Fa nisy olo nivola sekirè taminao va?... * Miresaky mikasiky sekirè raiky kaihy hoe “sekirè masy” ty Baiboly. Masy raha io satria baka amy Ndranahary, sady sekirè satria tsy nisy nahay. Ndre ty anjely aza ta ho nahay soa mikasiky raha io. Teanao ho hay va sekirè io?...

Fa ela biby taloha tany, le namoro ty lahilahy noho ampela voalohany Ndranahary. Adama noho Eva ty anaran-drozy. Napetrany tamy pilasy soasoa kaihy hoe zariday Edena rozy. Laha nanoriky ty safà Ndranahary Adama noho Eva, le ho niafaky nikarakara tany toy hanjary paradisa mitovy amy zariday io rozy miaraky amy ty anany. Ho nivelo tamy Paradisa ao zisiky farany koa rozy. Fe tiaronao va ty raha natao Adama noho Eva?...

Tsy mipetraky amy paradisa tsika henanizao satria tsy nanoriky ty safà Ndranahary Adama noho Eva. Fe nivola Ndranahary fa hataony soasoa ndraiky tany toy, sady ho velo zisiky farany noho ho falifaly ty olo iaby. Manao akory ty hanaovany raha zay? Fa fa ela raha zay ro tsy nisy mpahay satria sekirè.

Nampianatsy raha maro mikasiky sekirè io Jesosy lafa tan-tany etoy. Mikasiky ty Fanjakà Ndranahary raha io hoy ty asany. Nampirisihiny hivavaky mba hiavia Fanjakà io ty olo. Hanova tany toy ho paradisa soasoa Fanjakà io.

Falifaly va iha mahay sekirè io?... Tiarovo fa ze olo manoriky safà Jehovah avao ro hipetraky amy Paradisa ao. Miresaky mikasiky lahilahy noho ampela maro nanoriky safà Jehovah ty Baiboly. Teanao va ty hahay mikasiky an-drozy?... Ndao henteantsika ty ilany amin-drozy noho ty fomba hanahafantsika an-drozy.