MISY safà tsy tokony horambesy ara-bakiteny amy Apokalypsy ao. (Apokalypsy 1:1) Volany ao, ohatsy, fa misy ampela raiky ahità anara hoe “Babylona Bevata” misoratsy amy handriny eo. Mipetraky anabo “vahoaky noho firenena” ie. (Apokalypsy 17:1, 5, 15) Fe tsy misy ampela mahavita ho zay. Tsy maintsy rambesy amy hevitsiny an’ohatsy ty hoe Babylona Bevata. Ino ty tea hovolany amy makorely an’ohatsy io?

Volany Apokalypsy 17:18, fa “tanà bevata mana fanjakà mifehy ty mpanjaka amy tany reo” ampela io. Mitovy amy fikambana raiky misy fitambaran’olo voalamy ty “tanà.”  Volany hoe “tanà bevata” koa, ampela kaihy hoe Babylona Bevata iny, sady mana fahefà amy “mpanjaka ty tany.” Midika zay, fa fikambana mana fahefà amy tany toy iaby raha io. Karazam-pahefà manao akory ty ananany? Mikasiky fivavaha. Manaporofo raha zay ty andinin-teny hafa amy Apokalypsy ao.

Mety ho mikasiky politiky na mikasiky varotsy na mikasiky fivavaha ty fikambana raiky. Fe tsy fikambana mikasiky politiky Babylona Bevata io, satria mivola ty Baiboly fa “nijangajanga taminy” ty mpanday amy tontolo toy, tsy ia zay fa ty “mpanjaka ty tany.” Tsy ino fijangajangàny io, fa ty fifanekea ataony miaraky amy mpanday amy tany toy reo. Zay ty antony ikaiha azy hoe “makorely be.”—Apokalypsy 17:1, 2; Jakoba 4:4.

Tsy fikambana mikasiky varotsy koa Babylona Bevata io satria hiferinay azy ty “mpamarotsy mifindrafindra amy tany” lafa haripaky ie, tsy ia zay fa ty mpanao raha mikasiky varotsy. Volany koa fa hijilo azy baka “lavidavitsy” eny mpanjaka noho mpamarotsy reo. (Apokalypsy 18:3, 9, 10, 15-17) Afaky mivola tsika, fa tsy fikambana mikasiky politiky na varotsy Babylona Bevata io, fa fikambana mikasiky fivavaha.

Marina vatany raha zay satria mamitaky ty firenena iaby amy alala ty ‘fisàny aoly’ ie. (Apokalypsy 18:23) Baka amy demonia ty karaza fisà aoly iaby, sady azo volany koa hoe fivavaha. Tsy mahatseriky laha kaihy ty Baiboly hoe “fipetraha ty demonia” Babylona Bevata. (Apokalypsy 18:2; Deoteronomia 18:10-12) Volany koa fa toheriny marè ty fivavaha marina sady ampijalìny ty “mpaminany” noho ty “olo masy.” (Apokalypsy 18:24) Lako loatsy ty falainany ty fivavaha marina, le hianiny amin-karomota noho vonoany ho maty “ty vavolombelo Jesosy.” (Apokalypsy 17:6) Hita baka amy zay, fa ampela kaihy hoe Babylona Bevata io, le ty fitambara ty fivavaha diso iaby amy tany toy, tafilitsy amy zay ty fivavaha iaby manohitsy Jehovah Ndranahary.