Nisoratin’i Matio 26:1-75
-
Nila hevitsy hamonoa an’i Jesosy ty mpisoro (1-5)
-
Menaky manitsy naily tamy Jesosy (6-13)
-
Paska farany; ty hamadiha an’i Jesosy (14-25)
-
Sakafo Harivan’ny Tompo voalohany (26-30)
-
Fa nivola Jesosy hoe handà azy Petera (31-35)
-
Nivavaky ta Getsemane ao Jesosy (36-46)
-
Nisambory Jesosy (47-56)
-
Tamy Fitsarà Anabo Jiosy eo (57-68)
-
Nandà an’i Jesosy, Petera (69-75)
26 Lafa baka nivola an’ny raha iaby rezay Jesosy, le hoy ty asany tamy mpianatsiny rey:
2 “Hainareo fa ho avy ty Paska afaky roe andro, le hatolotsin’olo amy fahavalony ty Anak’olo, mba hovonoa amy tsato-kazo.”
3 Le nivory tan-tokotanin’ny mpisorobe kaihy hoe Kaiafa ty sefon’ny mpisoro noho ty anti-panahin’ny vahoaky.
4 Niaraky nila hevitsy rozy mba hamitaha* an’i Jesosy noho hanambora azy, noho hamonoa azy.
5 Fe hoasan-drozy hoe: “Aleo tsy amy andro fety tsy no hisabadida ty vahoaky.”
6 Tamy Jesosy ta Betania any, tamy ie tan-tranon’i Simona boka ao,
7 le nisy ampela raiky namonjy azy nanday tavoangy kelikely* feno menaky manitsy sarotsy biby. Le nailin’ny ampela iny tan-dohan’i Jesosy eo raha iny. Mbo nihina* Jesosy amin’io.
8 Neloky mpianatsy rey lafa nahita ani-zay, ka nivola hoe: “Manino raha tỳ seràny io?
9 Laha navily zao iny le nahazoa drala be, le namea ho an’ny mahantra.”
10 Nihain’i Jesosy raha niresahin-drozy iny, ka hoy ty asany: “Manino ampela io ataonareo ani-zao io? Tena soa ty raha nataony tamiko.
11 Satria ho aminareo eo avao ty mahantra, fa zaho tsy raha ho aminareo eo avao.
12 Nasiany an’ny menaky manitsy iny ty vatako mba hanomàna ty fandevena ahy.
13 Ambarako anareo mazava fa ndre aia aia hitoria ty vaovao soa amy tany toy iaby, le horesahy koa ty raha nataon’ny ampela toy, ho fahatiarova azy.”
14 Bakeo nandeha amy sefon’ny mpisoro any ty raiky amy Apostoly 12 rey, azy kaihy hoe Jodasy Iskariota iny,
15 le nivola hoe: “Ino ty hameanareo ahy laha mamadiky azy aho mba hahazoanareo azy?” Le volafoty 30 sekely ty nifanarahan-drozy.
16 Nanomboky teo, le nila fotoa mety soa avao ie, mba hamadiha an’i Jesosy.
17 Tamy andro voalohany hankalazà ty Fetin’ny Mofo Tsy Misy Levira, le namonjy an’i Jesosy mpianatsy rey ka nivola hoe: “Aia ty teanao hikarakaranay an’ny fankalazà Paska iny ho anao?”*
18 Le hoy ty asany: “Mandehana an-tanà any nareo, le hahita lahilahy raiky zay. Resaho ie hoe: ‘Zao ty nivolanin’ny Mpampianatsy: “Fa marìny ty fotoa voatondro hahafatesako, ka hankalaza Paska miaraky amy mpianatsiko an-tranonao ao aho.”’”
19 Le nataon’ny mpianatsy rey raha nampanovin’i Jesosy an-drozy iny, ka nikarakaran-drozy Paska iny.
20 Lafa nihariva ty andro, le namonjy pilasy* tan-databo eo rozy amy mpianatsiny 12 rey.
21 Lafa nihina rozy le hoy Jesosy: “Ambarako anareo mazava fa hamadiky ahy ty raiky aminareo.”
22 Le nalahelo marè rozy ka samby nanontany azy hoe: “Zaho va zao Tompo?”
23 Le hoy ty asany: “Ze mampijobo ty mofony anaty boly ao miaraky amiko ro hamadiky ahy.
24 Marina fa handeha ty Anak’olo satria zay ty fa voasoratsy mikasiky azy, fe ho azon-draha olo hamadiky an’ny Anak’olo zay! Ty nisoa taminy aza tsy nateraky mihintsy ie.”
25 Le hoy Jodasy, azy hamadiky azy iny: “Zaho va zay Raby?” Le hoy Jesosy: “Ka fa ie volaninao zay.”
26 Amy rozy mbo nihina iny, nandramby mofo Jesosy. Nivavaky ie, bakeo nitampahiny mofo iny ka nameany an’ny mpianatsiny rey sady nivola ie hoe: “Rambeso toy le hano. Toy ty* vatako.”
27 Nandramby kopy koa ie ka nisaotsy a-Ndranahary, le nameany an-drozy kopy iny sady nivola ie hoe: “Minoma amy toy iaby nareo,
28 satria toy ty* lioko, zany hoe lion’ny fifanekea halatsaky hahasoa olo maro, mba hanengà ty fahotàn-drozy.
29 Fe ambarako anareo fa tsy hino amy vokatsin’ny voaloboky reto sasy aho, zisiky hiavian’ny andro hinomako divay vaovao miaraky aminareo amy Fanjakàn’ny Babako ao.”
30 Farany, lafa baka nanao hira fiderà* rozy, le nandeha amy Vohitsy Oliva any.
31 Bakeo nivola tamin-drozy Jesosy hoe: “Hanenga ahy* iaby nareo androany haly, amy raha hahazo ahy zay, satria fa voasoratsy hoe: ‘Hovangoako ty mpiarakandro, le hiparitaky ty aondry.’
32 Fe lafa velo ndraiky aho, le ho tratsinareo a Galilia any.”
33 Fe hoy Petera taminy: “Ndre hanenga anao* iaby aza rozy amy raha hahazo anao zay, le tsy hanenga anao* mihintsy aho!”
34 Le hoy Jesosy taminy: “Ambarako anao mazava fa ndre mbo tsy maneno aza ty akoho androany haly, le fa handà ahy intelo iha.”
35 Fe hoy Petera: “Ndre tsy maintsy ho maty miaraky aminao aza aho, le tsy handà anao mihintsy!” Nivola ho zay iaby koa mpianatsy hafa rey.
36 Bakeo Jesosy noho mpianatsiny rey niavy tamy pilasy raiky kaihy hoe Getsemane. Le hoy ty asany tamy mpianatsy rey: “Mipetraha eto fa zaho handeha hivavaky eroy.”
37 Le nandesiny niaraky taminy Petera noho anan’i Zebedio roe lahy rey. Nanomboky nalahelo marè ie,
38 ka nivola tamin-drozy hoe: “Tena malahelo aho zao, sahala fa ho maty mihintsy. Mijanòna eto, le ka miroro fa miambena miaraky amiko.”
39 Bakeo nandeha kelikely nana aloha ie, le niankohoky sady nivavaky hoe: “Baba, laha mba azo atao le afaho amiko kopy* toy. Fe aleo tsy ty sitrapoko ro hatao fa ty ahinao.”
40 Bakeo nimpoly tamy mpianatsy rey teo ie. Henteany niroro rozy ka hoy ty asany tamy Petera: “Le tsy nivitanareo va ty niaraky amiko tsy niroro lera raiky avao?
41 Miambena noho mivavaha avao mba tsy ho resin’ny fakam-panahy. Mazoto* avao mbakany ty sain’olombelo, fa ty nofotsiny ro malemy!”
42 Nandeha fanindroany ndraiky ie, le nivavaky hoe: “Baba, laha tsy azo afahy toy fa tsy maintsy hinomiko, le aleo hatao avao ty sitraponao.”
43 Le nimpoly ndraiky ie ka mbo nahita an-drozy niroro satria fa nita hiroro biby rozy.
44 Farany nandeha ndraiky ie ka nivavaky fanintelony, le raha nivolaniny taloha teo iny avao ro nampoliny.
45 Bakeo nimpoly tamy mpianatsy rey teo ndraiky ie, le nivola tamin-drozy hoe: “Amy fotoa ho zao va nareo le mbo miroro noho mitofa avao? Fa sisa kely anè le ho avy ty lera hamadiha ty Anak’olo, ka hamea an-tanan’ny mpanota ie.
46 Mitsangàna, ndao tsika handeha fa fa marìny mpamadiky ahy iny.”
47 Mbo tsy tampitsy iaby safàny iny, le ingy fa niavy Jodasy, raiky amy Apostoly 12 rey. Nisy vahoaky maro niaraky taminy, le nanday sabatsy noho kobay rozy. Ty sefon’ny mpisoro noho ty anti-panahin’ny vahoaky ro naniraky an-drozy.
48 Fa namean’ny mpamadiky iny famantara rozy hoe: “Ze orofako le samboro fa zay ro ie.”
49 Avy le namonjy an’i Jesosy ie le nivola hoe: “Akory Raby!”, sady norofany ie.
50 Fe hoy Jesosy taminy: “Nao koahy, ino ataonao atoy io?” Le namonjy an-drozy vahoaky rey ka nanambotsy an’i Jesosy, le nanday azy.
51 Fe nampiboaky ty sabatsy taminy eny ty raiky amy azy niaraky tamy Jesosy rey, le nasiany azy ty mpanompon’ny mpisorobe iny ka niafaky ty sofiny.
52 Le hoy Jesosy taminy: “Ampolio amy pilasiny sabatsinao iny, fa ho matin’ny sabatsy ze mampiasa sabatsy.
53 Mieritseritsy moa iha io hoe tsy afaky misoloho amy Babako aho, ka avy le handefasany anjely maro?*
54 Fe laha manao ani-zay aho, akory ty hahatanteraky an’ny raha nampanorati-Ndranahary iny?”
55 Nivola tamy vahoaky rey Jesosy tamy fotoa zay hoe: “Nareo va zany niavy hanambotsy ahy miaraky amy sabatsy noho kobay, manahaky olo hanambotsy malaso rey? Sanandro aho nipetraky tamy tempoly ao nampianatsy, fe tsy nisamborinareo.
56 Fe miseho raha iaby zao, mba ho tanteraky ty raha nisoratin’ny mpaminany.”* Bakeo mpianatsy rey nanenga azy iaby, le nilay.
57 Olo nanambotsy an’i Jesosy rey amy zay, nanday azy tamy Kaiafa mpisorobe any. Fa nivory tany mpanora-dalàna noho anti-panahy rey tamy zay.
58 Fe nanaraky azy ta lavidavitsy eny avao Petera, zisiky niavian-drozy tan-dakoron’ny mpisorobe iny ao. Bakeo nilitsy tao ie, le nipetrapetraky niaraky tamy mpiasa an-trano rey satria teany ho hita ty hiafaran’ny raha iny.
59 Ta hamono an’i Jesosy ty sefon’ny mpisoro noho ty olo iaby tanatin’ny Fitsarà Anabo Jiosy, ka nila raha hasara azy.
60 Fe tsy nahita rozy ndre nimaro aza ty vavolombelo mavandy niavy teo. Bakeo nisy olo roe niavy
61 ka nivola hoe: “Lahilahy toy nivola hoe: ‘Vitako ty mandrava ty tempoli-Ndranahary noho mampitsanga azy anatin’ny telo andro.’”
62 Le nitsanga mpisorobe iny ka nivola taminy hoe: “Ka mba raha tsy mamaly iha! Manao akory raha asaran’olo reo anao zao?”
63 Fe mbo tsy nivola avao Jesosy, ka hoy mpisorobe iny taminy: “Mifantà amy Ndranahary velo iny iha, le volano aminay hoe iha va Kristy Anaki-Ndranahary iny!”
64 Le hoy Jesosy taminy: “Ka fa ie volaninao zay. Fe zao ty raha ambarako anareo: Manomboky henanizao, le ho hitanareo ty Anak’olo hipetraky ankavanani-Azy Mahery iny, sady ho avy amy rahon’ny lanitsy eny.”
65 Le nandriatsy ty sikiny* mpisorobe iny sady nivola hoe: “Nitiva a-Ndranahary ie! Ino koa ty mbo ilàntsika vavolombelo? Fa renareo fitivàny a-Ndranahary teo iny!
66 Ka akory ty hevitsinareo?” Le namaly rozy hoe: “Tokony* hovonoa ie.”
67 Bakeo nandoran-drozy ty tarehiny, le nikomondroan-drozy ie. Ty ilany nandravoky tampify azy
68 sady nivola hoe: “Maminania aminay, iha le Kristy zao! Ia namango anao teo iny?”
69 Nipetrapetraky tan-dakoro ao* Petera tamy zay, le nisy ajà ampela* raiky namonjy azy ka nivola hoe: “Iha koa niaraky amy Jesosy baka a Galilia any iny!”
70 Fe nandà tanatrehan’olo iaby teo rey Petera hoe: “Tsy haiko raha volaninao zao.”
71 Lafa niboaky narìny an’ny vavahady iny ie, le nisy ajà ampela hafa nahita azy ka nivola tamin’olo teo rey hoe: “Niaraky tamy Jesosy baka a Nazareta iny lahilahy tỳ!”
72 Le nandà ndraiky ie sady nifanta hoe: “Tsy misy fahaizako an’olo zao!”
73 Kanikanin’iny, namonjy an’i Petera olo nitsanga teo rey, le nivola hoe: “Tena naman-drozy iha, tratsy amy fivolananao zao avao.”*
74 Fe mbo nandà avao ie sady nifanta hoe: “Le zaho maty io, tsy haiko lahilahy volaninareo zao!” Avy le nisy akoho naneno tamy fotoa zay.
75 Le nitiaron’i Petera raha nivolanin’i Jesosy iny hoe: “Mbo tsy maneno ty akoho, le fa handà ahy intelo iha.” Farany niboaky tamonto any ie, le nirohaky ty tany.
Fanamariha ambany pejy
^ Na: “hameriverea.”
^ Tavoangy vita amy vato foty malisoliso resahy eto io.
^ Na: “nandry nihorira tan-databo eo.”
^ Abt: “iny mba hohaninao.”
^ Na: “nandry nihorira.”
^ Grika: estin, zany hoe “midika ho.”
^ Grika: estin, zany hoe “midika ho.”
^ Na: “salamo.”
^ Abt: “Ho tafitohina.”
^ Abt: “Ndre ho tafitohina.”
^ Abt: “tsy ho tafitohina.”
^ Tsy ino “kopy” io fa ty sitrapo-Ndranahary mikasiky an’i Jesosy hoe hengany ho maty ie lafa asaran’olo hoe nitiva a-Ndranahary.
^ Na: “Parè.”
^ Abt: “anjely maro mandilatsin’ny andian-tafiky 12.” Misy maramila 4 000 zisiky 6 000 eo ho eo ty andian-tafiky raiky, le manondro isaky tena maro na tsy voafaritsy ie etoa.
^ Na: “ze nisoratin’ny mpaminany amy Soratsy Masy ao.”
^ Abt: “sikiny ivelany.”
^ Abt: “Maeva.”
^ Abt: “tamonto an-dakoro ao.”
^ Mpanompovavy ajà ampela io.
^ Na: “satria manao fivolanan’olo baka a Galilia any.”
