TSY mifototsy amy Baiboly ty fety mikasiky fivavaha noho fety hafa maro mpitea, amy tany maro any. Ka baka aia ty nifotora raha rey? Laha afaky manao fikaroha amy fanajaria boky any iha, le hanaitsy anao ty hahita ty raha volany ty boky sisany mikasiky fety maro mpitea amy faritsy misy anao any rey. Retoa misy, ohatsy, vitsivitsy.

 Paka. “Tsy miresaky mikasiky ty fankalazà Paka ty Testamenta Vaovao”, hoy ty Bokim-pahaia Britannica. Manao akory ty nifotora fety io? Baka amy fanompoa sampy raha io. Volany hoe fankalazà ty niveloma Jesosy tamy maty raha io, kanefa mifanohitsy amy ty fampianara kristiana ty fombafomba maro atao amy fotoa io. Ho zao, ohatsy, ty volany Bokim-pahaia Katolika (anglisy) mikasiky ty “bitro amy Paka”: “Mariky mampiavaky ty mpanompo sampy ty bitro, sady natao ho famantara ty fiteraha maro.”

Bonanè. Samby mana ty daty noho ty fanaovany fankalazà Bonanè ty firenena amy tany toy iaby. Zao ty volany Bokim-pahaia zao tontolo zao mikasiky ty nifotora raha io: “Ty 1 Janoary ro natao Jules César, mpanday romanina, ho Bonanè tamy tao 46 T.K. Natoka ty Romanina ho ahy Janus, ndranahary ty vavahady noho ty varavara voho ty fanomboha, andro io. Baka amy anara Janus ty anara ty vola Janoary. Nana tarehy roe Janus, ty raiky nitoliky aloha any, le ty raiky nitoliky afara any.” Hita baka amy zay, fa baka amy fombafomba ty mpanompo sampy ty fankalazà Bonanè.

Halloween. Ho zao ty volany ty Bokim-pahaia Amerikanina mikasiky ty Haloween (fety manahaky fety ty maty io): “Ty fombafomba sisany orihy amy Halloween, le fa mpihita tamy fety natao ty [mpisoro selta] taloha ty andro kristiana. Nanao fety ho ahy ndranahary roe bevata rozy. Ho ahy ndranahary masoandro ty raiky, le ty raiky ho ahy ndranahary ty maty ... nankalazà amy 1 Novambra, fanomboha ty Bonanè Selta. Nampiliry tsikelikely tamy ty fomba Kristiana ty fety ty maty tafara atoy.”

Fety hafa. Tsy ho voaresakintsika eto iaby ty kila fety amy tany toy. Fe tsy ekè Jehovah ty fety raiky lafa manondrotsy olo na fikambana naorin’olombelo. (Jeremia 17:5-7; Asan’ny Apostoly 10:25, 26) Tiarovo koa fa mianky amy ty nifotora ty fety mikasiky fivavaha raiky, ro itiava Ndranahary azy na tsy itiavany azy. (Isaia 52:11; Apokalypsy 18:4) Misy torolala baka amy Baiboly amy Toko faha-16 ao, hanampy anao hahay ty fahità Ndranahary, ty fanaova raha misy ifandrambesany amy fety tsy mikasiky fivavaha.