FIZARÀ 3
Manao Akory ty Hamahà ty Raha Manahira?
“Mifankatiava marè, satria manaro fahotà maro biby ty fitiava.”—1 Petera 4:8
Hiboaky tsikiraiky ty raha manahira lafa miharo trano nareo morovaly. Nanino? Mety ho tsy fitovian-kevitsy zay na fihetseham-po, na samby hafa ty fandaisanareo ty fiainanareo. Mety hisy koa ty raha manahira tsy mianky aminareo na baka amy raha niseho tsy ampoizy.
Mety tsy ta hidary ty raha manahira antsika tsika, fe mampirisiky antsika handamy raha rey ty Baiboly. (Matio 5:23, 24) Ho hainao soa ty hamaha ty raha manahira anao laha manoriky ty torolala ty Baiboly iha.
1 VOLANO RAHA ZAO
HOY TY BAIBOLY: ‘Misy ty fotoa ivolàna.’ (Mpitoriteny 3:1, 7) Manokàna fotoa hiresahanareo raha manahira iny. Ambarao amy valinao ty fihetseham-ponao noho ty raha eritseretinao mikasiky raha iny. “Mivolana ty marina” amy valinao avao. (Efesianina 4:25) Miezaha tsy hialy amy valinao, ndre meloky marè iha na malahelo marè. Tsy hanjary ho aly ty resaky tsotra laha moramora avao ty famaleanao azy.—Ohabolana 15:4; 26:20.
Miezaha ho soa fanahy avao, ndre tsy ekenao ty hevitsy valinao. Ka halino fa mila mampiseho fitiava aminy noho manaja azy iha. (Kolosianina 4:6) Alamino malaky raha manahira iny, le ka mety tsy hifampivola.—Efesianina 4:26.
TOY MISY HEVITSY:
-
Milà fotoa mety soa, hiresaha raha manahira iny
-
Ka manampaky ty safà valinao. Tany mbo hivola avao iha bakeo
2 JANJINO RAHA ZAO LE ATAOVO HAY TY TEANY HAMBARA
HOY TY BAIBOLY: “Manàna fifankahazoam-po laliky” le “manaova lohany, laha amy fifanomezam-boninahitsy.” (Romanina 12:10) Ilà vatany ty fahaizanao mijanjy. Miezaha hahay ty heviny sady ‘hahay ty raha mahazo’ azy noho ‘hiambany.’ (1 Petera 3:8; Jakoba 1:19) Ka manao kisary mijanjy avao. Ajanòno tse ty raha ataonao, laha mety, le mifantoha amy ty raha volany valinao. Na anontaneo ie laha azo resahy amy fotoa hafa raha zao. “Tsy halaky meloky iha” laha tiarovinao fa mpivaly nareo fa tsy mpialy.—Mpitoriteny 7:9.
TOY MISY HEVITSY:
-
Janjino soa avao ty valinao sady diniho soa ty raha volanininy, ndre tsy teanao ty heviny
-
Anovo hay ty raha teany hovolany. Henteo ty fihetsikiny noho ty feony
3 TANTERAHO AMY ZAY TY FANAPAHAN-KEVITSY NIARAHA
HOY TY BAIBOLY: “Ahità tombontsoa ty asa mafy iaby, fa ty safà amy zao avao mahavy fahantrà.” (Ohabolana 14:23) Mety hahita hevitsy soa hamahà raha manahira iny nareo, fe tsy ampy zay. Mila tanterahy koa ty fanapahan-kevitsy niarahanareo. Mety hila ezaky mafy raha zay fe ho hitanao fa nahasoa raha. (Ohabolana 10:4) Hotahỳ Ndranahary ty asa mafy ataonareo morovaly, laha mahay mifanampy nareo.—Mpitoriteny 4:9.
TOY MISY HEVITSY:
-
Mifanaraha hoe ino ty hatao ty kiraidraiky mba hamahà raha manahira iny
-
Ampolio hentea kindraindraiky ty ezaky fa vitanareo
