Jehovah ty anara-Ndranahary. Midika anara io hoe “Manao Ze Hahavy Ie.” Ndranahary farany ze mahery Jehovah sady namoro kila raha iaby. Mana hery hanaova ze teany hatao ie.

Litera efatsy ty nanorata ty anara-Ndranahary tamy safà Hebreo. Azo adika hoe YHWH na JHVH litera reo. Nimpolimpoly in-7 000 eo ho eo ty anara-Ndranahary tamy Baiboly tamy soratsy Hebreo tamy voalohany tany. Samby mana ty fanoratany ani-anara io ty olo amy tany samby hafa. Miovaova koa ty fanonona azy arakaraky ty fivolanan’olo.

▸ Toko 1, feh. 15

Baka amy Ndranahary ty Baiboly, fe olo ro nampanoratiny azy. Manahaky nahodabè raiky ta hanoratsy taratasy raha zay, le ty anakiny ro ampanoratiny azy, fe ze teani-nahodabè iny ro soratiny. Namea-Ndranahary ty fanahiny masy koa ty olo nanoratsy Baiboly, ka ty hevitsi-Ndranahary ro nisoratin-drozy. Maro ty fomba nitarihani-fanahy masy an-drozy. Nahita fahità na nanonofy ty sisany, le rey ty nisoratiny.

▸ Toko 2, feh. 5

Raha ampianarini-Baiboly ty torolala, sady manampy antsika hahay hanapa-kevitsy. Torolala, ohatsy, ty hoe: “Ty naman-draty le manimba ty fahazara mahasoa.” (1 Korintianina 15:33) Mampianatsy antsika raha zay fa misy vokatsiny soa na raty amintsika ty olo inamantsika. Torolala koa ty hoe “ze afafin’olo avao ro hojinjàny.”  (Galatianina 6:7) Mampianatsy antsika raha zay fa tsy maintsy mibaby ty vokatsini-raha nataontsika tsika.

▸ Toko 2, feh. 12

Hafatsy baka amy Ndranahary ty faminania. Mety fanazavà ty raha tea-Ndranahary hatao raha zay, na fampianara mikasiky fandaisam-bata, na fanomeza didy, na famoaha didim-pitsarà. Mety ho fanambarà raha hiseho amy hoavy koa raha zay. Maro ty faminania amy Baiboly ao fa tanteraky.

▸ Toko 2, feh. 13

Maro ty faminania amy Baiboly ao mikasiky ty Mesia. Tanteraky amy Jesosy iaby raha rey. Henteo ty efajoro hoe “Faminania Mikasiky ty Mesia.”

▸ Toko 2, feh. 17, f.a.p.

Tea-Ndranahary hatao paradisa tany toy mba hipetrahan’olo tea azy. Mbo tsy niova raha teany hatao zay. Sisa kely le hafahiny iaby ty raha raty, le hataony miay zisiky farany ty mpanompony.

▸ Toko 3, feh. 1

Satana ro anjely nivaliky tamy Ndranahary voalohany. Kaihy hoe Satana na hoe “Mpanohitsy” ie satria nanohitsy ani-Jehovah. Kaihy hoe Devoly na hoe “Mpanasara raha raty” koa ie, satria mandratiraty a Ndranahary sady mamitaky olo.

▸ Toko 3, feh. 4

Fa ela talohani-namorona ty tany ro namoronani-Jehovah ty anjely. Natao hipetraky an-danitsy any rozy. Zato tapitrisa mahery ty isakin-drozy. (Daniela 7:10) Samby mana ty anarany rozy sady samby mana ty toetsiny koa. Tsy maneky hivavahan’olo ty anjely tsy mivaliky. Tsy mitovy ty anjely fa misy ty anabonabo. Samby hafa koa ty asany. Misy, ohatsy, ty manompo alohani-sezim-panjakàni-Jehovah eo, na irahy handay ty hafatsini-Jehovah, na miaro noho mitariky ty vahoakiny an-tany etoy, na manatanteraky ty didy naboakini-Jehovah, na manampy amy asa fitoria. (Salamo 34:7; Apokalypsy 14:6; 22:8, 9) Hialy miaraky amy Jesosy rozy amy aly Haramagedona.—Apokalypsy 16:14, 16; 19:14, 15.

▸ Toko 3, feh. 5; Toko 10, feh. 1

Ty raha iaby eritseretintsika na ataontsika ka tsy teani-Jehovah ro atao hoe ota. Manimba ty fifandrambesantsika amy Jehovah ty ota, ka nameany lalàna noho torolala tsika hanampy antsika tsy hanota. Lavorary ty raha iaby niforonini-Jehovah, fe nanota Adama noho Eva satria kinahin-drozy ty tsy nanoriky safàni-Jehovah. Nanjary tsy lavorary sasy rozy. Niha antitsy rozy le nimaty. Nifindra amintsika koa ty ota satria tarakini-Adama tsika. Miha antitsy koa tsika le maty.

▸ Toko 3, feh. 7; Toko 5, feh. 3

Aly hatao-Ndranahary raha io, le hanafaky ty raha raty iaby amy tontolo toy.

▸ Toko 3, feh. 13; Toko 8, feh. 18

Fanjakà naorini-Jehovah an-danitsy any ty Fanjakà-Ndranahary. Jesosy ro Mpanjakani-raha io. Hampiasa ani-Fanjakà io Jehovah amy hoavy mba hanafaha ty raha raty iaby. Hanjaka amy tany toy iaby ty Fanjakà-Ndranahary.

▸ Toko 3, feh. 14

Niforoni-Ndranahary talohani-kila raha iaby Jesosy. Nirahini-Jehovah an-tany etoy ie mba ho maty ho ahi-ty olo iaby. Nivelomini-Jehovah ndraiky ie tafarani-namonoa azy. Mpanjakani-Fanjakà-Ndranahary an-danitsy any Jesosy henanizao.

▸ Toko 4, feh. 2

Fa nivolanini-Baiboly sandrany ty hoe ombia ty Mesia ro ho avy. Tokony ho amy farani-fotoa kaihy hoe 69 herinandro raha zay. Nanomboky tamy tao 455 T.K. fotoa io, le tampitsy tamy tao 29 A.K.

Akory ty nahaiza hoe tampitsy tamy tao 29 A.K. fotoa io? Satria nanomboky tamy 455 T.K. 69 herinandro reo. Niavy ta Jerosalema tao Nehemia tamy zay, le nanomboky nanory tanà iny ndraiky ie. (Daniela 9:25; Nehemia 2:1, 5-8) Fito andro ro eritseretintsika lafa maharè hoe “herinandro” tsika. Fe tsy fito andro ty “herinandro” resahy amy faminania io, fa fito tao satria “ty andro raiky hosoloa tao raiky.” (Nomery 14:34; Ezekiela 4:6) Midika raha zay fa maharitsy fito tao ty herinandro kiraidraiky, ka ty 69 herinandro manome 483 tao (69 x 7). Laha manisaky 483 tao tsika manomboky amy tao 455 T.K., le avy amy tao 29 A.K. Tamy tao io mihintsy Jesosy ro natao batisa ka nanjary Mesia.—Lioka 3:1, 2, 21, 22.

 Mbo miresaky mikasiky herinandro fanampiny na fito tao fanampiny faminania io. Tanatini-fotoa io, tamy tao 33 A.K. ro namonoa ty Mesia. Tamy tao 36 A.K. ro nanomboky nitorỳ tamy firenena iaby ty Fanjakà-Ndranahary fa tsy tamy jiosy avao.—Daniela 9:24-27.

▸ Toko 4, feh. 7

Mivola ty Baiboly fa Jehovah Ndranahary ro Mpamoro, le Jesosy Kristy ty niforoniny voalohany marè. (Kolosianina 1:15, 16) Tsy Ndranahary Farany Ze Mahery Jesosy. Tsy nivola mihintsy ie hoe mitovy rozy amy Ndranahary. Hoy ty asany: “Ty Baba le mbo bevata mandilatsy ahy.” (Jaona 14:28; 1 Korintianina 15:28) Fe ampianary amy fivavaha sisany any fa telo fe raiky Ndranahary, na hoe Baba noho Anaky voho fanahy masy. Tsy misy safà hoe “Trinitè” amy Baiboly ao. Fampianara diso raha zay.

Hery ampiasà-Ndranahary ty fanahy masy. Tsy hita maso raha io sady ampiasàni-Jehovah mba hanaovany ty sitrapony. Tsy olo ty fanahy masy. “Nifeno fanahy masy”, ohatsy, ty Kristiana tamy taonjato voalohany. Nivola koa Jehovah hoe: “Handatsahako tampany amy ty fanahiko ty karaza nofotsy iaby.”—Asan’ny Apostoly 2:1-4, 17.

▸ Toko 4, feh. 12; Toko 15, feh. 17

Manino ro tsy mampiasa lakroa ty tena Kristiana lafa mivavaky?

1. Fa ela ty nampiasà lakroa tamy fivavaha diso. Nampiasàn’olo raha io taloha lafa mivavaky amy zavaboary noho lafa manao fombafomba misy firaisa ara-nofo. Tsy nampiasa lakroa ty Kristiana tanatini-300 tao tafarani-nahafaty ani-Jesosy. Fa ela biby tafara tatoy vo natao ho famantara ty Fivavaha Kristiana ty lakroa. Mpanjaka Romana mana anara Constantin ty nanao raha zay. Ta hitariky olo hanaraky Fivavaha Kristiana ie le zay ty nahavy azy nanao raha zay. Fe tsy misy ifandrambesany amy Jesosy mihintsy ty lakroa. Hoy ty Bokim-pahaia Katolika Vaovao (anglisy): “Nampiasa lakroa iaby ndre ty olo talohani-nampisy Kristiana ndre ty olo tsy Kristiana.”

2. Tsy maty tamy lakroa Jesosy. “Hazo” na “vatan-kazo” na “tsato-kazo” ty tena hevitsini-safà grika nadikan’olo  hoe “lakroa.” Hoy Ty Baiboly Nama (anglisy): “Tsy misy safà mampiseho vatan-kazo roe mihintsy amy [Testamenta Vaovao] safà Grika ao.” Maty tamy tsato-kazo teo Jesosy.

3. Tsy teani-Jehovah hampiasa sary na raha hafa tsika lafa mivavaky.—Eksodosy 20:4, 5; 1 Korintianina 10:14.

▸ Toko 5, feh. 12

Nivolanini-Jesosy ty mpianatsiny mba hahatiaro ty nahafatesany. Manao ani-raha zay rozy santao, lafa 14 Nisana. Mitovy daty amy Paska nankalazàni-Israelita raha zay. Misy mofo noho divay ampandalovy amy mpanatriky iaby amy Fahatiarova io. Manondro ty vatani-Jesosy noho ty liony ty mofo noho divay. Ze hiaraky manjaka amy Jesosy an-danitsy any avao ro hihina noho hino ani-mofo noho divay iny. Tsy mihina noho mino ze mitamà hiay zisiky farany an-tany etoa, fa mamonjy noho manaja fandahara iny avao.

▸ Toko 5, feh. 21

Maro ty olo mino fa lafa maty ty olo le misy raha miala amy vatany, ka mifindra amy razany any. Mino koa ty olo sisany fa afaky manampy na mampijaly antsika ty olo fa nimaty.

Tsy mivola ty Baiboly hoe misy raha tsy hita maso miala amy vatantsika sady mbo velo avao raha io lafa maty tsika. Mivola ie hoe tsy afaky manao ndre ino ndre ino ty olo lafa maty. Mazava soa ty raha volanini-Baiboly hoe: “Fa hay ty velo fa ho maty ie, fa ty maty tsy mahay ndre ino ndre ino, sady fa tsy mahazo karama sasy ie, satria fa halino ty raha nahatiarova azy. Fa rava koa ty fitiavany noho ty fanabokàny voho ty fialonany. Tsy misy anjarany sasy amy ty raha iaby atao ambany masoandro etoy.” (Mpitoriteny 9:5, 6, 10) Mivola koa ty Baiboly hoe: “Lafa maty ty olo, le manjary tsy misy sasy satria himpoly amy lemboky nangalà azy ie, ka  amy andro iny avao le rava ty eritseritsiny.”—Salamo 146:4; Genesisy 3:19.

Midika raha zay fa tsy mampianatsy mihintsy ty Baiboly hoe mana fanahy tsy mety maty ty olombelo. Tsy velo mbanimbany ty maty, ka tsy afaky manampy na mampijaly ty olo velo.

▸ Toko 6, feh. 5; Toko 15, feh. 17

Maro ty hevitsini-safà Hebreo noho Grika nadika hoe “fanahy”, amy Baiboly Fandikan-tenin’ny Tontolo Vaovao Malagasy. Nadika mifanaraky amy ty safà manodidy safà reo amy andininy sisany. Fe raha tsy hita maso avao ro teany hovolany, ohatsy hoe tsioky na hery mamelo olo noho biby. Ivolana ani-Jehovah noho ty anjeliny koa safà reo, na mety hampisehoa ty fanahy masy, na hoe hery ampiasà-Ndranahary. Tsy mivola mihintsy ty Baiboly hoe misy fanahy miala amin’olo lafa maty ie.—Eksodosy 35:21; Salamo 104:29; Matio 12:43; Lioka 11:13.

▸ Toko 6, feh. 5; Toko 15, feh. 17

Anarani-sakasaka fanoroa fako marìny ani-Jerosalema ao ty hoe Gehena. Tsy nisy biby na olo noroa tany tamy androni-Jesosy, sady tsy misy porofo mivola ani-raha zay. Midika raha zay fa tsy pilasy tsy hita maso ampijalea olo anaty afo zisiky farany ty Gehena. Lafa nivola Jesosy hoe misy olo halefa amy Gehena, le ta hivola ie hoe haripaky zisiky farany olo iny.—Matio 5:22; 10:28.

▸ Toko 7, feh. 20

Io azy vavaky nampianarini-Jesosy ty mpianatsiny iny. Kaihy koa hoe Babanay an-danitsy any raha io, na vavaky modely. Anatiny nampianarini-Jesosy retoa:

• “Hohamasìny lahy ty anaranao!”

  Mivavaky tsika mba hodiovini-Jehovah ty anarany na ty lazany, satria misy vandy maro miparitaky mikasiky raha io. Amy zay hanome voninahitsy noho hanaja ty anara-Ndranahary iaby ty an-danitsy any noho ty an-tany etoa.

• “Ho avy lahy ty Fanjakànao!”

  Mivavaky tsika mba hanao raha retoa ty Fanjakà-Ndranahary: Handripaky ty tontolo ratini-Satana, hanjaka amy tany toy iaby, noho hanova ty tany ho paradisa.

• “Hatao an-tany etoy lahy ty sitraponao”

  Mivavaky tsika mba ho tanteraky an-tany etoy ty raha tea-Ndranahary hatao. Hiay zisiky farany amy Paradisa ao ty olo manoriky safà-Ndranahary amy zay sady ho lavorary. Raha zay ro tea-Ndranahary hatao lafa namoro ty olombelo ie.

▸ Toko 8, feh. 2

Nanome vilim-panavota Jehovah mba hanafaha ty olo amy ty ota noho ty fahafatesa. Mila aloa vilim-panavota io mba hiviliana ty raha nafoini-Adama, tsy ino zay fa ty ay lavorary noho ty fifandrambesa soa tamy Jehovah. Nalefani-Jehovah tan-tany etoy Jesosy mba ho maty ho ahi-ty mpanota iaby. Ho velo zisiky farany noho ho lavorary iaby ty olo amy zay.

▸ Toko 8, feh. 21; Toko 9, feh. 13

Hitantsika baka amy faminania amy Daniela toko faha-4 fa nananga ty Fanjakàny Ndranahary tamy 1914.

Faminania: Nataoni-Jehovah nanonofy Nebokadnezara Mpanjaka, le nahita hazo bevata nitampahy. Nasia fehy vy noho saba ty fotony, mba tsy hitiry hazo io anatiny “fotoa fito.” Himpoly hitiry ndraiky hazo io afarani-zay.—Daniela 4:1, 10-16.

Ty dikani-faminania io: Manondro ty fandaisa-Ndranahary hazo iny. Nampiasa ty mpanjaka ta Jerosalema tao Jehovah mba handay ty firenenani-Israely tanatini-tao maromaro. (1 Tantara 29:23) Fe nivaliky taminy mpanjaka rey, le tsy nasiany mpanjaka sasy ta Jerosalema tao, sady nirava tanà io tamy tao 607 T.K. Nanomboky tamy tao io ty “fotoa fito.” (2 Mpanjaka 25:1, 8-10; Ezekiela 21:25-27) “Fotoa fito” io ro nieritseretini-Jesosy lafa nivola ie hoe: “Ho lavoni-lela meso rozy, ka handesy ho resy amy firenena iaby any, le hohitsahini-hafa firenena Jerosalema zisiky hitamperani-fotoa voatondro ho ahi-ty hafa firenena.” (Lioka 21:24) Hita amy safàni-Jesosy io fa mbo tsy tampitsy ty fotoa fito tamy ie mbo tan-tany etoa. Nampitamà Jehovah fa hanendry Mpanjaka lafa tampitsy ty “fotoa fito.” Jesosy Mpanjaka vaovao io, le hanao raha soa ho ahi-ty vahoaki-Ndranahary an-tany etoy zisiky farany ie.—Lioka 1:30-33.

Ombia tampitsy ty “fotoa fito”?: Naharitsy 2 520 tao raha io. Laha manisaky 2 520 tao tsika baka amy tao 607 T.K., le avy amy tao 1914. Tamy 1914 Jesosy, azy Mesia iny ro nataoni-Jehovah ho Mpanjakani-Fanjakà-Ndranahary an-danitsy any.

 Manao akory ty nahità isaky 2 520 io? Mivola ty Baiboly fa 1 260 andro ty fotoa telo noho tampany. (Apokalypsy 12:6, 14) Laha ampoly indroe raha zay le mahazo “fotoa fito” na 2 520 andro. Fe manjary 2 520 tao ty 2 520 andro satria “ty andro raiky hosoloa tao raiky.”—Nomery 14:34; Ezekiela 4:6.

▸ Toko 8, feh. 23

“Sefon’anjely” ty dikani-hoe “arkanjely.” Raiky avao ty arkanjely resahini-Baiboly. Mikaela ty anarany.—Daniela 12:1; Joda 9.

Mikaela ty mpitariky ty tafiki-Ndranahary, na ty anjeliny. Hoy ty Apokalypsy 12:7: “Mikaela noho ty anjeliny nialy tamy dragona iny ... noho ty anjeliny.” Fe mivola ty bokini-Apokalypsy fa Jesosy ro Mpitariky ty tafiki-Ndranahary. Midika raha zay fa anara hafa ikaiha ani-Jesosy ty hoe Mikaela.—Apokalypsy 19:14-16.

▸ Toko 9, feh. 4

Fotoa ty hoe andro farany. Hisy raha maromaro hiseho amy andro farany, bakeo horinganini-Fanjakà-Ndranahary ty tontoloni-Satana afarani-raha zay. Mbo fotoa io avao ro teani-Baiboly hovolany amy hoe “fitampera ty rafitsini-tontolo toy” noho “fanatrehani-anak’olo”, amy faminania hafa any. (Matio 24:3, 27, 37) Nanomboky tamy 1914 ty andro farany, lafa nanomboky nanjaka tan-danitsy any ty Fanjakà-Ndranahary. Ho tampitsy amy Haramagedona fotoa io, lafa rava ty tontoloni-Satana.—2 Timoty 3:1; 2 Petera 3:3.

▸ Toko 9, feh. 5

Ty fameloma-Ndranahary ty olo fa nimaty ro kaihy hoe fameloma ty maty. Mitantara olo sivy nivelomy ndraiky ty Baiboly. Elia, Elisa, Jesosy, Petera, noho Paoly ro namelo an-drozy. Hery namea-Ndranahary ro nahavitan-drozy ani-raha zay. Mampitamà Jehovah fa hovelomy an-tany etoa ty “marina noho ty tsy marina.” (Asan’ny Apostoly 24:15) Mivola koa ty Baiboly fa misy ty hovelomy ho an-danitsy any. Ze voahosotsi-Ndranahary na finiliny avao ro hiaraky miay amy Jesosy an-danitsy any lafa hovelomy.—Jaona 5:28, 29; 11:25; Filipianina 3:11; Apokalypsy 20:5, 6.

▸ Toko 9, feh. 13

Fanahy raty ty demonia, sady raty ty mifandramby amin-drozy. Misy olo miresaky mivanta amin-drozy, na amy alalani-ambiasa, na mpihisa aoly, na ty manahaky ani-reo. Manao ani-raha reo ty olo satria mino fa mbo velo ty fanahin’olo maty sady manjary angatsy. Fe tsy marina raha zay. Ataoni-demonia reo koa ze hahavy ty olo tsy hanoriky safà-Ndranahary. Mifandramby amy demonia koa ze manao sikily, manao mazỳ, mihisa aoly, minomino fahatany, mampiasa hery hafahafa. Aseho amy boky, gazety, tononandro, filma, sary, na hira koa fa atao raha soasoa ty mifandramby amy demonia noho manao mazỳ sady tsy mampanino. Misy ifandrambesany amy demonia koa ty fombafomba maro atao lafa misy olo maty, ohatsy hoe manao soro na fety ho ahin-drozy, manao famadiha, fiaretan-tory, na ty manahaky ani-reo. Matetiky ty olo ro mampiasa raha maha ango lafa hifandramby amy demonia.—Galatianina 5:20; Apokalypsy 21:8.

▸ Toko 10, feh. 10; Toko 16, feh. 4

Ndranahary Farany Ze Mahery Jehovah sady namoro kila raha iaby zao. (Apokalypsy 15:3) Midika raha zay fa ie ro Tomponi-raha iaby, sady mana zo na hoe mana fahefà, hanjaka amy ty raha namboariny. (Salamo 24:1; Isaia 40:21-23; Apokalypsy 4:11) Nanao lalàna ho ahi-ty raha niforoniny iaby ie. Mana fahefà hanendry ze teany ho mpanday koa ie. Maneky ani-Jehovah ho mpanday tsika laha tea azy noho manoriky ty safàny.—1 Tantara 29:11.

▸ Toko 11, feh. 10

Manafaky anaky ty olo raiky laha kinahiny azy ty mamono ajà mbo an-troky any. Tsy mitovy amy hoe afaky anaky baka amy loza tampoky na raha niseho tamy vatani-reniny iny raha zay. Laha vo miforo ty ajà an-troky ao, le fa olo mitoka ie zay, fa tsy hoe raha mbo amy vatani-reniny avao.

▸ Toko 13, feh. 5

Fomba fitsaboa olo marary raha io. Alà ty lion’olo raiky na ty lio fa nihajarỳ, le ampiliry amy vatan’olo marary iny. Mety ho ty raiky amy laron-dio fototsy retoa koa ro ampiliry aminy: Liomena, liofoty, plakety, noho plasma.

▸ Toko 13, feh. 13

Tsy sazy avao ro teani-Baiboly hovolany amy hoe “anatsy.” Ampianary noho tezà voho toroa ty mahity ty olo anary. Tsy masiaky mihintsy Jehovah lafa mananatsy sady tsy manao raha lisatsy marè. (Ohabolana 4:1, 2) Ohatsy soa tokony hotahafini-baba noho reny raha zay. Mahasoa ty anatsy ameani-Jehovah ka mahavy olo ho tea anatsy. (Ohabolana 12:1) Teani-Jehovah ty vahoakiny ka ampianariny. Ampianariny rozy mba hahay hieritseritsy noho tsy hino raha diso, ka hampifaly a Ndranahary amy ty raha ataony. Lafa mananatsy ty baba noho reny, le tokony hataony mazava soa amy ty anakiny hoe manino rozy ro tokony hanoriky safà. Ampianariny koa ty anakiny mba ho tea ani-Jehovah noho ty safàny sady hahazo soa ty torolala amy Baiboly ao.

▸ Toko 14, feh. 13

Tsy hita maso, raty fanahy, sady mahery mandilatsy ty olombelo ty demonia. Anjely raty rozy. Nanjary raty fanahy rozy lafa tsy nanoriky safà-Ndranahary noho nifily ho fahavalony. (Genesisy 6:2; Joda 6) Nanaraky ani-Satana nanohitsy ani-Jehovah rozy.—Deoteronomia 32:17; Lioka 8:30; Asan’ny Apostoly 16:16; Jakoba 2:19.

▸ Toko 16, feh. 4