Fizarà 4

Mpanjakan’Israely Voalohane Zisiky amy Fanandevoza Ta-Babylona

Saoly ro mpanjaka voalohane tamin’Israely teo. Fe tsy neken’i Jehovah ho mpanjaka sasy ie, fa Davida ro nofilìne hisolo aze. Hianatse raha maro mikasike an’i Davida tsika. Tamin’i Davida mbo pamaraky, le naharesy an’i Goliata, lahilahy farane ze bevata bibike iny. Laha fa tafara atoy, le nialo aze Saoly Mpanjaka, ka nilay aze avao Davida. Fe, nisoloho aze mba tsy hanao raha raty, ampela soa mana anara hoe Abigaila zay.

Amy manarake tsika, le hianatse raha maro mikasike an’i Solomona, anake lahin’i Davida iny. Ie ro mpanjaka nisolo an’i Davida tamin’Israely teo. Samby nanjaka 40 tao iaby mpanjaka telo voalohane tamin’Israely teo reny. Laha fa nimaty Solomona, le nizara roe ty fanjakà. Nisy fanjakà avaratse, noho ty fanjakà antìmo.

Naharitse 275 tao taloha nandravà’ty Asyria aze ty fanjakà avaratse, nisy foko folo. Bakeo, 133 tao tafara atoy, le nirava kea ty fanjakà antìmo, nisy foko roe. Nandesy ho andevo ta-Babylona tany ty Israelita tamy fotoa io. Mitantara ty raha nisy tanaty 510 tao Fizarà FAHAEFATSE toy. Ho hitantsika fa mampatahotse ty raha niseho tamy fotoa reo.