Nisoratin’i Matio 8:1-34
8 Lafa nijotso baka am-bohitsy eny ie, le nisy olo maro nanaraky azy.
2 Le ingy nisy lahilahy boka namonjy azy, le niankohoky taminy teo sady nivola hoe: “Tompo, laha mba teanao ty hanadio ahy, le ho vitanao zay.”
3 Le naampatsin’i Jesosy ty tanany, ka nikasiky azy ie sady nivola hoe: “Tena teako zay! Hataoko malio iha.” Avy le niafaky ty habokàny, le nalio ie.
4 Bakeo nivola Jesosy hoe: “Ao iha tsy hivolambola amin’olo, fa ndany miseho amy mpisoro any, le ameo ty fanomeza nivolanin’i Mosesy hoe tokony hamea, mba ho hitan-drozy hoe fa niafaky ty aretinao.”
5 Lafa nilitsy ta Kapernaomy tao Jesosy, le nisy sefon’ny maramila namonjy azy le nisoloho taminy
6 hoe: “Azafady lahy! Mandry an-trano ao mpanompoko zay fa kombo. Tena mijaly ie.”
7 Le hoy Jesosy taminy: “Hafahiko aretiny zay lafa avy any aho.”
8 Fe hoy sefon’ny maramila iny: “Tsy maeva handramby anao an-tranoko any lahy aho, fa mivolana avao le ho afaky aretin’ny mpanompoko iny.
9 Tsy zay fa zaho koa mba ambany fahefàn’olo sady mana maramila ambany fahefàko. Ka laha mivola amy maramilako raiky aho hoe: ‘Mandehana!’, le lasa ie, na amy ty raiky koa hoe: ‘Avia!’, le avy ie, na amy mpanompoko hoe: ‘Anovo toy!’, le ataony raha zay.”
10 Nitseriky Jesosy lafa naharè ani-zay, ka nivola tamin’olo nanaraky azy rey hoe: “Ambarako anareo mazava fa mbo tsy nahita Israelita nana finoa bevata manahaky ani-zay aho.
11 Ambarako anareo fa ho maro ty olo ho avy baka antinana noho baka andrefa any, le hangalaky pilasy* amy latabo misy an’i Abrahama noho Isaka noho Jakoba amy Fanjakàn’ny lanitsy ao.
12 Fa ty anan’ny Fanjakà iny hatoraky amy maìky amonto any. Any rozy ro hitàny noho hangìtsy.”*
13 Le hoy Jesosy tamy sefon’ny maramila iny: “Mandehana moa! Enganè ho tanteraky raha nangatahinao zay satria manam-pinoa iha!” Avy le niafaky ty aretin’ny mpanompo iny.
14 Lafa nilitsy tan-tranon’i Petera tao Jesosy, le nihitany nandry am-pandrea ty rafozambavin’i Petera satria nisiloky.*
15 Nitsapàn’i Jesosy amy zay tanan’ny njarahy iny, le niafaky aretiny iny. Le niongaky ie, bakeo nikarakara hany ho an’i Jesosy.
16 Lafa nihariva ty andro, le nimaro ty olo nisy demonia nandesy tamy Jesosy teo. Nivola avao ie le niboaky ty fanahy raty. Le nafahiny iaby ty aretini-ze narary.
17 Nitanteraky zany raha nampivolany an’i Isaia mpaminany iny hoe: “Nanafaky ty aretinay ie sady nanday ty raha mahararirary anay.”
18 Lafa nihitan’i Jesosy fa nisy vahoaky nanodidy azy, le nampandehaniny tampita eny ty mpianatsiny.
19 Le nisy mpanora-dalàna namonjy azy ka nivola taminy hoe: “Mpampianatsy e, hanaraky anao aho ndre aia ndre aia hombanao.”
20 Fe hoy Jesosy: “Mana lavaky hisitriha ty amboanala, le mana ty tranony ty voro mitily, fa ty Anak’olo tsy mba mana ze hametrahany ty lohany.”
21 Nisy mpianatsy hafa koa nivola taminy hoe: “Engao tse aho Tompo handeha handevy an’ny babako.”
22 Hoy Jesosy taminy: “Manaraha ahy avao, fa engao ty maty handevy ty maty.”
23 Le niakatsy tanaty laka Jesosy, le nanaraky azy ty mpianatsiny.
24 Lasa narè biby tsioky iny tan-driaky eny, le narè koa ty lozoky ka nifeno rano laka iny. Fe niroro Jesosy tamy zay.
25 Farany namonjy azy rozy le namoha azy sady nivola hoe: “Tompo e, vonjeo fa ho maty tsika!”
26 Fe hoy ty asany tamin-drozy: “Manino nareo mavaka raty io?* Aia ty finoanareo?” Bakeo nitsanga ie, le nitrivotiny tsioky noho riaky iny, ka lasa nikalma soa ty andro.
27 Le nitseriky rozy ka nivola hoe: “Ia marina olo toy io? Fa ndre ty tsioky noho ty riaky aza maneky azy.”
28 Lafa niavy tampita eny ie, tamy faritsy nisy an’i Gadareanina reo teny, le nitojiky lahilahy roe nisy demonia. Nipotìtsy baka an-dolo eny rozy roe lahy. Farani-ze nampatahotsy rozy ka tsy nisy nahasaky nandalo mbamy lala iny mbeo.
29 Le nikorakoraky rozy hoe: “Ino ankadalananao anay atoy io* Anaki-Ndranahary? Niavy atoy va iha mba hampijaly anay alohan’ny fotoa?”
30 Nisy kosò maro biby nihina ta lavidavitsy teny.
31 Le nisoloho taminy demonia rey hoe: “Laha aboakinao zahay, le mba alefaso amy kosò reroy ao.”
32 Le hoy ty asany: “Ndany!” Le niboaky rozy ka nilitsy tamy kosò rey. Le ndrey kosò rey namoko ty lay nana an-teva* any, le nilatsaky tan-driaky any ka nimaty an-drano.
33 Nilay nana an-tanà any mpiamby kosò rey, le nitantaranin-drozy iaby ze raha niseho, anatini-zay ty mikasiky an’ny lahilahy nisy demonia rey.
34 Le niboaky hitsena an’i Jesosy ty olo iaby tan-tanà ao. Lafa nihitan-drozy Jesosy, le nangatahin-drozy mba hiala tamy faritsy iny.
Fanamariha ambany pejy
^ Abt: “handry mihorira.”
^ Zany hoe hangìtsy satria ho meloky noho kivy tanteraky.
^ Na: “nafana sandry.”
^ Na: “Ino mampitempo anareo io?”
^ Na: “Misy raha iharoanay aminao va.”
^ Na: “amy kintsỳ.”
