Tantara 90

Jesosy Noho Ampela Samaritana Iny

VOZAKE Jesosy, ka nipetrapetrake tanila vovo raike ta-Samaria tao zay. Nandeha nivìly hany an-tanà ane mpianatsine reny. Hangalake rano ampela miresake amin’i Jesosy eo io. Hoy ty asan’i Jesosy tamin’ampela io: ‘Mba ameo rano aho.’

Nitserike biby ampela iny. Hainao va hoe ino ty antone? Satria Jiosy Jesosy, voho Samaritana ampela io. Maro ty Jiosy tsy tea Samaritana. Azo antoke fa tsy hiresake amy Samaritana mihitsy roze! Fe tea ty karazan’olo iaby Jesosy. Ka hoy ty asane: ‘Laha hainao olo mangatake rano aminao henany toy, le iha ro ho nangatake rano tamine, ka hameane anao ty rano manome fiaìna.’

Hoy ty asan’ampela iny hoe: ‘Lalike biby lahy vovo toy, sady iha aza tsy mana sihô iaby. Baka aìa ro hahazòanao rano manome fiaìna zao?’

Namaly aze Jesosy hoe: ‘Mbo ho maran-drano avao iha laha minon-drano baka amy vovo toy. Fa rano baka amiko zay le ahazòa fiaìna mandrakizay.’

Hoy ty asan’ampela iny hoe: ‘Mba ameo amy rano volàninao zao lahy zaho, soa tsy haran-drano sasy! Sady ami’zay kea zaho tsy mila mantsàka rano amy vovo toy eto sasy.’

Nieritseritse ampela io fa, rano finòmy vatane rano noresahin’i Jesosy tamine io. Fe fahamarìna mikasike an’Andranahare noho ty Fanjakàne ro noresahin’i Jesosy. Mitovy amy rano manome fiaìna, fahamarìna io. Afake manome fiaìna mandrakizay ho ahi’ty olo raha zay.

Nivòla tamin’ampela io Jesosy hoe: ‘Ndahàna kaìho ane ty valinao, ka mimpolìa bakao nareo laha fa bakeo.’

‘Tsy manambaly aho’, hoy ty asan’ampela iny.

‘Marina safànao zay’, hoy Jesosy. ‘Fa nanambaly in-dimy iha, sady tsy valinao aze mipetrake miarake aminao ao henany zao io.’

Tserike biby ampela iny, satria marina iaby ty raha novolànin’i Jesosy tamine. Fomba manao akore ro nahaìzan’i Jesosy raha iaby rezay? Hain’i Jesosy iaby raha rezao, satria Irake nirahi-Ndranahare ho an-tany etoy ie. Andranahare ro nanambara tamine raha iaby reo. Niavy mpianatsin’i Jesosy reny tamy fotoa io, ka nitserike roze nanenty an’i Jesosy niresake tamin’ampela samaritana io.

Ino ty ianarantsika baka amy tantara io? Hitantsika teo fa, soa fanahy tamin’olo baka amy foko sankarazane Jesosy, ka tokone hanahake aze kea tsika. Tsy tokone hieritseritse tsika hoe, raty ty karazan’olo sasane. Tean’i Jesosy hahay mikasike ty fahamarìna mitarike ho amy fiaìna mandrakizay io ty olo iabiaby. Tokone haniry hanampy ty olo hianatse fahamarìna kea tsika.

Jaona 4:5-43; 17:3.