Ndao hianarantsika ty mikasiky pamaraky raiky nanavotsy ty ain-drenilahiny. Apostoly Paoly renilahiny io. Tsy haintsika ty anara pamaraky io, fe haintsika hoe be herim-po ie. Teanao ho hay va ty raha nataony?...

Nigadra ta Jerosalema tao Paoly. Nisambory ie satria niresaky mikasiky Jesosy. Nisy lahilahy raty say maromaro nalay any Paoly, ka nanao tetiky raty. Nivola rozy hoe: ‘Ndao tsika hangataky maramila amy mpitari-tafiky any mba handay Paoly amy fitsarà any. Hivony mban-dala mbeny tsika, soa lafa mandalo mbeo rozy, le avy le hovonoantsika!

Nirè anakanabavy Paoly iny tetikin-drozy zay. Ino ty nataony? Nandeha tam-pigadrà any ie, le niresaky raha zay tamy Paoly. Avy le nirahy Paoly hiresaky tetiky zay amy mpitari-tafiky iny ie. Araky ty hevitsinao, mora tamy anakanabavy Paoly io va ty niresaky tamy mpitari-tafiky io?... Aha, satria manam-pahefà mpitari-tafiky io. Fe be herim-po anakanabavy Paoly io, ka niresaky tamy mpitari-tafiky iny.

Hay mpitari-tafiky io ty tokony hatao. Namory maramila fa ho 500 ie mba hiaro Paoly! Nivolaniny maramila reo handay Paoly a Kaisaria any lafa haly. Niavotsy avao va Paoly?... Zay, tsy afaky nanafiky azy lahilahy raty say rey! Tsy nivano tetikin-drozy iny.

Ino ty ianaranao baka amy tantara zay?... Afaky ho be herim-po manahaky anakanabavy Paoly io koa iha. Mila be herim-po tsika lafa miresaky aminolo mikasiky Jehovah. Ho be herim-po va iha, ka hiresaky mikasiky Jehovah?... Hanavotsy ainolo iha laha manao ho zay.