Mbo pamaraky Samoela, le fa nipetraky noho niasa tamy tranolay masy, azy pilasy fivavaha amy Jehovah iny. Hainao va hoe nanao akory ty niavia Samoela tao? Ndao hianarantsika tse ty mikasiky Hana, reny Samoela.

Fa naniry anaky fa ela Hana, fe tsy nimety teraky ie. Nivavaky noho nangataky tamy Jehovah ie mba hahazo anaky. Nampitamà ie fa laha teraky anakilahy, le halefany hipetraky noho hiasa amy tranolay any. Namaly ty vavakiny Jehovah, le niteraky anakilahy ie. Samoela ro nataony anarany. Lafa nifeno telo na efatsy tao Samoela, le nalefa Hana hanompo Jehovah amy tranolay any, araky ty fa nampitamaniny.

Ely ro mpisorobe tamy tranolay tao. Niasa tao koa ty anany roe lahy. Tiarovo, fa trano fivavaha amy Ndranahary tranolay io. Fa eritserety hoe manao raha soa iaby ty olo ao. Fe nanao raha raty marè anakilahy Ely reo. Nihita Samoela raha raty nataon-drozy zay. Nanao raha raty manahaky an-drozy koa va Samoela?... Aha, nanao ty marina avao ie satria nanoriky ty safà babany noho neniny.

Araky ty hevitsinao tokony ho natao Ely akory anany reo?... Tokony ho nisazìny rozy. Tsy tokony ho nengany hiasa amy trano Ndranahary tao sasy koa rozy. Fe tsy natao Ely raha zay, ka neloky taminy noho tamy anakilahiny rey Jehovah. Nahazo sazy baka amy Jehovah rozy.

Ndraiky haly, lafa niroro Samoela le nahare olo nikaiky hoe: ‘Samoela!’ Nilay tamy Ely tany ie, fe nivola Ely hoe: ‘Tsy nikaiky anao aho.’ Nimpoly indroe raha zay. Tamy fanintelony le nivola tamy Samoela Ely, fa laha mbo mahare kaiky zay ndraiky ie, le tokony hivola hoe: ‘Mivolana Jehovah, fa mijanjy anao aho.’ Zay ro natao Samoela. Nivola taminy Jehovah bakeo hoe: ‘Volano Ely fa hosazìko ty fianakaviany tamy ty raha raty nataon-drozy.’ Araky ty hevitsinao nimora tamy Samoela  va ty nanambara raha zay tamy Ely?... Aha, tsy nimora. Fe ndre navaka Samoela, le nivolaniny avao ty raha nampanovy Jehovah azy. Tanteraky raha nivolany Jehovah iny. Nimaty anakilahy Ely rey, bakeo nimaty koa Ely.

Modely soa ho ahintsika Samoela. Nanao ty marina avao ie ndre nanao raha raty aza ty olo manodidy azy. Manao akory koa ty aminao? Hanao manahaky Samoela va iha, ka hanao ty marina avao? Laha manao ho zay iha, le hampifalifaly Jehovah noho ty baba amy neninao.