Araky ty hevitsinao, sarotsy va ty manao ty marina?.... Olo maro ro mieritseritsy ho zay. Volany ty Baiboly fa nisarotsy tamy ajà lahilahy raiky kaihy hoe Josia, ty nanao ty marina. Fe nana nama soa maro nanampy azy ie. Ndao hianarantsika ty mikasiky Josia noho namany reo.

Mpanjaka ta Joda tao ty baba Josia. Amona ty anarany. Olo raty fanahy Amona sady mpanompo sampy. Nanjary mpanjaka ta Joda tao Josia lafa nimaty babany. Kanefa mbo valo tao ie tamy zay! Araky ty hevitsinao, nanao raha raty nanahaky babany va Josia?... Aha, tsy nanao ho zay ie!

Ndre mbo nikelikely Josia, le fa ta hanoriky ty safà Jehovah. Zay ro nahavy azy hinama aminolo mivavaky amy Jehovah. Nanampy Josia hanao ty marina avao rozy. Ia iaby ty sisany amy nama Josia reo?

 Raiky tamy namany reo Zefania. Mpaminany Zefania io. Nanariny ty olo ta Joda ao hoe ho azon-doza rozy laha mbo manompo sampy. Nanoriky ty safà Zefania, Josia, ka tsy nanompo sampy, fa nivavaky tamy Jehovah.

Mbo raiky tamy nama Josia reo koa Jeremia. Nitovitovy tao rozy roe sady nifankariny tanà, ka niaraky be. Nipinama marè rozy, ka lafa nimaty Josia, le nanoratsy hira Jeremia mba hivolana ty alahelony. Nifanampy Jeremia noho Josia mba ho afaky hanao ty marina noho hanoriky ty safà Jehovah.

Ino ty ianaranao baka amy ty raha natao Josia?... Fa ta hanao ty marina avao Josia liany nahakelikely azy. Hainy fa tokony hinama aminolo mivavaky amy Jehovah ie. Minamà aminolo mivavaky amy Jehovah sady manampy anao hanao ty marina!