1. Ino ty raha tea Ndranahary hatao amy tany toy?

FARANY ZE soa ty raha tea Ndranahary hatao amy tany toy. Teany ho feno olo sambatsy noho salama soa ty etoy. Mivola ty Baiboly fa ‘nanamboatsy zariday ta Edena tao Ndranahary’ sady ‘nampitirìny tao iaby ty hazo soasoa hentea sady mampy ta hihina.’ Namoro Adama noho Eva koa ie, ka napetrany tamy tanà soasoa io tao lahilahy noho ampela voalohany reo. Nivola tamin-drozy ie hoe: “Miteraha maro, mihamaroa ka fenò ty tany. Anjakao ty tany.” (Genesisy 1:28; 2:8, 9, 15) Ho zao ty raha tea Ndranahary hatao: Teany hiteraky ty olombelo, hiasa tany toy mba ho paradisa noho hikarakara ty biby.

2. a) Manao akory ty ahaizantsika, fa ho tanteraky ty raha tea Ndranahary hatao amy tany toy? b) Ia ro volany ty Baiboly fa hiay zisiky farany?

² Araky ty hevitsinao ho tanteraky avao va raha tea Ndranahary hatao amy tany toy zay, ka ndraiky andro any, le hisy olo hiay amy paradisa an-tany etoa? “Fa nivolaniko raha zay” hoy Ndranahary, “ka le hataoko.” (Isaia 46:9-11; 55:11) Azo antoky fa hotanterahiny ze raha teany hatao! Nivola ie fa “tsy hoe tsy misy antony ty  namoronany [ty tany] fa nataony hipetraha.” (Isaia 45:18) Olo manao akory ro tea Ndranahary hipetraky amy tany toy? Zisiky ombia rozy ro teany hipetraky etoy? Mamaly ty Baiboly hoe: “Ty olo marina handova ty tany, le hipetraky eo zisiky farany.”—Salamo 37:29; Apokalypsy 21:3, 4.

3. Manao akory ty fiaina an-tany etoa henanizao? Ino iaby ty fanontanea miboaky baka amy raha zay?

³ Fe samby mahay tsika hoe mbo tsy tanteraky raha zay. Marary noho maty ty olo henanizao, misy koa ty mialy, ty sisany mifamono. Misy antony, nahavy raha zay. Fe azo antoky fa tsy tea Ndranahary hanahaky amy henanizao mihintsy ty fiaina an-tany etoa! Ino ty raha niseho? Manino ro tsy tanteraky ty raha teany hatao? Tsy mahavoavaly raha zay ty boky misy tantara nisoratin’olo satria tan-danitsy any raha manahira io ro nanomboky.

4, 5. a) Ia ro niresaky tamy Eva fa nampiasa bibilava? b) Manao akory ro mety hahavy ty olo raiky ho mpangalatsy, ndre soa fanahy noho nanao ty marina aza ie taloha?

⁴ Volany boky voalohany amy Baiboly ao fa nisy nanohitsy Ndranahary, tamy zariday Edena tao. “Bibilava” ty fikaiha azy, ndre tsy biby aza ie. Hita amy boky farany amy Baiboly ao, fa ie ro “kaihy hoe Devoly noho Satana, azy mamitaky ty tany iaby misy olo iny.” Mbo fikaiha azy koa ty hoe “bibilava tamy voalohany tany iny.” (Genesisy 3:1; Apokalypsy 12:9) Nampiasa bibilava anjely mahery io, mba hiresaha amy Eva. Le atao ho bibilava iny ro nivola, hondy Satana ro nanao raha zay laha ty marina. Hita anjely mahery io ty nanomàna Ndranahary tany toy ho ahin’olombelo.—Joba 38:4, 7.

⁵ Soa iaby ty raha niforony Jehovah fa tsy misy raty. Ka laha zay ro ie, ia ty namoro “Devoly” na “Satana” io? Niova ho Devoly ty raiky amy ana Ndranahary tan-danitsy any.  Manao akory ty nisehoa raha zay? Mety hanjary mpangalatsy ty olo raiky, ndre soa fanahy noho nanao raha marina avao aza ie taloha. Ino ty antony? Satria mety hana fanirian-draty ie. Ho masaky an-tsainy ao faniriany io, laha io avao ro dinihiny. Amy farany le hotanterahiny raha zay lafa tojo fakam-panahy ie.—Vakio Jakoba 1:13-15.

6. Manao akory ro nahavy ty raiky amy ana Ndranahary ho Satana Devoly?

⁶ Manahaky zay ro nahazo Satana Devoly. Azo inoa fa reny safà Ndranahary tamy Adama noho Eva iny hoe miteraha le fenò tany toy. (Genesisy 1:27, 28) Nieritseritsy Satana hoe: ‘Laha mba zaho moa ro tompoen’olo retoa, fa tsy Ndranahary!’ Nana fanirian-draty ie, tam-pony tao. Bakeo finitany Eva, ka nivolanany vandy mikasiky Ndranahary. (Vakio Genesisy 3:1-5.) Zay ro nahavy azy ho “Devoly”, midika hoe “Mpanasara raha raty”, noho “Satana” midika hoe “Mpanohitsy.”

7. a) Nanino Adama noho Eva ro maty? b) Nanino ty taranaky Adama ro mihantitsy noho maty?

⁷ Navandy noho namitaky Satana Devoly, ka nitaominy tsy hanoriky ty safà Ndranahary Adama noho Eva. (Genesisy 2:17; 3:6) Maty rozy lafa nanao raha zay. Zay ro fa nivolany Ndranahary fa hahazo an-drozy, laha tsy manoriky ty safàny rozy. (Genesisy 3:17-19) Nanjary niharaty rozy lafa nanao fahotà io. Nandova fahotà zay koa ty taranany iaby. (Vakio Romanina 5:12.) Manahaky valàny fanendasa mokary raha zay. Laha misy kepoky amy valàny io eo, le ho kepoky iaby ty mokary endasy aminy, sa tsy zay? Mitovy amy zay koa, fa nandova fahotà baka amy Adama ty olo iaby. Zay mahavy ty olombelo ho antitsy noho maty io.—Romanina 3:23.

8, 9. a) Ino ty vandy nivolany Satana mikasiky Ndranahary? b) Manino Ndranahary ro tsy avy le namono mpanohitsy azy rey?

⁸ Nitao ty hafa hanohitsy koa Satana, lafa nampirisiky  Adama noho Eva tsy hanoriky ty safà Ndranahary. Nanaraty Jehovah ie, ka sahala nivola hoe: ‘Tsy mahay manday Ndranahary. Mavandy ie, sady misy raha soa ho ahin’olo, fe tsy ameany an-drozy. Tsy mila Ndranahary handay azy ty olombelo. Ndre rozy avao, le fa afaky manapa-kevitsy hoe ino ty soa noho ino ty raty. Ho soa marè ty fiaina laha zaho ro manday an-drozy.’ Ino ty natao Ndranahary lafa  nasara vandy noho niratiratỳ marè manahaky zay ie? Misy mieritseritsy hoe soa laha avy le nivonoa Satana miaraky amy Adama noho Eva. Fe laha zay ro natao, ho nihay va hoe diso noho vandy raha nivolany Satana rey? Ho nihay koa va hoe Ndranahary avao ro mahay manday?

⁹ Manao ty rariny avao Jehovah amy ty raha anoviny. Zay ro nahavy azy tsy avy le namono an-dry Adama noho Satana. Nengany handeha ty fotoa, mba hahità hoe mpavandy Satana Devoly, sady tsy misy marina fanaratia nataony rey. Nengany hifanday tse ty olombelo, ambany fahefà Satana eo. Hodinihy amy Toko faha-11 ao ty antony nanaova Jehovah raha zay noho ty antony nangalany fotoa lava, aloha ty handaminany fahasahirana reo. Fe soa laha mieritseritsy tsika hoe: Tokony ho nino ty safà Satana va Adama noho Eva, nefa tsy nisy raha soa nameany an-drozy ndre raiky? Mety va ty ninoan-drozy hoe mpavandy sady raty fanahy Ndranahary, nefa ie ro nanome ty raha iaby ho ahin-drozy morovaly? Laha iha ro tamy pilasin-drozy, ino ty ho nataonao?

10. Mila manao ino iha laha teanao ty hifily Jehovah, ka hanome porofo fa vandy ty raha nivolany Satana?

¹⁰ Soa hodinihy raha zay, satria misy fanontanea manahaky zay koa mipetraky amintsika kiraidraiky henanizao. Azonao atao ty mifily Jehovah, ka manome porofo fa vandy raha nivolany Satana rey. Atoronao fa mpavandy Satana, laha Jehovah ro ekenao ho mpanday anao. (Salamo 73:28; Vakio Ohabolana 27:11.) Fe mahatseriky fa olo vitsivitsy amin’olo an-tapitrisany maro an-tany etoy avao, ro mifily hanao raha zay. Mipetraky fanontanea bevata raiky toy hoe: Volany amy Baiboly ao vatany va fa Satana ro manday tontolo toy?

11, 12. a) Hita tamy fakam-panahy raiky nahazo Jesosy, fa Satana ro mpanday tontolo toy. Manino tsika ro mivola raha zay? b) Ino koa ty porofo fa Satana ro mpanday tontolo toy?

¹¹ Tsy nisalasala Jesosy nivola hoe Satana ro mpanday tontolo toy. Nanao fahagagà Satana, mba hampisehoa tamy Jesosy “ty fanjakà iaby amy zao tontolo zao noho ty voninahitsy fanjakà reo.” Nampitamà ie bakeo hoe: “Hameako anao raha iaby reo, laha miankohoky indraiky amiko etoa iha.” (Matio 4:8, 9; Lioka 4:5, 6) Diniho toy: Ho fakam-panahy ho ahy Jesosy va raha zay, laha tsy Satana vatany ro mpanday fanjakà reo? Tsy nandà Jesosy fa ahy Satana fanjakà iaby reo. Nekeny raha zay satria hainy hoe Satana ro mana fahefà amy fanjakà reo.

¹² Jehovah ro Ndranahary farany ze mahery noho Mpamoro ty kila raha iaby. (Apokalypsy 4:11) Fe tsy mivola ty Baiboly hoe Jehovah na Jesosy Kristy ro mpanday tontolo toy. Nivola mazava soa Jesosy fa Satana ro “mpanday tontolo toy.” (Jaona 12:31; 14:30; 16:11) Mivola koa ty Baiboly fa Satana Devoly ro “ndranahary tontolo toy.”(2 Korintianina 4:3, 4) Ho zao ty safà apostoly Jaona mikasiky mpanohitsy na Satana io: “Zao tontolo zao iaby, le ambany fahefà azy raty iny eo.”—1 Jaona 5:19.

13. Manino tsika ro mila tontolo vaovao?

¹³ Miharaty miharaty avao tontolo toy santao. Maro ty maramila mialy, ty mpanao politiky manao raha tsy marina, ty mpitariky fivavaha mihatsaravelatsihy, noho halatsy miharo vonoan’olo. Laha hentea le fa tsy hay areny sasy tontolo toy. Fe mivola ty Baiboly hoe sisa kely le handripaky ty raty fanahy Ndranahary, amy aly kaihy hoe Hara-magedona. Hisy tontolo vaovao hipetraha ty fahamarina afara raha zay.—Apokalypsy 16:14-16.

14. Ia ro finily Ndranahary handay fanjakany io? Ino ty raha fa nivolany fa liany ela mikasiky raha zay?

 ¹⁴ Finily Jehovah ho mpanday Fanjakany an-danitsy any iny Jesosy. Fa liany ela ty Baiboly ro fa nivola hoe: ‘Misy ajà nateraky ho ahintsika, ajà lahilahy ro namea antsika, le ty fahefà mpanjaka ho an-tsorokiny eo. Ty anarany hatao hoe Mpanjaka ty fiadana.’ (Isaia 9:5, 6) Nampianary Jesosy hivavaky ho zao mikasiky fandaisany io ty mpanoridia azy: “Ho avy lahy ty fanjakanao. Hatao an-tany etoy lahy ty raha teanao hatao, manahaky ty an-danitsy any.” (Matio 6:10) Hianarantsika afarafara ao, fa sisa kely le handrava ty fanjakà iaby misy an-tany etoa ty Fanjakà Ndranahary, bakeo ie ro hisolo raha reo. (Vakio Daniela 2:44.) Lafa vita zay, le hanova tany toy ho paradisa Fanjakà io.

15. Ino ty dika ty hoe “tany vaovao”?

¹⁵ Mivola ty Baiboly hoe: “Misy lanitsy vaovao noho tany vaovao hipetraha ty fahamarina, io ro linisantsika, araky ty nampitamany [Ndranahary].” (2 Petera 3:13; Isaia 65:17) Kindraiky, le ty olo miay an-tany etoa ro volany ty Baiboly hoe “tany.” (Genesisy 11:1) Hita baka amy zay fa ty hoe “tany vaovao”, le midika hoe vahoaky tea Ndranahary.

16. Ino ty raha soa amea Ndranahary ty olo teany? Ino ty raha tsy maintsy ataontsika mba hahazoa raha io?

¹⁶ Nampitamà Jesosy fa hamea “fiaina zisiky farany” amy tontolo vaovao ao ty olo tea Ndranahary. (Marka 10:30) Sokafo amy Jaona 3:16 noho amy Jaona 17:3 ty Baibolinao, bakeo vakio ty raha nivolany Jesosy fa tsy maintsy ataontsika laha ta ho velo zisiky farany. Diniho amy Baiboly ao koa henanizao, ty fitahia ho azon’olo maeva hamea fanomeza farany ze soa baka amy Ndranahary io, amy Paradisa an-tany etoa.

17, 18. Manino tsika ro matoky fa hiada noho tsy hatahotahotsy ty olo an-tany etoy?

 ¹⁷ Tsy hisy sasy ty raha raty, ty aly, ty halatsy miharo vonoan’olo, faneriserea olo. “Tsy hisy sasy ty raty fanahy ... Fa ty mpandefitsy ro handova ty tany.” (Salamo 37:10, 11) Hisy ty fiadana, satria ‘hampieny aly zisiky amy farany tany any’ Ndranahary. (Salamo 46:9; Isaia 2:4) “Hihamaro ty olo marina, sady ho be ty fiadana laha mbo misy koa ty vola”, na hoe zisiky farany!—Salamo 72:7.

¹⁸ Tsy hisy raha hampatahotahotsy ty mpanompo Jehovah. Lafa nanoriky safà Ndranahary Israelita reo, le tsy nisy raha nampatahotahotsy an-drozy. (Levitikosy 25:18, 19) Tsy hisy koa ty raha hampatahotahotsy amy Paradisa ao, ka ho soasoa vatany!—Vakio Isaia 32:18; Mika 4:4.

19. Manino tsika ro mivola fa ho maro hany amy tontolo vaovao ao?

¹⁹ Tsy hisy sasy ty mosary. Nihira mpanao salamo raiky zay hoe: “Hamokatsy marè ty tany, ka ndre am-bohitsy eny, le ho maro ty vokatsy.” (Salamo 72:16) Hanome fitahia ho ahin’olo marina Jehovah, ka “hahavokatsy vatany ty tany.”—Salamo 67:6.

20. Manino tsika ro mivola fa hanjary paradisa tany toy iaby?

²⁰ Ho paradisa tany toy iaby. Ho feno trano noho zariday soasoa tany sinimban’olo mpanota toy. (Vakio Isaia 65:21-24; Apokalypsy 11:18) Hambolea tany toy, ka hanjary soasoa noho hamokatsy. Ho paradisa hanahaky zariday Edena iny ty tany iaby, lafa ela ty ela. ‘Hanokatsy ty tanany’ avao koa Ndranahary, ka “hanome fahafaham-po ty faniria ty rahamananay iaby.”—Salamo 145:16.

21. Manino tsika ro mivola fa ho mpinama ty olo noho ty biby?

²¹ Ho mpinama ty olo noho ty biby. Hiaraky hihina ty bibinala noho ty biby harè. Ndre ty ajà aza tsy havaka biby masiaky henanizao reo.—Vakio Isaia 11:6-9; 65:25.

22. Hatao akory ty arety?

 ²² Tsy hisy ty arety. Hanafaky aretin’olo maro mandilatsy tamy ie tan-tany etoy iny Jesosy. Ie ro Mpanjaka Fanjakà Ndranahary an-danitsy any iny. (Matio 9:35; Marka 1:40-42; Jaona 5:5-9) Amy fotoa zay, le “tsy hisy amin’olo ao hivola hoe: ‘Marary aho.’ ”—Isaia 33:24; 35:5, 6.

23. Manino ro hahafalifaly antsika ty fameloma ty maty?

²³ Hovelomy ty longotsika fa nimaty sady afaky ho velo zisiky farany. Hovelomy ndraiky ty olo miroro amy torimaso ty fahafatesa ao, fe tiaro Ndranahary. “Hisy [vatany] fameloma ty marina noho ty tsy marina.”—Asan’ny Apostoly 24:15; Vakio Jaona 5:28, 29.

24. Manao akory ty fahitanao hiay amy Paradisa an-tany zao?

²⁴ Hasambara vatany ro mandiny ze olo mianatsy mikasiky Jehovah, azy Mpamoro Bevata iny, noho ze olo mifily hanompo azy! Paradisa an-tany etoa ro tea Jesosy hovolany, lafa nivola tamy malaso nihanto tanilany teo iny hoe: “Hiaraky amiko amy Paradisa any iha.” (Lioka 23:43) Mila mianatsy marerè mikasiky Jesosy Kristy tsika, satria amy alalany ro ahazoantsika fitahia iaby reo.