Ampela tea a Ndranahary Rebeka. Isaka ty anara valiny. Tea any Jehovah koa Isaka. Nanao akory ty nifankahità Rebeka noho Isaka? Ino ty ahaizantsika hoe ta hampifalifaly Jehovah vatany Rebeka? Ndao tsika hianatsy mikasiky azy.

Abrahama noho Saraha ty anara baba noho neny Isaka. Nipetraky ta Kanana any rozy. Tsy nanompo Jehovah ty olo amy tanà io ao. Kanefa olo manompo Jehovah ro tea Abrahama ho valy anakilahiny io. Farany nirahiny handeha a Harana any Eliezera mpanompony, mba hila valy ho ahy Isaka. Misy longo Abrahama, mipetraky amy tanà io any.

Nandeha Eliezera. Niaraky taminy koa ty mpanompo Abrahama sisany. Lia lavitsy nataon-drozy io. Nanday rameva folo rozy, miaraky amy hany noho fanomeza maro. Ino ty natao Eliezera mba hahaizany mifily ty ho valy Isaka? Nijano tamy vovo raiky zay teo Eliezera noho namany rey lafa niavy ta Harana ao. Hay Eliezera fa tsy maintsy hisy mpantsaka ho avy ty eo. Nivavaky tamy Jehovah ie hoe: ‘Ze ampela angatahako rano ka manome ahy noho ramevako reo koa, le ho haiko fa zay ro ampela voafilinao.’

Niavy tamy vovo io teo Rebeka. Mivola ty Baiboly fa ampela soa biby ie. Nangataky rano taminy Eliezera, le hoy ty  asany: ‘Eka, hameako rano iha, le ramevanao reo koa.’ Mba diniho moa! Mahalany rano maro rameva reo, ka tsy maintsy nimpolimpoly nilay tam-bovo teo Rebeka. Hitanao amy sary io va hoe miasa mafy ie?... Nahatseriky Eliezera ty fomba namalea Jehovah vavakiny iny.

Namea Eliezera fanomeza soasoa maro Rebeka. Nandesiny tamin-drozy any Eliezera noho mpanompo ilany rey. Nivolany Eliezera ty iraky nampanovy Abrahama azy. Nitantaràniny koa ty fomba namalea Jehovah ty vavakiny. Nifalifaly fianakavia Rebeka reo, ka namean-drozy ho valy Isaka, Rebeka.

Naneky ho valy Isaka va Rebeka?... Hay Rebeka fa Jehovah ro naniraky Eliezera. Ka lafa nanontany azy fianakaviany reo hoe handeha a Kanana any mba ho valy Isaka va ie, le namaly ie hoe: ‘Eka, handeha aho.’ Niaraky amy Eliezera ho a Kanana any Rebeka, le nanjary valy Isaka lafa niavy any.

Nanao ze raha nampanovy Jehovah, Rebeka, le nahazo raha soa baka aminy. Nanjary razambe Jesosy ie lafa tafara atoy! Hitahy anao koa Jehovah laha mampifalifaly azy manahaky Rebeka iha.