Tantara 68

Ajà Lahilahy Roe, Nivelo Ndraike

LAHA ohatse ka maty iha, mety hanao akore lahy ty reninao laha velo ndraike iha? Ho falifale bibike ie! Fe, ty olo raike fa nimaty va le mbo ho velo ndraike? Fa nisy va raha manahake zay taloha tany?

Mba henteo moa lahilahy noho ampela voho anak’ajà io. Elia ty anara lahilahy io, mpaminany ie. Ampela fa maty valy baka Zarefata ane ampela io, voho anane ajà lahilahy io. Narary ajà io ndraike andro. Nanjeky biby aretine iny, ka nahafaty aze. Nivòla tamin’ampela io Elia hoe: ‘Ameo bakao ananao io.’

Nandesin’i Elia tamy trano anabo ao ajà iny, ka napetrane tanabo kitrely teo. Nivavake ie hoe: ‘Mba velòmo ndraike lahy ajà toy Jehovah.’ Nanomboke niay ajà iny! Nandesin’i Elia nijòtso tamy trano ambany ane ami’zay ajà iny, bakeo novolànine ampela iny hoe: ‘Henteo fa velo ndraike ananao toy!’ Ka zay ty antone maha falifale bibike renine io.

Nisy mpaminanin’i Jehovah raike hafa kea. Elisa ty anarane. Nanampy an’i Elia ty asane. Fe, namean’i Jehovah fahefà hanao fahagagà kea ie. Nandeha tamy tany atao hoe Sonema zay Elisa ndraike andro. Nisy ampela soa fanahy bibike tamine zay nipetrake tao. Niterake anake lahy, ampela io tafara atoy.

Nihabe ajà iny. Nandeha namonjy ty babane niasa tan-tonda eny ie, ndraike andro. Fe tampotampoke teo le nitaray ajà iny hoe: ‘Maharary bibike lohako zao!’ Nandesy tan-trano tany malaky ajà io. Fe maty ie laha fa niavy tan-tranon-droze tao. Nalahelo bibike ty renine! Avy le nila an’i Elisa malaky ie.

Laha fa niavy Elisa, le nandeha tamy trano nisy ajà maty iny tao ie. Nivavake tamin’i Jehovah ie, sady niroro tamy faty iny teo. Tsy ela, le nanjary nihanafana vatan’ajà lahilahy maty iny, bakeo nitsivé impito ie. Laha fa nilitse tan-trano tao ampela iny, le nifalifale bibike ie nahita anake lahine iny velo ndraike!

Maro biby ty olo fa nimaty. Malahelo bibike ty fianakavia noho ty naman-droze. Tsy afake mamelo ty maty tsika. Fa Jehovah raike avao ro afake manao raha zay. Mbo hianarantsika ty fomba hamelòman’i Jehovah ndraike, olo an-tapitrisane maro fa nimaty iaby reny.

1 Mpanjaka 17:8-24; 2 Mpanjaka 4:8-37.