Nisoratin’i Matio 3:1-17
3 Tafara atoy, niavy tamy dezeran’i* Jodia any Jaona Mpanao Batisa, le nitory tany.
2 Hoy ty asany: “Mibebaha fa fa marìny ty Fanjakàn’ny lanitsy.”
3 Ie, laha ty marina, azy niresahin’i Isaia mpaminany iny hoe: “Nay misy feo mikaikaiky amy dezera* any hoe: ‘Omano ty lala homban’i Jehovah! Anovo mahity ty lalany.’”
4 Volom-biby* ty siky nisikinan’i Jaona tamy zay, le angozy ty sentirany. Valala noho tantely* ty fihaniny.
5 Tamy fotoa zay, le niboaky ho amy Jaona eo ty olo ta Jerosalema any noho ty olo iaby ta Jodia noho tamy faritsy iaby manodidy ty Vavaranon’i Jordana.
6 Nataony batisa* tamy Vavaranon’i Jordana teo rozy sady nieky ty fahotan-drozy tamin’olo maro.
7 Nahita Fariseo noho Sadoseo maro niavy tamy pilasy nanaovany batisa teo Jaona, le nivola tamin-drozy hoe: “Taranakin’ny bibilava misy poizy nareo! Ia ty nampitandrina anareo hoe tokony hilay an’ny heloky ho avy iny nareo?
8 Atorò amy ty raha ataonareo moa fa mibebaky nareo.*
9 Tsy no hanao ho zao nareo anainareo any hoe: ‘Abrahama ro babanay.’ Ambarako anareo fa hai-Ndranahary ty manova an’ny vato retia ho lasa anan’i Abrahama.
10 Fa parè am-poton’ny hazo eo ty famaky. Hotampahy zany ze hazo tsy manome voany soa, le hatoraky anaty afo ao.
11 Zaho manao batisa anareo amy rano satria mibebaky nareo. Fe azy ho avy afarako ao iny mahery mandilatsy ahy, ka tsy maeva ahy ndre ty hanafaky ty kapany. Ie ro hanao batisa anareo amy fanahy masy noho amy afo.
12 Fa an-tanany eny ty fitaova fikororoha, le hodioviny soa ty pilasy famofohany vary. Le havoriny amy trano fanajaria azy ty vary, fa ty akofa noho ty tahom-bary* horoany amy afo tsy mety maty.”
13 Bakeo niala ta Galilia any Jesosy, le namonjy an’i Jaona tamy vavaranon’i Jordana teo mba hataony batisa.
14 Fe ta ho nisaka azy Jaona ka nivola hoe: “Zaho ro tokony hataonao batisa, ka iha koa va ro mamonjy ahy?”
15 Le hoy ty navalin’i Jesosy azy: “Anovo avao tse, fa zay ro ahafahantsika manatanteraky ze raha iaby tea-Ndranahary hatao.”* Le tsy nisaka azy sasy Jaona.
16 Laha vo nivita batisa Jesosy, le niboaky baka anaty rano ao. Le ingy lanitsy iny nivoha, ka nihitan’i Jaona ty fanahi-Ndranahary nijotso manahaky pizon tanabon’i Jesosy teo.
17 Le nisy feo koa baka an-danitsy any nivola hoe: “Anako teako io, sady mahafalifaly ahy.”
Fanamariha ambany pejy
^ Na: “liomonton’i.”
^ Na: “liomonto.”
^ Abt: “Volon-drameva.”
^ Abt: “tantely baka an’ala.” Maminy iny resahy eto io fa tsy bibikely iny.
^ Na: “Najobony; Nalentiny; Naepony.”
^ Abt: “Mamokara voa mampiseho fibebaha.”
^ Na: “tsatsango.”
^ Na: “ze raha marina.”
