Eritsereto moa hoe mipetraky a Jeriko any tsika. Amy tany Kanana any ty misy tanà Jeriko io. Tsy mivavaky amy Jehovah ty olo atoy. Misy ampela raiky mana anara Rahaba zay ty etoa.

Mbo nikelikely Rahaba, le fa nahay ty tantara Mosesy, tamy ie nampisaraky riaky mena iny, bakeo nitariky Israelita reo baka Ejipta any. Fa nireny koa hoe nampea Jehovah Israelita reo, le niresin-drozy ty olo nialy tamin-drozy. Rèny amy zay koa henanizao hoe manory fitaky mbanila Jeriko mbetoy Israelita reo!

Ndraiky hariva zay, nisy lahilahy Israelita roe nandeha ta Jeriko ao, hanentinenty tanà io. Mpisafo tany ty fikaiha an-drozy. Nampiliry Rahaba an-trano rozy lafa niavy aminy eo. Nihay ty mpanjaka ta Jeriko ao raha iny. Nireny hoe misy mpisafo tany ty an-tanà ao, le an-trano Rahaba ao rozy. Naniraky olo hanambotsy an-drozy ie. Fe navony Rahaba tanabo tranony ao mpisafo tany roe rey. Nivolaniny olo nirahy mpanjaka rey lafa niavy taminy ao hoe: ‘Tetoa rozy fe fa nandeha. Laha hianinareo rozy henanikio, le ho tratsinareo!’ Manino mpisafo tany reo ro narova Rahaba?... Satria mino Jehovah ie. Hainy fa hamea Jehovah Israelita reo tany Kanana io.

Taloha ty nandehanan-drozy, le nampitamà mpisafo tany rey fa ho avotsy Rahaba miaraky amy ty fianakaviany, lafa ravà Jeriko. Ino ty raha nampanovin-drozy Rahaba, laha hainao?... Nivola rozy hoe: ‘Ahantono an-dafonetinao etoa taly mena toy. Laha anovinao raha zay, le ho avotsy iaby ze olo an-tranonao atoa.’ Nanovy Rahaba raha zay. Nanao akory ty tohiny laha hainao?...

Niodikodiky tamy tanà Jeriko io Israelita reo, lafa afaky andro vitsivitsy. Niodiky indraiky sanandro tamy tanà io eo rozy, tanaty ty eninandro. Fe lafa niavy ty andro fahafito, le niodiky impito rozy, bakeo niaraky nikorakoraky marè biby. Nakopakopa Jehovah amy zay lakoro bevata manodidy tanà iny. Fe tsy nikopaky  trano misy taly mena mihanto an-dafonety eo iny! Hitanao amy sary eo va raha zay?... Avotsy Rahaba noho ty fianakaviany!

Ino ty ianaranao amy Rahaba?... Nanjary nino Jehovah, Rahaba, lafa nianatsy raha soa maro mikasiky azy. Mianatsy raha soa maro mikasiky Jehovah koa iha. Mino Jehovah manahaky Rahaba koa va iha?... Mino azy vatany iha!