1. Ia ro tokony hivola amintsika ty fomba tokony hanompoa a Ndranahary?

MIVOLA ty ankamaroani-fivavaha fa mampianatsy ty marina mikasiky a Ndranahary rozy. Fe tsy ho marina mihintsy raha zay, satria samby hafa biby ty raha ampianarin-drozy mikasiky a Ndranahary noho ty fomba hanompoa azy. Ka akory ty hahaizantsika ty fomba tokony hanompoa a Ndranahary? Jehovah raiky avao ro afaky mivola ani-zay amintsika.

2. Akory ty hahaizanao ty fomba tokony hanompoa a Ndranahary?

² Nameani-Jehovah antsika ty Baiboly mba hahaizantsika ty fomba tokony hanompoa azy. Ka laha zay, ianaro soa ty Baiboly. Hahasoa anao ty raha ampianary ao satria tea anao Jehovah.—Isaia 48:17.

3. Ino ty tea-Ndranahary hataontsika?

³ Misy mivola fa tea-Ndranahary iaby lafa atao fivavaha, fe tsy zay ty nampianarini-Jesosy. Hoy ty asany: “Tsy ze mivola amiko hoe: ‘Tompo, Tompo’, ro hilitsy amy fanjakàni-lanitsy, fa ze manao ty raha teani-Babako.” Tena mila mianatsy ty sitrapo-Ndranahary tsika, le bakeo manoriky ani-zay. Tena ilà raha zay satria nampitovizini-Jesosy amy mpanao raty na “mpandika lalàna” ty olo tsy manoriky ty safàni-Jehovah.—Matio 7:21-23.

4. Ino ty nivolanini-Jesosy mikasiky ty fanaova ty sitrapo-Ndranahary?

⁴ Fa nivola Jesosy fa tsy hoe ho mora avao ty hanao ty sitrapo-Ndranahary. Hoy ty asany: “Milira amy vavahady  tery. Satria bevata sady malalaky ty lala mandeha amy fandripaha, ka maro ty militsy any. Fe tery ty vavahady sady maifitsy ty lala mandeha amy fiaina, ka vitsy ty mahita azy.” (Matio 7:13, 14) Manondro ty fomba tokony hanompoa a Ndranahary lala maifitsy io, sady mitariky amy fiaina zisiky farany. Fa ty lala malalaky, manondro ty fomba tsy tea-Ndranahary hanompoa azy, sady mitariky amy fahafatesa. Fe tsy misy teani-Jehovah ho maty ty olo. Ataony ze hahavy ty olo iaby ho afaky hianatsy mikasiky azy.—2 Petera 3:9.

5. Akory ty hahaizanao ze olo tena manompo a Ndranahary?

⁵ Nivola Jesosy fa ho haintsika ze olo tena manompo a Ndranahary, laha mandiniky ty raha inoan-drozy noho ty raha ataon-drozy tsika. Hoy ty asany: “Ty voa vokariny ro hamantaranareo soa an-drozy.” Bakeo nitohizany hoe: “Ty hazo soa iaby mamoa voa soa.” (Matio 7:16, 17) Tsy lavorary ty olo manompo a Ndranahary, fe ndre zay miezaky manao ty marina avao rozy. Hohenteantsika henanizao ty raha hanampy antsika hahay hoe ia ro tena manompo a Ndranahary.

6, 7. Manino ro tokony ho baka amy Baiboly ao ty raha ampianarini-fivavaha marina? Ino ty nataoni-Jesosy?

⁶ Mampianatsy ze volanini-Baiboly. Mivola ty Baiboly hoe: “Lafa atao raha voasoratsy amy Soratsy Masy ao le baka amy herini-fanahy masi-Ndranahary, sady mahasoa mba hampianara, hananara, hanarena ze diso, hitezà araky ty fahamarina, mba hahavy ty olo-Ndranahary hahay soa noho ho ampy fitaova amy asa soa iaby.” (2 Timoty 3:16, 17) Nanoratsy ho ahi-ty Kristiana ty apostoly Paoly hoe: “Lafa nandramby ty  safà-Ndranahary nirenareo baka aminay nareo, le tsy nirambesinareo ho safàn’olo raha zay fa araky ty marina, tsy ino zay fa ty safà-Ndranahary.” (1 Tesalonianina 2:13) Ze volanini-Safà-Ndranahary na ty Baiboly avao ro ampianarini-fivavaha marina, fa tsy hevitsin’olombelo, na lilin-draza na raha hafa.

⁷ Ze volany amy safà-Ndranahary ao avao ro nampianarini-Jesosy. (Vakio Jaona 17:17.) Matetiky ie ro nampiasa andinin-teny baka amy Baiboly ao. (Matio 4:4, 7, 10) Manaraky ty modely nengàni-Jesosy ty tena mpanompo-Ndranahary, ka ze volanini-Baiboly avao ro ampianarin-drozy.

8. Ino ty tokony hataoni-mpanompo-Ndranahary araky ty nampianarini-Jesosy?

⁸ Manompo ani-Jehovah raiky avao. Mivola ty Salamo 83:18 hoe: “Mba ho hain’olo fa iha raiky avao, azy mana anara hoe Jehovah, ro Farany Anabo amy tany toy iaby.” Nampianarini-Jesosy olo hoe ia ro tena Ndranahary, ia ty anarany. (Vakio Jaona 17:6.) Nivola Jesosy hoe: “Jehovah Ndranaharinao ro tsy maintsy iankohofanao, le ho azy raiky avao ro tsy maintsy anaovanao fanompoa masy.” (Matio 4:10) Manao manahaky ty raha nataoni-Jesosy tsika satria mpanompo-Ndranahary. Mivavaky amy Jehovah raiky avao tsika sady mampiasa ty anarany. Volanintsika amin’olo koa ty anara-Ndranahary noho ty raha hataony ho antsika.

9, 10. Ino ty ataontsika mba hampisehoa hoe mifankatea?

⁹ Mifankatea. Nampianarini-Jesosy hifankatea ty mpianatsiny. (Vakio Jaona 13:35.) Tokony hifankatea manahaky olo troky raiky io tsika ndre baka aia ndre baka aia, ndre mahantra ndre mpanarivo. (Kolosianina 3:14) Raha zay mahavy antsika tsy mandeha mialy na mamono olo io. Mivola ty Baiboly hoe: “Ho zao ro ahità  soa ze anaki-Ndranahary noho ze anakini-Devoly: Ze tsy manao ty marina, le tsy baka amy Ndranahary. Mitovy amy zay koa ze tsy tea ty rahalahiny.” Mbo mivola koa ie hoe: “Tokony hifankatea tsika, fa tsy hanahaky ani-Kaina, azy baka amy raty iny, ka nanao vonoan-draty ty rahalahiny.”—1 Jaona 3:10-12; 4:20, 21.

¹⁰ Mifanampy noho mifampahery tsika, ka manome ty fotoantsika noho ty herintsika voho ty fananantsika mba hanaova ani-raha zay. (Hebreo 10:24, 25) Miezaky tsika mba ‘hanao raha soa amin’olo iaby.’—Galatianina 6:10.

11. Manino tsika ro tokony hino hoe laha tsy teo Jesosy le tsy voavonjy tsika?

¹¹ Mino hoe laha tsy teo Jesosy le tsy ho voavonjy tsika. Hoy ty Baiboly: “Tsy misy olo hafa hahazoa fanavota, satria tsy misy anara hafa namea olo ambany lanitsy etoy, mba hahazoantsika fanavota.” (Asan’ny Apostoly 4:12) Nianarantsika tamy Toko faha-5 tao hoe naniraky ani-Jesosy hanome ty ainy ho vilim-panavota ho ahi-ze olo manoriky safà Jehovah. (Matio 20:28) Nitingy ani-Jesosy ie bakeo ho Mpanjaka handay tany toy iaby. Zay mahavy ty Baiboly hivola hoe tsy maintsy manoriky ty safàni-Jesosy tsika laha ta hiay zisiky farany.—Vakio Jaona 3:36.

12. Manino tsika ro tsy militsy amy politiky mihintsy?

¹² Tsy militsy amy politiky. Tsy nanao politiky Jesosy. Hoy ty asany tamy Pilato azy mpanday Romana iny, lafa nitsarà ie: “Tsy miharo amy tontolo toy ty Fanjakàko.” (Vakio Jaona 18:36.) Manahaky ani-Jesosy koa tsika, ka tsy mivaliky amy Fanjakà-Ndranahary an-danitsy any. Ka ndre aia ndre aia ro misy antsika, le tsy militsy amy politiky mihintsy tsika. Fe mandidy antsika ty Baiboly mba hanoriky ty ‘safàni-manam-pahefà.’  (Romanina 13:1) Manoriky lalàna avao tsika. Fe lafa misy lalàna mifanohitsy amy lalàna-Ndranahary amy tany misy antsika any, le hivola manahaky apostoly rey tsika hoe: “Ndranahary ro mpanday anay ka ie ro tsy maintsy orihinay safà, fa tsy olo.”—Asan’ny Apostoly 5:29; Marka 12:17.

13. Ino ty torintsika amin’olo?

¹³ Mitory hoe ty Fanjakà-Ndranahary avao ro afaky hamaha ty raha manahira an-tany etoa. Nivola Jesosy fa hotorỳ amy tany toy iaby “vaovao soani-Fanjakà iny.” (Vakio Matio 24:14.) Tsy misy fanjakàn’olombelo mahavita ty raha hataoni-Fanjakà-Ndranahary ho antsika. (Salamo 146:3) Nampianatsy antsika mivavaky mikasiky ty Fanjakà-Ndranahary Jesosy hoe: “Ho avy lahy ty Fanjakànao! Hatao an-tany etoy lahy ty sitraponao, manahaky ty an-danitsy any!” (Matio 6:10) Mivola ty Baiboly fa handripaky ty fanjakàn’olombelo iaby ty Fanjakà-Ndranahary, fa “ie ho eo avao zisiky amy fotoa tsy voafaritsy.”—Daniela 2:44.

14. Ia ty hitanao hoe tena manompo a Ndranahary?

¹⁴ Eritsereto amy zay hoe: ‘Ia ty mampianatsy ze raha volanini-Baiboly? Ia ty manambara ty anara-Ndranahary? Ia ty tena mifankatea? Ia ty mino hoe nirahi-Ndranahary hanavotsy antsika Jesosy? Ia ty tsy militsy amy politiky? Ia ty mitory hoe ty Fanjakà-Ndranahary raiky avao ro hamaha ty raha manahira antsika an-tany etoa?’ Ty Vavolombeloni-Jehovah raiky avao.—Isaia 43:10-12.

15. Ino ty tokony hataontsika laha teantsika hekè-Ndranahary ty fanompoa ataontsika?

¹⁵ Tsy ampy ty mino hoe misy Ndranahary. Ndre ty demonia koa mba mino hoe misy Ndranahary, fe tsy  manoriky ty safàny. (Jakoba 2:19) Laha teantsika hekè-Ndranahary ty fanompoa ataontsika, le tsy maintsy manao ze raha volaniny tsika fa tsy mino avao hoe misy ie.

16. Manino tsika ro tokony hiala amy fivavaha diso?

¹⁶ Tsy maintsy miala amy fivavaha diso tsika soa hekè-Ndranahary ty fanompoantsika. Nanoratsy Isaia mpaminany hoe: “Miboaha baka aminy ao, le mba manaova malio avao.” (Isaia 52:11; 2 Korintianina 6:17) Zay mahavy antsika tsy hikasiky raha misy ifandrambesany amy fivavaha diso io.

17, 18. Ino “Babylona Bevata” zao? Manino ro ilà ty miala tao malaky?

¹⁷ Ino ty atao hoe fivavaha diso? Ty fivavaha iaby mampianatsy raha mifanohitsy amy Safà-Ndranahary. Kaihini-Baiboly hoe “Babylona Bevata” ty fivavaha diso iaby. (Apokalypsy 17:5) Ino ty antony? Nihamaro ty fampianara diso ta Babylona tao tafarani-Ranobe tamy androni-Noa. Niparitaky tamy tany toy iaby raha rezay. Nivavaky tamy ndranahary telo fe raiky, ohatsy, ty olo ta Babylona tany. Mampianatsy koa ty ankamaroani-fivavaha henanizao hoe telo fe raiky Ndranahary. Kanefa ty Baiboly mivola mazava soa fa raiky avao Ndranahary, tsy ia zay fa Jehovah, le Jesosy Anakiny. (Jaona 17:3) Nino koa ty olo ta Babylona tany hoe mbo misy raha velo avao amin’olo raiky ndre maty ie, sady mety hijaly amy afobe any ie. Tsy marina raha zay.—Henteo Fanazavà Hevitsy 14, 17, noho 18.

¹⁸ Fa nivola mialoha Ndranahary fa sisa kely le haripaky ty fivavaha diso iaby. (Apokalypsy 18:8) Azonao va hoe manino iha ro mila miala malaky amy fivavaha diso? Zay ty teani-Jehovah hataonao tany mbo tsy tara loatsy.—Apokalypsy 18:4.

19. Akory ty hikarakarani-Jehovah anao lafa manapa-kevitsy hanompo azy iha?

 ¹⁹ Lafa manapa-kevitsy hiala amy fivavaha diso iha, bakeo manompo ani-Jehovah, le mety tsy ho azoni-longonao na ty namanao sisany ty antony, ka mety hampijaly anao rozy. Fe tsy hanenga anao Jehovah. Hana fianakavia an-tapitrisany tena tea anao amy tany toy iaby iha, sady hitamà hiay zisiky farany amy tontolo vaovao ao. (Marka 10:28-30) Mety ho tapa-kevitsy hianatsy Baiboly avao ty sisany amy namanao na longonao manohitsy anao rey lafa afara any.

20. Manino ro ilà ty manompo ani-Jehovah amy fomba mety?

²⁰ Sisa kely le hafahini-Jehovah ty raha raty iaby, le ty Fanjakàny ro handay tany toy iaby. (2 Petera 3:9, 13) Tena ho soasoa amy zay! Ty olo iaby mihintsy ro hanompo ani-Jehovah amy ty itiavany azy. Ka laha zay ie, mila manao raha iha manomboky henanizao, ka hanompo ani-Jehovah amy fomba itiavany azy.