Tantara 3

Ty Lahilahy Noho Ampela Voalohane

INO ty raha hafa amy sary toy eto? Misy olo ty eto. Reo ty lahilahy noho ampela voalohane, Adama noho Eva ro nikaìha an-droze. Ia ty nanao an-droze? Andranahare. Hainao va ty anarane? Jehovah.

Ho’zao ty fomba nanamboaran’i Jehovah Andranahare an’i Adama. Nangalake lemboke baka amy tany ie ka namboarine ho vatan’olo, le vatan-dahilahy. Nasiane fofonay ty oro lahilahy io, ka le nivelo Adama.

Nisy asa namean’i Jehovah Andranahare an’i Adama. Nivòla tamin’i Adama ie mba hanome anara ty karazam-biby iaby. Mety fa tanaty fotoa maro ro nandinìhan’i Adama biby reo, ka le nihaine soa ty nanome anara ho an-droze iaby. Tamin’i Adama nanome anara biby reo le nisy raha nihitane. Hainao va hoe ino raha zay?

Nana valy iaby ty biby. Nisy baba elefanta noho neny elefanta, voho nisy baba liona noho neny liona. Fe Adama tsy nana ty valine. Ka nataon’i Jehovah niroro bibike Adama, le nangalàne ty nofotse tamy taòlan-tahezane. Ka tamy taòlan-taheza io ro nanamboaran’i Jehovah ampela ho an’i Adama, le nanjary valine.

Faly bibike Adama henany zao! Diniho koa ty hafalian’i Eva laha fa napetrake noho niay tamy zariday soasoa io tao! Henany zao roze le afake manan’anake noho miarake miay anaty fahasambàra.

Nirìn’i Jehovah hiay mandrakizay Adama noho Eva. Teane kea ty hikarakaràn-droze ty tany manontolo ho soa bibike manahake zariday Edena io. Azo antoke fa le nahafaly an’i Adama noho Eva ty nieritseritse asa soa hataon-droze zay! Ka laha iha ro tamy pilasine, tsy ho nahafaly anao kea va ty hanamboatse ty tany ho zariday soa bibike? Fe tsy naharitse ty fahasambàran’i Adama noho Eva. Ndao ho henteantsika hoe ino ty antone.

Salamo 83:18; Genesisy 1:26-31; 2:7-25.