Nisoratin’i Matio 9:1-38
9 Farany niondra laka ie ka nandeha ampita eny, le nilitsy amy tanà nipetrahany iny ao.
2 Le ingy fa nisy lahilahy raiky kombo nandesin’olo am-pandrea taminy teo. Lafa nihitan’i Jesosy hoe nanam-pinoa rozy, le hoy ty asany tamy lahilahy kombo iny: “Mahereza anako! Fa nengà ty hadisoanao.”
3 Le nieritseritsy ty mpanora-dalàna sisany hoe: “Mivaza a-Ndranahary lahilahy tỳ.”
4 Nihain’i Jesosy ty eritseritsin-drozy ka hoy ty asany: “Manino nareo raty say ho zao io?
5 Aia, ohatsy, ty mora kokoa: Ty mivola hoe: ‘Fa nengà ty hadisoanao’, sa hoe: ‘Mitsangàna le mandehana’?
6 Fe mba hahaizanareo hoe mana fahefà hanenga hadisoa an-tany etoy ty Anak’olo...” Le hoy ty asany tamy lahilahy kombo iny: “Mitsangàna, andeso fandreanao io le ndany moly.”
7 Le nitsanga lahilahy iny ka nandeha noly.
8 Nitseriky biby* vahoaky rey lafa nahita ani-zay ka nanome voninahitsy a-Ndranahary, satria ie ro nanome an’ny fahefà zay ho ahi-ty olo.
9 Lafa niala teo Jesosy, le nahita lahilahy raiky kaihy hoe Matio, nipetraky tamy birò famoria hetra teo. Le hoy ty asany taminy: “Ndao hanara-dia ahy.” Le nitsanga Matio ka nanaraky azy.
10 Tafarani-zay, lafa nihina* tan-trano ao Jesosy noho mpianatsiny rey, le nisy mpitaky hetra noho mpanota maro niavy tao, le niaraky nihina* tamin-drozy.
11 Fe lafa nahita ani-zay Fariseo rey, le nivola tamy mpianatsin’i Jesosy rey hoe: “Manino mpampianatsy anareo io ro miaraky mihina amy mpitaky hetra noho mpanota?”
12 Niren’i Jesosy raha zay ka hoy ty asany: “Tsy mila dokotera ty olo salama fa ty marary ro mila ani-zay.
13 Ndany le eritsereto soa ty dikan’ny hoe: ‘Aleoko olo miferinay olo, tozay olo manao soro.’ Satria tsy avy hikaiky ty olo marina aho, fa hikaiky ty mpanota.”
14 Bakeo niavy taminy teo ty mpianatsin’i Jaona ka nanontany hoe: “Manino va zahay noho Fariseo reo mifaly hany matetiky io, kanefa mpianatsinao reo tsy mifaly hany?”
15 Le hoy Jesosy tamin-drozy: “Tsy misy antony tokony hampalahelo ty naman’ny mpampakatsy, laha mbo miaraky amin-drozy eo mpampakatsy iny. Fe ndraiky andro any, le tsy hiaraky amin-drozy eo sasy* mpampakatsy iny, ka amy fotoa zay rozy vo hifaly hany.
16 Tsy tampenan’olo amy tapa-damba vaovao ty siky* fa ho momoky, satria hosintonin’ny tapa-damba iny siky iny, le hirirotsy ka vomaiky hihatataky.
17 Tsy ataon’olo anaty angozy* fa ho momoky koa ty divay vaovao, tsy no ho driatsy angozy iny, ka ho jia divay iny, le ho simba angozy iny. Atao anaty angozy vaovao zany ty divay vaovao, le samby tsy simba ndre angozy iny ndre divay iny.”
18 Mbo tsy tampitsy iaby safàny iny, le nisy mpiandraikitsy synagoga namonjy azy, ka niankohoky taminy teo sady nivola hoe: “Mety fa maty vasa zay anakampelako iny. Ndao lahy ho aminay any, le ametraho tana ie mba ho velo!”
19 Le nitsanga Jesosy, ka nanaraky an’ny lahilahy iny rozy amy mpianatsiny rey.
20 Ingy koa nisy ampela raiky tena nijaly satria nandeha lio tanatin’ny 12 tao. Namonjy an’i Jesosy baka afara ao ie, le nikasiky ty ramborambony amy sikin’i Jesosy,*
21 satria nieritseritsy ie hoe: “Ndre mikasiky an’ny sikiny* iny avao aho, le ho afaky ty aretiko.”
22 Le nitoliky Jesosy ka nahita azy, le nivola hoe: “Ka matahotsy anako! Ty finoanao ro nahafaky an’ny aretinao iny.” Avy le niafaky ty aretin’ny ampela iny tamy fotoa zay.
23 Lafa niavy tamy tranon’ny mpiandraikitsy synagoga iny tao Jesosy, le nahita olo nitsoky sody noho vahoaky nitabataba.
24 Le hoy ty asany: “Ndany nareo miboaky! Tsy maty ajà ampela io fa miroro.” Le nihehezan-drozy ie.
25 Laha vo niboaky amonto any olo rey, le nilitsy ie ka nirambesiny ty tanan’ajà ampela iny, le nitsanga ajà iny.
26 Le niparitaky* tamy faritsy iny ty resaky mikasiky an’ny raha zay.
27 Lafa niala teo Jesosy, le nisy jiky roe lahy nanaraky azy sady nikaikaiky hoe: “Mba ferineso lahy zahay, Anan’i Davida!”
28 Lafa nilitsy an-trano ao Jesosy, le namonjy azy lahilahy jiky rey ka nanontaneany hoe: “Mino va nareo fa vitako zay?” Le hoy ty asan-drozy: “Eka, Tompo.”
29 Bakeo nikasihiny ty mason-drozy, le hoy ty asany: “Hahita ty masonareo satria manam-pinoa nareo!”
30 Le lasa nahita ty mason-drozy. Fe namepetsy an-drozy Jesosy hoe: “Ao tsy no hisy hahay raha nataoko aminareo zao!”
31 Fe lafa niboaky baka amy trano iny ao rozy, le nitantaranin-drozy tamy faritsy iny iaby ty mikasiky azy.
32 Lafa nandeha rozy, le ingy nisy lahilahy raiky moa noho nisy demonia nandesin’olo taminy teo.
33 Nivola lahilahy moa iny lafa naboaky demonia iny. Nitseriky ty vahoaky ka nivola hoe: “Mbo tsy nisy nanahaky ani-zao mihintsy tamy Israely teto.”
34 Fe hoy ty Fariseo: “Sefon’ny demonia* iny ahavitany mandroaky demonia io.”
35 Le nandeha Jesosy ka nitety ty tanà iaby, ndre tanà kelikely ndre tanàmbe, ka nampianatsy tamy synagoga any noho nitory ty vaovao soan’ny Fanjakà iny. Nafahiny koa ty karazan’arety iaby.
36 Lafa nihitany vahoaky rey, le niferinesany, satria nihitany hoe nampijalỳ rozy sady tsy nisy mpidary manahaky aondry tsy misy mpiaraky rey.
37 Le hoy ty asany tamy mpianatsiny rey: “Tena maro ty vokatsy fa ty mpiasa ro tsy ampy,
38 ka angataho Tompon’ny vokatsy iny mba haniraky mpiasa hamory an’ny vokatsy reo.”
Fanamariha ambany pejy
^ Na: “Natahotsy marè.”
^ Na: “nandry nihorira tamy latabo.”
^ Na: “nandry nihorira an-databo.”
^ Abt: “halà amin-drozy eo.”
^ Abt: “siky ivelany.”
^ Fanajaria divay namboary tamy angozy.
^ Abt: “sikin’i Jesosy ivelany etoy.”
^ Abt: “sikiny ivelany.”
^ Na: “nalaza.”
^ Zany hoe ty Devoly.
