, le nataonareo tamiko.’
41 “Le hoy ty asany tamy azy ankaviany eo rey: ‘Mialà any nareo voaozo io, le mandehana amy afo maharitsy mandrakizay any, amy afo fa nomany ho an’ny Devoly noho ty anjeliny iny any.
42 Satria nimosarè aho fe tsy nameanareo raha hohany, narandrano aho fe tsy nameanareo raha hinomy.
43 Nivahiny aho fe tsy nampiantranònareo, tsy nisiky aho fe tsy nameanareo siky, le narary noho nigadra aho fe tsy nikarakaranareo.’
44 Le hoy ty navalin-drozy: ‘Ka nao Tompo, nombia iha ro nihitanay mosarè na narandrano na nivahiny na tsy nisiky na narary na nigadra, ka tsy nikarakaranay?’
45 Le hoy ty asany tamin-drozy: ‘Ambarako anareo mazava fa ze tsy nataonareo tamy raiky amy farani-ze maliniky reto, le tsy nataonareo tamiko.’
46 Haripaky* mandrakizay rozy, fa ty olo marina hahazo fiaina mandrakizay.”
Fanamariha ambany pejy
^ Na: “hendry.”
^ Na: “vakimirahaly.”
^ 1 talenta grika = 20,4 kg.
^ Abt: “volafotin’ny.”
^ Abt: “volafotiko.”
^ Zany hoe hangìtsy satria ho meloky noho kivy tanteraky.
^ Na: “bengy.”
^ Na: “bengy.”
^ Na: “Zara laha nisiky.”
^ Abt: “Hotampahy; Horantsàna”, manahaky sampan-kazo tampahy rey.
