1. Manino tsika ro mila mianatsy mikasiky ty anjely?

MBA hahaiza olo raiky, le soa laha hay koa ty fianakaviany. Mitovy amy zay koa Jehovah Ndranahary. Hahay azy tsika, laha haintsika soa ty fianakaviany, tafilitsy amy zay ty anjely. Kaihy hoe “ana Ndranahary” rozy amy Baiboly ao. (Joba 38:7) Ino ty asa ataon-drozy amy fanatanteraha Ndranahary ty raha teany hatao? Nisy anjara nataon-drozy va tamy tantaran’olombelo? Misy heriny amy fiainanao va ty anjely? Laha eka, amy fomba akory?

2. Manao akory ty nampisy ty anjely? Firy ty isan-drozy?

² Voaresaky matetitetiky amy Baiboly ao ty anjely. Ndao hodinihintsika ty sisany, mba hahaizantsika soa an-drozy. Manao akory ty nampisy ty anjely? Hoy ty Kolosianina 1:16: “Ie [Jesosy Kristy] ro nampiasà tamy fomorona ty raha iaby an-danitsy any noho an-tany etoy.” Midika zay, fa nampiasà Jehovah Ndranahary mba hamoròna ty anjely kiraidraiky, Anakiny talanolo io. Firy anjely reo? Mivola ty Baiboly fa an-jatony tapitrisa ty anjely niforony, sady samby mahery iaby rozy iaby.—Salamo 103:20. *

3. Ino ty volany amy Joba 38:4-7 ao mikasiky ty anjely?

 ³ Mivola ty Baiboly fa “nifalifaly iaby ty ana Ndranahary”, lafa niforony ty tany. (Joba 38:4-7) Fa nisy taloha ty namorona ty olo ty anjely, ndre tany toy aza mbo niforony tafarany. Hita amy andinin-teny io koa fa mana fihetseham-po ty anjely, satria volaniny eo hoe “nifalifaly iaby” rozy. Henteo soa fa niaraky falifaly “iaby ty ana Ndranahary.” Midika zay, fa niaraky nanompo any Jehovah Ndranahary iaby ty anjely tamy fotoa zay.

4. Manao akory ty ampisehoa ty Baiboly fa tea ty anjely ho hay ty raha ataon’olo?

⁴ Laha vo niforony ty olombelo, le fa nitea ty anjely tsy mivaliky ty hahay mikasiky ty fiainan-drozy noho ty fahatanteraha ty raha tea Ndranahary hatao. (Ohabolana 8:30, 31; 1 Petera 1:11, 12) Fe lafa nandeha ty fotoa, le nihita ty anjely, fa maro ty olo nanjary tsy nanompo Jehovah, azy mpamoro be fitiava iny. Azo antoky, fa nalahelo anjely tsy mivaliky reo nahita raha zay. Fe ‘falifaly’ rozy lafa mahita olo mimpoly amy Jehovah, ndre olo raiky avao aza. (Lioka 15:10) Manao ze hahasoa ty mpanompo Ndranahary vatany ty anjely. Tsy mahatseriky laha mampiasa an-drozy matetitetiky Jehovah, mba hampahery noho hiaro ty mpanompony tsy mivaliky an-tany etoy. (Vakio Hebreo 1:7, 14.) Diniho ohatsy retoa.

5. Ino iaby ty ohatsy amy Baiboly ahità fa manampy vatany ty anjely?

⁵ Nisy anjely roe nanampy Lota, lahilahy marina, noho ty anakampelany, lafa niravà Sodoma noho Gomora, tanà feno olo raty fanahy. Nitariky an-drozy hiboaky baka amy tanà io ao anjely reo tamy zay. (Genesisy 19:15, 16) Tafara atoy, le natoraky tanaty lavaky misy liona Daniela mpaminany, fe tsy nisy raha nahazo azy. Hoy ty asany: “Naniraky ty anjeliny Ndranahariko, ka nampihily vava liona rey.”  (Daniela 6:22) Nisy anjely raiky nanavotsy apostoly Petera tam-pigadrà tao, tamy taonjato voalohany. (Asan’ny Apostoly 12:6-11) Nisy anjely koa nampahery any Jesosy, tamy ie vo nanomboky nanao ty fanompoany tan-tany etoy. (Marka 1:13) Lafa marìny ho nivonoa koa ie, le nisy anjely raiky niseho taminy sady “nampahery azy.” (Lioka 22:43) Azo antoky fa nampahery any Jesosy raha zay, tamy fotoa niavaky tamy fiainany reo!

6. a) Miaro ty vahoaky Ndranahary amin’ino ty anjely? b) Ino iaby ty fanontanea hodinihintsika?

⁶ Tsy miseho mivanta amy vahoaky Ndranahary an-tany etoy sasy ty anjely henanizao. Fe ndre tsy hita maso anjely mahery reo, le mbo miaro ty vahoaky Ndranahary avao. Arovany rozy amy ty raha mety hanimba ty finoan-drozy. Hoy ty Baiboly: “Ty Anjely Jehovah mipetraky manodidy, ze olo matahotsy Azy, le manavotsy azy.” (Salamo 34:7) Manino ro mampahery antsika raha zay? Satria misy anjely raty ta hamono antsika! Ia anjely raty reo? Baka aia rozy? Ino ty raha ataon-drozy mba hanisia raty antsika? Mba hamalea raha rezay, le hodinihintsika tse ty raha niseho tamy fanomboha ty tantaran’olombelo.

7. Ia iaby ro voafitaky Satana, le niala tamy Ndranahary?

⁷ Nianarantsika tamy Toko faha-3 tao, fa nanohitsy a Ndranahary ty anjely raiky satria ta hotompoe ie. Nanjary nikaihy hoe Satana Devoly anjely io. (Apokalypsy 12:9) Olo maro ro nampialany tamy Ndranahary, tanaty ty 1 600 tao teo ho eo, tafara ty namitahany any Eva. Fe nisy avao ty tsy nivaliky, tafilitsy amy zay ry Abela, Enoka noho Noa.—Hebreo 11:4, 5, 7.

8. a) Manao akory ro nahavy ty anjely sisany ho demonia? b) Voatery nanao ino ty demonia mba tsy ho ripaky tamy Ranobe tamy andro Noa?

⁸ Nisy anjely hafa koa nivaliky tamy Jehovah, tamy andro Noa. Nialàn-drozy ty fianakavia Ndranahary tan-danitsy  any, le nijotso tan-tany etoy rozy sady niova ho olombelo. Ino ty antony? Hoy ty Genesisy 6:2: “Nihita ana Ndranahary reo fa soa ty anakampelan’olo tan-tany etoy. Ka le nalan-drozy ho valy iaby ze finiliny.” Fe tsy nengà Ndranahary hanao manahaky zay avao anjely reo, sady tsy nengàny hitohy avao ty raha raty niazo baka amy raha zay. Nasiany Ranobe tany toy, mba handripaha ze kila olo nanao raty. Fe navotany ty mpanompony tsy nivaliky. (Genesisy 7:17, 23) Voatery niala tamy vatan’olombelo nananany anjely mpanohitsy reo, ka nimpoly tan-danitsy any ndraiky. Nanoriky any Devoly, azy nanjary “sefo ty demonia” iny rozy.—Matio 9:34.

9. a) Natao akory demonia reo lafa nimpoly tan-danitsy any? b) Ino ty raha hodinihintsika henanizao?

 ⁹ Tsy nekè ho fianakavia Ndranahary sasy anjely mpanohitsy reo, lafa nimpoly tan-danitsy any, manahaky Satana sefon-drozy iny koa. (2 Petera 2:4) Tsy afaky nangalaky vatan’olombelo sasy rozy, fe mbo mitao olo hanao raha raty avao. Manampy any Satana ‘hamitaky ty tany iaby misy olo’ rozy. (Apokalypsy 12:9; 1 Jaona 5:19) Manao akory ty anaovany raha zay? Ty famitaha ro tetiky ampiasany marè. (Vakio 2 Korintianina 2:11.) Ndao handiniky vitsivitsy amy raha zay tsika.

10. Manao akory ty amitaha demonia reo ty olo?

¹⁰ Mampirisiky ty olo hifandramby aminy ty demonia, mba hamitahany an-drozy. Mety hifandramby aminy mivanta olo iny na mampiasa olo hafa. Fe rarà ty Baiboly iaby ze kila raha misy ifandrambesany amy fanahy raty na hery raty noho ty mifampiresaky aminy. (Galatianina 5:19-21) Manahaky aofa ampiasà mba hahazoa fia, fandriky reo. Mampiasa aofa sankarazany ty mpaminta, mba hahazoa fia sankarazany. Mampiasa fandriky sankarazany koa ty anjely raty, mba hamitaha olo samby hafa hifandramby aminy noho ho ambany fahefany.

11. Ino ty atao hoe sikily, le manino tsika ro tsy tokony hanao raha io?

¹¹ Fandriky raiky ampiasà demonia reo ty sikily. Ino ty atao hoe sikily? Tsy ino sikily zao, fa ty fiezaha hahay ty raha mbo hoavy na mbo tsy hay. Tafilitsy amy zay ty asan’ambiasa, ty fampiasà karata mba hahaiza ty raha hoavy, ty fanentea soritsy amy tana, ty fanentea andro, noho ty filà famantara amy nofy. Maro ty mieritseritsy hoe tsy mampanino ty manao raha zay. Fe mivola ty Baiboly fa miaraky miasa ty anjely raty noho ty mpisikily. Mivola, ohatsy, ty Asan’ny Apostoly 16:16-18, fa nisy ajà ampela raiky “nahay  naminany”, satria nisy “demonia mpivola ty hoavy.” Fe tsy nahay naminany sasy ajà ampela io lafa niroasy baka aminy ao demonia iny.

12. Manino ro mahavoan-doza ty miezaky hifandramby amy maty?

¹² Mampirisiky ty olo hanontany amy maty koa ty demonia, mba hamitaha an-drozy. Maro ty olo maty longo ro voafitaky satria diso hevitsy mikasiky ty longony fa nimaty. Mety hanambara hafatsy manoka ty mpisikily, na hangala-tahaky feon’olo fa nimaty iny. Zay ro mahavy ty olo maro hino hoe, mbo velo ty maty, sady afaky manampy azy hiaritsy fijalea ty fifandrambesa aminy. Fe “fampahereza” vandivandy raha zay sady mahavoan-doza. Manino tsika ro mivola raha zay? Satria mahavita mangala-tahaky feon’olo fa nimaty ty demonia, sady afaky mivola raha mikasiky olo fa nimaty ty mpisikily. (1 Samoela 28:3-19) Nianarantsika tamy Toko faha-6 tao koa, fa tsy misy sasy ty olo lafa maty. (Salamo 115:17) Voafitaky ty anjely raty ty olo “mpanontany amy maty”, sady manao raha mifanohitsy amy ty sitrapo  Ndranahary. (Vakio Deoteronomia 18:10, 11; Isaia 8:19) Manaova soa avao iha, tsy no ho voafitaky ty aofa ampiasà ty demonia.

13. Afaky tamin’ino ty olo natahotsy demonia?

¹³ Tsy hoe mamitaky olo avao ty anjely raty, fa mampitahotsy an-drozy koa. Hay Satana noho ty demoniany, fa “kelikely ty fotoa ananany”, aloha ty hisakana an-drozy tsy hanao ndre ino ndre ino sasy. Zay mahavy an-drozy ho romotsy marè henanizao io. (Apokalypsy 12:12, 17) Olo an’arivony ro natahotsy marè an-drozy, fe afaky tamy tahotsy zay henanizao. Ino ty nataon’olo reo? Laha misy olo fa mifandramby amy anjely raty reo henanizao, ino ty azony atao?

14. Manahaky Kristiana ta Efesosy tany, ino ty tokony hatao mba tsy hifandrambesa amy ty anjely raty sasy?

¹⁴ Hita amy Baiboly ao ty raha tokony hataontsika mba hanohera ty anjely raty noho tsy hifandrambesa aminy sasy. Diniho ty raha natao ty Kristiana voalohany ta Efesosy tany. Nifandramby tamy anjely raty rozy tamy rozy mbo tsy Kristiana. Ino ty nataon-drozy mba hialà tamy raha zay? Hoy ty Baiboly: “Maro tamin’olo zatsy nampiasa mazỳ reo ro namory ty bokiny, sady nanoro azy [tamy afo] tamason’olo iaby teo.” (Asan’ny Apostoly 19:19) Modely ho ahin’olo ta hanohitsy ty anjely raty, Kristiana nanoro ty bokiny mikasiky mazỳ reo. Tokony hamotipotiky ty raha misy ifandrambesany amy demonia, ze olo ta hanompo Jehovah. Misy boky, gazety, sary, na moziky, mampirisiky ty olo hifandramby amy anjely raty na mampiseho hoe soa ty mifandramby amy anjely raty reo, ao koa ty tapa-kazo na raha hafa atao fiaro. Tokony hopotehy iaby raha zay!—1 Korintianina 10:21.

15. Mila manao ino tsika laha ta hanohitsy ty anjely raty?

¹⁵ Tao vitsivitsy tafara ty nanoroa Kristiana ta Efesosy  tany reo ty bokiny mikasiky ty mazỳ, le nivola ho zao tamin-drozy ty apostoly Paoly: ‘Tsika mialy amy anjely raty reo.’ (Efesianina 6:12) Midika zay, fa tsy nieny ty demonia, fa mbo ta handresy avao. Mbo nila nanao ino Kristiana reo? Hoy Paoly: “Ndre eo raha iaby rezay, le rambeso ty ampinga bevata, tsy ino zay fa ty finoa, fa zay ro hahavitanareo hamono ty balakititsy mirehitsy iaby, baka amy azy raty iny [Satana].” (Efesianina 6:16) Hahavita manohitsy ty anjely raty tsika, laha mana finoa matanjaky.—Matio 17:20.

16. Mila manao ino tsika laha ta hana finoa matanjaky?

¹⁶ Mila manao ino tsika laha ta hana finoa matanjaky? Mila mianatsy Baiboly. Matanjaky ty lakoro lafa soa fototsy. Manahaky zay koa, fa hatanjaky ty finoantsika lafa soa fototsy. Ino ty fototsiny? Ty fahaiza ty raha marina baka amy Baiboly ao. Hihamatanjaky ty finoantsika, laha mianatsy noho mamaky Baiboly sanandro tsika. Mitovy amy lakoro matanjaky soa finoa iny amy zay, ka hiaro antsika amy ty anjely raty.—1 Jaona 5:5.

17. Mila manao ino tsika, mba ho afaky hanohitsy ty anjely raty?

¹⁷ Nila nanao ino koa ty Kristiana ta Efesosy tany? Nisy raha hafa koa nila nanovin-drozy, satria nifeno asany demonia tamy tanàn-drozy teo. Nampirisiky an-drozy Paoly hoe: “Mivavaha avao ndre amy fotoa manao akory ndre amy fotoa manao akory, ambany ty fitariha ty fanahy, sady manaova vavaky noho fisolohoa sankarazany.” (Efesianina 6:18) Mbo feno asany demonia koa tany misy antsika toy, ka soa laha mangataky fiarova baka amy Jehovah tsika, mba hahavitantsika manohitsy an-drozy. Fe mila manono ty anara Ndranahary hoe Jehovah tsika, lafa mivavaky. (Vakio Ohabolana 18:10.) Mila mangataky tsy tampaky aminy tsika, amy zay harovany ho afaky “amy azy raty iny”, tsy ia zay fa Satana Devoly. (Matio 6:13) Hamaly ty vavaky baka am-po manahaky zay Jehovah.—Salamo 145:19.

18, 19. a) Manino ro azo antoky fa ho afaky ho mpandresy tsika amy aly ataontsika amy ty anjely raty? b) Ino ty fanontanea hovaliantsika amy toko manaraky?

¹⁸ Mahavy loza ty anjely raty. Fe tsy misy atahorantsika an-drozy, laha toherintsika ty Devoly sady mamonjy a Ndranahary noho manao ty sitrapony tsika. (Vakio Jakoba 4:7, 8.) Misy farany avao ty hery anjely raty reo. Nivoasazy rozy tamy andro Noa, sady azo antoky fa mbo ho avy ty fitsarà farany an-drozy. (Joda 6) Ka halino koa fa miaro antsika ty anjely maheriny Jehovah. (2 Mpanjaka 6:15-17) Tean-drozy hahavita hanohitsy ty anjely raty tsika. Mampirisiky antsika hanao raha zay anjely soa reo. Ka soa laha mijano marìny Jehovah noho ty fianakavian’anjely tsy mivaliky aminy tsika. Halaviro koa ty raha misy ifandrambesany amy anjely raty, sady oriho avao ty torohevitsy amy Baiboly ao. (1 Petera 5:6, 7; 2 Petera 2:9) Ho azo antoky amy zay, fa ho mpandresy tsika amy aly ataontsika amy anjely raty reo.

¹⁹ Fe manino ro mbo engà Ndranahary hisy ty anjely raty noho ty raha raty iaby, ka mahavy ty olo hijaly marè manahaky zao? Ho hitantsika ty valy fanontanea io amy toko manaraky.