Tantara 41

Bibilava Saba

LAHA ty fanenteanao aze, mbo velo va bibilava mihodidy amy hazo eo io? Aha, namboary tamy saba bibilava io. Nivòla tamin’i Mosesy Jehovah mba hametake bibilava io tamy hazo zay teo, soa ho velo ze olo manenty azy. Fa aze sasane amy tany eo reo ro bibilava mbo velo. Nanehitse sady nanday arete ho ahin’olo raha reo. Hainao va hoe ino ty antone?

Satria nanohitse an’Andranahare noho Mosesy tami’ty resake nataon-droze Israelita reo. Hoy ty asan-droze: ‘Ino ty antone nangalànao anay baka Ejipta ane, soa ho maty an-tany efitsy atoy io? Tsy misy hany ty eto no sady tsy misy rano iaby; zahay fa entsake mana retoa, ka fa tsy mahefa mihina sasy.’

Tamy fahagagà ro nanomezan’i Jehovah an-droze mana io, midika zay fa hany soa raha io. Manahake zay kea, fa fahagagà avao ro nanomezane rano an-droze. Fe tsy nahatiaro ty fomba nikarakarà-Ndranahare an-droze Israelita reo. Nandefa bibilava misy poìzy Jehovah mba hanasazỳ an-droze. Nanehitse an-droze bibilava reo, ka maro ty nimaty.

Nanontany an’i Mosesy ty olo tamy farane ka nivòla hoe: ‘Nanota zahay, satria nanohitse anareo noho Jehovah tami’ty resake nataonay. Ka mba mivavàha amin’i Jehovah soa halàny bibilava reo.’

Nivavake ho ahin’olo reo Mosesy, ka zay ty antone nampanamboaran’i Jehovah aze bibilava saba io. Novolànine Mosesy mba hametake aze tamy hazo teny, ka ze voahehitse le tokone hanenty raha io. Notanterahine iaby ze raha novolàni-Ndranahare tamine. Ka ze olo nivoahehitse ka nanenty bibilava io, le tsy narare sasy.

Misy fianara azontsika baka amy tantara io. Tsika iaby, le mitovy amin’Israelita noheherim-bibilava. Manahake olo fa ho maty io tsika henany zao. Henteo ty manodidy anao, fa mihaantitse ty olo, marare, bakeo maty. Mahavoa antsika raha reo, satria tsy nanorike ty safà-Ndranahare Adama noho Eva, rae amin-drenentsika voalohane. Anan-droze tsika ka nifindra tamintsika kea raha zay. Fe nisy raha hafa nataon’i Jehovah mba hahazoantsika fiaìna mandrakizay.

Nalefan’i Jehovah ho an-tany etoy Jesosy Kristy, Anane iny. Maro ty nieritseritse fa olo raty fanahy Jesosy, ka nofantsìhy tamy tsato-kazo raike zay teo ie. Fe, laha ty marina, nanome antsika an’i Jesosy Jehovah mba hanavòta antsika. Laha mandinike noho manorike ty raha nataone tsika, le hahazo ty fiaìna mandrakizay. Fe mbo hianatse raha maro mikasike aze tsika laha fa afarafara ao.

Nomery 21:4-9; Jaona 3:14, 15.