Naterake Tan-Tranon’aomby tao Jesosy
Tantara 85
Naterake Tan-Tranon’aomby tao Jesosy
HAINAO va anak’ajà kelikele io? Jesosy io. Vo naterake tan-tranon’aomby tao Jesosy. Tsy ty aomby avao ro napetrake tamy tranon’aomby tao, tamy fotoa io, fa nisy biby hafa kea. Tamy toera fasia akata ho hanin’aomby na ampondra na biby hafa teo, ro niterahan’i Maria an’i Jesosy. Fe nanino va Maria noho Josefa ro nipetrake tan-tranon’aomby tao io? Tsy toera natao hiteraha ty ao, sa tsy zay?
Eka, zay vatane. Fe zao ty antone nahavy an-droze tao io: Aogosto Kaisara ro mpitarike an’i Roma tamy fotoa io. Namoake didy ie, fa tokone handeha ho amy tany nahaterahane ane iaby ty olo kiraidraike mba hanoratse ty anaran-droze amy boki-mpanjakà ao. Ka, ta-Betlehema ane ro nahaterahan’i Josefa. Fe laha fa niavy tamy tanà io tao roze, le tsy nahita trano hipetràha. Zay ty antone nipetrahan-droze tamy tranom-biby tao io. Ka tamy andro niavian-droze io avao, ro niterahan’i Maria an’i Jesosy! Fe arake ty hitanao amy sary io, le tsy nanino mihitsy ajà iny.
Hitanao va mpiarake aondry niavy hanenty an’i Jesosy reo? Niarake ty aondrin-droze tan’ala tany mpiarake aondry reo, ndraike haly. Nisy hazavà tampoke nanazava an-droze teo. Anjele nazava io! Navàka biby mpiarake aondry reny. Fe hoy ty asan’anjele iny tamin-droze hoe: ‘Ka mavàka nareo! Misy vaovao soa hovolàniko aminareo toy. Terake a-Betlehema ane henany zao, Kristy Tompo. Hanavotse ty olo ie! Ho hitanareo mifòno sikin’ajà ie, sady miroro amy toera fihinànam-biby akata maitso eo.’ Tampotampoke teo, le nisy anjele maro niavy nidera an’Andranahare. Nandeha hanenty an’i Jesosy malaky mpiarake aondry reny, ka ndreo roze amy sary io nahita aze.
Hainao va ty antone nampiavake an’i Jesosy? Ia vatane Jesosy io? Tiaròvo soa fa niresake mikasike Ana-Ndranahare voalohane iny tsika, tamy tantara voalohane tamy boky toy ato. Niarake niasa tamin’i Jehovah Anane io. Nanamboatse ty lanitse noho ty tany miarake ami’ty raha iaby hitantsika zao roze. Ka tsy ia Ana-Ndranahare voalohane io, fa Jesosy!
Nalàn’i Jehovah baka an-danitse ane ty ain’i Jesosy, ka nafindrane tan-tròkin’i Maria tao. Nanomboke nitombo tsikelikele tan-tròkin’i Maria tao Jesosy, manahake ty fitomboan’ajà mbo an-tròn-drenine ao reny. Fe Ana-Ndranahare Jesosy. Naterake tan-tranon’aomby ta-Betlehema tao Jesosy tamy farane. Tsy hainao ami’zay va henany io hoe, nanino anjele reny ro falifale bibike laha fa nanambara tamin’olo fa naterake Jesosy?
