Ino ty ataonao lafa mavaka iha?... Mety hila fanampea amy baba noho neninao iha. Fe misy olo hafa afaky manampy anao koa. Tsy misy mahery mandilatsy azy ndre raiky. Hainao va ie?... Zay, Jehovah Ndranahary. Ndao tsika hiresaky mikasiky pamaraky raiky amy Baiboly ao, kaihy hoe Davida. Tsy navaka ie, satria hainy fa hanampy azy avao Jehovah.

Nampianary ty babany noho neniny ho tea Jehovah, Davida, tamy ie mbo nikely. Zay ro nahavy Davida tsy havaka ndre nahita raha nampatahotsy aza. Hainy fa hanampy azy Jehovah, satria Namany. Ndraiky andro, lafa niaraky aondry Davida, le nisy liona bevata raiky nangalaky ty raiky amy aondriny reo! Hainao va hoe ino ty raha natao Davida? Nihianiny liona iny bakeo nivonoany! Nisy orsa koa nanafiky aondry Davida reo tafarany zay. Fe nivonoany orsa iny! Araky ty hevitsinao, ia ro nanampy Davida?... Zay, Jehovah.

Mbo nibe herim-po avao koa Davida tafarany zay. Nialy tamy Filistinina reo ty Israelita tamy zay. Be noho abo ty raiky amy maramila Filistinina reo. Goliata ty anarany. Nikizaky Jehovah noho ty maramila Israelita, lahilahy bevata biby io. Nitao maramila Israelita reo hialy aminy ie. Fe navaka azy iaby Israelita reo, ka tsy nisy nahasaky. Lafa nirè Davida raha zay, le nivola tamy Goliata ie hoe: ‘Hialy aminao aho! Hampea Jehovah aho, le ho resiko iha!’ Araky ty hevitsinao, nibe herim-po va Davida?... Zay, nibe herim-po ie. Hainao va hoe ino ty niseho lafa bakeo?

Nirambesy Davida pilatsiny iny miaraky amy vato kaliso limy, le nandeha nialy amy lahilahy bevata biby iny ie. Lafa nihita Goliata hoe mbo pamaraky loatsy Davida, le nikizahiny. Fe nivola taminy Davida hoe: ‘Iha mamonjy ahy amy sabatsy, fa zaho mamonjy anao amy anara Jehovah!’ Bakeo nasiany vato pilatsiny iny, le nilay namonjy Goliata ie, sady nalefany pilatsy iny. Nivoa vato iny tan-kandriny teo Goliata! Nilavo lahilahy bevata biby iny, le nimaty! Navaka Filistinina  rey, le namoko ty lay. Manino Davida ro nahavita nandresy olo bevata biby iny, kanefa ie mbo pamaraky kelikely?... Nanampy azy Jehovah. Mana hery mandilatsy olo bevata io ie!

Ino ty ianaranao baka amy ty tantara Davida?... Tsy misy mahery mandilatsy Jehovah. Namanao ie. Ka lafa mavaka iha, le ka halino fa afaky manampy anao ho be herim-po Jehovah!