Mora aminao va ty manoriky ty safà baba noho neninao?... Sarotsy ty manoriky safà ndraindraiky. Hainao va hoe nanoriky safà Jehovah, Jesosy, sady nanoriky ty safà babany noho neniny?... Lafa mianatsy mikasiky ty raha natao Jesosy iha, le ho hainao ty hanoriky ty safà baba noho neninao, ndre tsy mora aza raha zay. Ndao hianarantsika ty raha natao Jesosy.

Niaraky tamy Babany tan-danitsy any Jesosy taloha ty niaviany tan-tany etoy. Fe nanjary nana baba noho neny olombelo ie, lafa niavy etoy. Josefa noho Maria ty anaran-drozy. Hainao va hoe nanao akory ty nahavy an-drozy ho baba noho neny Jesosy?...

Nafindra Jehovah tan-kibo Maria ao ty ay Jesosy. Zay ro nahavy azy ho nateraky noho niay tan-tany etoy. Fahagagà raha zay! Nitombo tan-kibo Maria tao manahaky ty ajà mitombo an-kibon-dreniny ao Jesosy. Nateraky Jesosy lafa afaky sivy vola teo ho eo. Zay ro nahavy Maria noho Josefa hanjary baba noho neny Jesosy.

Tamy Jesosy 12 tao, le fa nisy raha nataony nampiseho fa teany Jehovah babany. Niseho raha zay lafa nandeha nanao Paska ta Jerosalema tany Jesosy noho ty fianakaviany. Fa an-dala holy Josefa noho Maria, ro tsy nahita hoe nimbaia Jesosy. Hainao va hoe taia ie?...

Nimpoly malaky ta Jerosalema any Josefa noho Maria, le nila azy mbao. Nisahira rozy satria tsy nihita Jesosy. Fe telo andro tafarany zay, le nihitan-drozy tamy tempoly tao ie! Hainao va hoe nanino Jesosy ro tamy tempoly tao?... Satria afaky nianatsy mikasiky Jehovah babany ie tao. Teany Jehovah, ka teany ho hay hoe manao akory ty hampifaleany azy. Nanoriky safà Jehovah avao Jesosy zisiky nahabe azy. Nanoriky ty safà Jehovah ie ndre nisarotsy taminy noho nahavy azy hijaly aza ty fanaova raha zay. Nanoriky ty safà Josefa noho Maria koa va Jesosy?... Zay, miresaky mikasiky raha zay ty Baiboly.

Ino ty ianaranao baka amy Jesosy?... Mila manoriky ty safà baba noho neninao iha ndre mety ho sarotsy aza raha zay. Hataonao va raha zay?...