1, 2. a) Hainao soa va ty olo malaza raiky laha hainao ty anarany? Hazavao. b) Ino ty raha inoan’olo mikasiky ani-Jesosy?

MARO ty olo malaza amy tany toy. Mety ho hainao ty anarani-sisany amin-drozy. Fe tsy midika zay hoe hainao soa olo iny laha hainao ty anarany. Tsy midika zay hoe hainao iaby ty raha mikasiky ty fiainany noho ty hoe olo manao akory vatany ie.

² Mety fa naharè resaky mikasiky ani-Jesosy iha, ndre fa 2 000 tao lasa zay ty niainany tan-tany etoy. Fe ty ankamaroan’olo tsy mahay hoe olo nanao akory vatany Jesosy zao. Misy mivola fa olo soa fanahy ie. Ao ty mivola fa mpaminany ie. Misy koa ty mino fa Ndranahary ie. Manao akory ty hevitsinao?—Henteo Fanazavà Hevitsy 12.

3. Manino iha ro tena mila mahay ani-Jehovah Ndranahary noho Jesosy Kristy?

³ Tena vatan-draha ty ahaizanao ty marina mikasiky ani-Jesosy. Ino ty antony? Mivola amintsika ty Baiboly hoe: “Mba hahavy an-drozy ho velo zisiky farany, le ilàn-drozy ty mianatsy hahay mikasiky anao, azy Ndranahary marina raiky avao iny noho Jesosy Kristy, azy nirahinao iny.” (Jaona 17:3) Laha mahay ty marina mikasiky ani-Jehovah noho Jesosy iha, le ho afaky hiay zisiky farany amy tany paradisa ao. (Jaona 14:6) Ilà koa ty mahay ani-Jesosy, satria ie ro ohatsy farany ze soa hanampy antsika hahay hiay noho hifandramby soa amin’ olo. (Jaona 13:34, 35) Fa nianatsy ty marina mikasiky a Ndranahary tsika tamy Toko 1 tao. Ty raha ampianarini-Baiboly mikasiky ani-Jesosy ro hianarantsika henanizao.

4. Ino ty dikani-hoe “Mesia” noho “Kristy”?

⁴ Tao maro talohani-nahaterahani-Jesosy, le fa nampitamà tamy Baiboly ao Jehovah fa haniraky Mesia na Kristy. Nalà baka amy safà Hebreo ty hoe “Mesia”, le baka amy safà Grika ro nangalà ty hoe “Kristy.” Samby midika raha reo hoe Ndranahary ro hifily Mesia nampitamàny io, sady hanome pilasy manoka ho azy. Mesia io ro hanao ze hahatanteraky ty raha iaby nampitamàni-Ndranahary. Afaky manampy anao sandrany koa Jesosy henanizao. Fe mbo tsy nateraky Jesosy, le fa maro ty nanontany hoe: “Ia ro ho Mesia?”

5. Nino va ty mpianatsini-Jesosy fa ie ro Mesia?

⁵ Tsy nisalasala ty mpianatsini-Jesosy hoe ie ro Mesia nampitamàny. (Jaona 1:41) Nivola tamy Jesosy, ohatsy, Simona Petera hoe: “Iha ro Kristy.” (Matio 16:16) Akory ty ahazoantsika antoky fa Jesosy vatany ro Mesia?

6. Manao akory ty nanampeani-Jehovah ty olo mahity fo hahay ty Mesia?

⁶ Fa ela talohani-nahaterahani-Jesosy, le nanoratsy raha maromaro ty mpaminani-Ndranahary, mba hanampy ty olo hahay ty Mesia. Tena manampy va raha zay? Ndao hatao hoe, nirahy hitsena olo mbo tsy nihitanao ndraiky amy fijanòna tomabily eny iha. Laha fa nisy olo nanome fanazavà soa anao mikasiky an’olo hotsenà io, le ho hitanao ie. Mitovy amy zay koa fa nampiasa ty mpaminaniny Jehovah mba hiresaha amintsika ty  raha hataoni-Mesia, noho ty raha hiseho aminy. Ty fahatanterahani-faminania reo, le hanampy ty olo mahity fo hahay fa Jesosy ro Mesia.

7. Ino ty faminania roe manaporofo fa Jesosy ro Mesia?

⁷ Retoa ty roe amy faminania reo. Voalohany, 700 tao talohani-nahaterahani-Jesosy, le naminany Mika, fa hateraky amy tanà kelikely a Betlehema ao ty Mesia. (Mika 5:2) Nateraky tao vatany Jesosy! (Matio 2:1, 3-9) Faharoe, naminany Daniela fa hiseho amy tao 29 ty Mesia. (Daniela 9:25) Mbo roe avao reo, fa mbo maro ty faminania manaporofo hoe Jesosy ro Mesia.—Henteo Fanazavà Hevitsy 13.

8, 9. Ino ty raha niseho tamy batisani-Jesosy ka ahaiza fa ie ro Mesia?

⁸ Nataoni-Jehovah ze nahaiza mazava soa fa Jesosy ro Mesia. Nampitamà ani-Jaona mpanao batisa Ndranahary fa hanome azy famantara, mba hahaizany ty Mesia. Nihitani-Jaona famantara io, tamy tao 29, lafa namonjy azy tamy vavarano Jordana teny Jesosy mba hatao batisa. Tantaràni-Baiboly ho zao ty raha niseho: “Laha vo nivita batisa Jesosy, le niboaky baka anaty rano ao. Nivoha ty lanitsy, le nihitani-Jaona ty fanahi-Ndranahary nijotso atao ho voromailala io, nandeha tanaboni-Jesosy teo. Nay koa nisy feo baka an-danitsy any nanao hoe: ‘Toy ro Anako teako sady ekeko.’ ” (Matio 3:16, 17) Lafa nahita noho naharè famantara io Jaona, le nihainy fa Jesosy ro Mesia. (Jaona 1:32-34) Lafa nalatsakini-Jehovah  tamy Jesosy ty fanahiny masy, tamy andro io, le nanjary Mesia ie. Jesosy ro nifilì-Ndranahary ho Mpitariky noho ho Mpanjaka.—Isaia 55:4.

⁹ Hita amy ty faminania amy Baiboly ao, noho ty safà-Ndranahary, voho ty famantara nameany tamy batisani-Jesosy io fa Jesosy ro Mesia. Fe baka aia Jesosy, le olo nanao akory ie? Ndao henteantsika ty raha volanini-Baiboly.

10. Ino ty ampianarini-Baiboly mikasiky ty fiainani-Jesosy talohani-niaviany tan-tany etoy?

¹⁰ Ampianarini-Baiboly hoe fa niay tan-danitsy any Jesosy, fa ela talohani-niaviany tan-tany etoy. Mivola Mika fa “fa liany fa ela” ro nampisy ty Mesia. (Mika 5:2) Matetiky koa Jesosy ro nivola fa fa niay tan-danitsy any ie talohani-naha olombelo azy. (Vakio Jaona 3:13; 6:38, 62; 17:4, 5.) Nifandramby manoka tamy Jehovah ie, ndre talohani-niaviany tan-tany etoy.

11. Manino Jehovah ro tena tea ani-Jesosy vatany?

¹¹ Tena tea ani-Jesosy vatany Jehovah. Ino ty antony? Satria niforoni-Ndranahary talohani-kila raha iaby ie. Zay ty antony ikaiha azy hoe: “Talanolo amy zavaboary iaby.” * (Kolosianina 1:15) Tea azy marè koa Jehovah, satria ie raiky avao ro niforoniny mivanta. Zay ro mahavy azy kaihy hoe “Anakilahy toka.” (Jaona 3:16) Jesosy raiky avao koa ro nampiasàni-Jehovah mba hamoròna ty kila raha iaby. (Kolosianina 1:16) Le Jesosy raiky avao koa ro kaihy hoe “ty Safà”, satria nampiasàni-Jehovah ie mba handay hafatsy noho didy ho ahi-ty anjely noho ty olombelo.—Jaona 1:14.

12. Ino ty ahaizantsika fa tsy raiky avao Jesosy noho Ndranahary?

¹² Maro ty mino fa raiky avao Jesosy noho Ndranahary. Kanefa tsy zay ty ampianarini-Baiboly. Mivola ty Baiboly fa nisy namoro Jesosy. Midika zay fa nana fanomboha ie. Fa Jehovah tsy mana fanomboha, satria ie ro namoro kila raha iaby. (Salamo 90:2) Anaki-Ndranahary  Jesosy, ka tsy nieritseritsy hitovy amy Ndranahary mihintsy. Ampianarini-Baiboly mazava soa fa bevata mandilatsy ty Anaky ty Baba. (Vakio Jaona 14:28; 1 Korintianina 11:3.) Jehovah raiky avao ro “Ndranahary Farany Ze Mahery.” (Genesisy 17:1) Ie ro farany ze be noho mana ty hery faratampony amy kila raha iaby.—Henteo Fanazavà Hevitsy 14.

13. Manino ty Baiboly ro mivola hoe “soraki-Ndranahary tsy hita maso” Jesosy?

¹³ Niaraky niasa an’arivony tapitrisa tao Jehovah noho Jesosy Anakiny, talohani-namorona ty lanitsy noho ty tany. Azo antoky fa nifankatea biby rozy! (Jaona 3:35; 14:31) Nalàni-Jesosy tahaky soa ty toetsini-babany, ka zay ro mahavy ty Baiboly hivola hoe “ie ro soraki-Ndranahary tsy hita maso.”—Kolosianina 1:15.

14. Akory ty nahavy Anakilahini-Jehovah teany marè io hanjary olombelo?

¹⁴ Naneky hiala tan-danitsy any anakilahini-Jehovah teany marè iny, mba hateraky an-tany etoy ka hanjary olombelo. Akory ty nahamety raha zay? Nanao fahagagà Jehovah ka nafindrany baka an-danitsy any ho an-kiboni-virijiny mana anara hoe Maria, ty aini-Anakilahiny io. Midika zay fa tsy nana baba olombelo Jesosy. Niteraky anakilahy lavorary Maria, le nikaihiny hoe Jesosy.—Lioka 1:30-35.

15. Manao akory ty ahaizanao soa ani-Jehovah?

¹⁵ Hahay raha maro mikasiky ani-Jesosy noho ty fiainany voho ty toetsiny iha, laha mamaky ty bokini-Matio, Marka, Lioka, noho Jaona. Kaihy hoe Filazantsara boky reo. Mitovy toetsy amy babany Jesosy, ka afaky  manampy anao hahay ani-Jehovah koa ty famakia ani-boky reo. Zay nahavy ani-Jesosy hivola hoe: “Ze nahita ahy, le nahita ty Baba koa.”—Jaona 14:9.

16. Ino ty nampianarini-Jesosy? Baka amin’ia ty fampianarany?

¹⁶ Maro ty olo mikaiky ani-Jesosy hoe “Mpampianatsy.” (Jaona 1:38; 13:13) “Ty vaovao soa mikasiky Fanjakà iny” ro raha raiky bevata amy ty raha nampianariny. Ino Fanjakà io? Fanjakà-Ndranahary an-danitsy any raha io, ka handay tany toy iaby sady handay fitahia ho ani-ze olo manoriky ty safàny. (Matio 4:23) Baka amy Jehovah iaby ty raha nampianarini-Jesosy. Nivola Jesosy hoe: “Tsy ahy ty fampianarako, fa ani-azy naniraky ahy iny.” (Jaona 7:16) Haini-Jesosy fa teani-Jehovah haharè vaovao soa iaby ty olo. Tsy ino zay fa ty hoe handay tany toy iaby ty Fanjakà-Ndranahary.

17. Taia Jesosy ro nampianatsy? Manino ie ro nandany ty heriny tamy fampianara olo?

¹⁷ Taia Jesosy ro nampianatsy? Tamy ze pilasy nahitany olo. Nampianatsy ie ndre an-dala eny io, ndre ambanivohitsy, ndre an-tanà bevata, ndre am-bazary, ndre amy pilasy ivavahan’olo, ndre an-tranon’olo any. Tsy mandiny olo hamonjy azy ie, fa ie avao matetiky ro mamonjy an-drozy. (Marka 6:56; Lioka 19:5, 6) Niezaky marè Jesosy sady nandany hery noho fotoa maro, lafa nampianatsy. Ino ty antony? Satria hainy fa zay ro tea-Ndranahary hataony, sady manoriky ty safàni-Babany avao koa ie. (Jaona 8:28, 29) Nitory koa Jesosy satria miferinay olo ie. (Vakio Matio 9:35, 36.) Hitany fa tsy nampianatsy ty marina mikasiky a Ndranahary noho ty Fanjakàny ty mpitariky fivavaha, ka ta hanampy olo farany ze maro haharè ty vaovao soa ie.

18. Ino ty toetsini-Jesosy teanao marè?

 ¹⁸ Nitea olo Jesosy sady nidary olo. Soa fanahy noho mora iresaha ie. Ndre ty ajà kelikely aza tea miaraky aminy. (Marka 10:13-16) Nanao ty rariny avao Jesosy. Halany ty kolikoly noho ty tsy rariny. (Matio 21:12, 13) Tsy nana zo loatsy ty ampela tamy androni-Jesosy sady tsy nihajà, fa Jesosy nanaja ty ampela avao. (Jaona 4:9, 27) Tena niambany koa Jesosy. Nanasa ty tombokini-mpianatsiny, ohatsy, ie ndraiky haly, kanefa ty mpanompo ro mpanao raha zay.—Jaona 13:2-5, 12-17.

19. Ino ty ohatsy mampiseho fa haini-Jesosy vatany ty raha ilan’olo sady ta hanampy an-drozy ie?

¹⁹ Haini-Jesosy ty raha tena nilan’olo, sady ta hanampy an-drozy ie. Hita raha zay lafa nampiasa ty heri-Ndranahary ie, ka nanao fahagagà mba hanafaha arety. (Matio 14:14) Namonjy ani-Jesosy, ohatsy, lahilahy boka raiky zay, le nivola hoe: “Laha teanao ty hampalio ahy, le ho vitanao raha zay.” Nalahelo Jesosy nahita ty arety noho ty fijaleani-lahilahy io. Nahaferinay azy ie, ka niteany hampea. Nampahitìni-Jesosy ty tanany le nikasiky azy ie, bakeo nivola taminy hoe: “Teako raha zay. Maliova iha.” Le niafaky ty aretini-lahilahy narary io! (Marka 1:40-42) Azonao an’eritseritsy va ty hafaleani-lahilahy io?

20, 21. Manino Jesosy ro ohatsy farany ze soa amy fanoriha ty safà-Ndranahary?

²⁰ Jesosy ro ohatsy farany ze soa amy fanoriha ty safà-Ndranahary. Tsy nivaliky tamy Babany ie ndre nisy ino ndre nisy ino, sady ndre ino ndre ino nataoni-fahavalony reo azy. Tsy nanota, ohatsy, Jesosy lafa nalàni-Satana fanahy. (Matio 4:1-11) Nisy tamy ty longoni-Jesosy tsy  nino hoe ie ro Mesia, ka nivola hoe: “Voa ty sainy.” Fe nataoni-Jesosy avao ty asa naniraha-Ndranahary. (Marka 3:21) Niraty fanahy tamy Jesosy ty fahavalony, fe tsy nivaliky tamy Ndranahary ie sady tsy nanohatsy hanao raty an-drozy mihintsy.—1 Petera 2:21-23.

²¹ Nampijalỳ marè Jesosy talohani-nahafatesany, fe mbo tsy nivaliky tamy Jehovah avao ie. (Vakio Filipianina 2:8.) Mba diniho moa ty raha niaretany tamy andro hahafaty azy! Sinambotsy ie satria nisy vavolombelo nanasara raha raty azy, nahazo sazy baka amy mpitsara miangatsy ie, nikizahini-vahoaky noho nampijalini-maramila, bakeo nifantsihin-drozy tamy hazo fijalea. Talohani-nahafaty azy, le nikoiaky ho zao ie:  “Vita!” (Jaona 19:30) Nivelomini-Jehovah ndraiky ie, telo andro tafarani-zay, ka nameany vata fanahy. (1 Petera 3:18) Nimpoly tan-danitsy any ie afaky herinandro vitsivitsy, le “nipetraky tan-kavana-Ndranahary teo”, sady nandiny zisiky hanaova-Ndranahary azy ho Mpanjaka.—Hebreo 10:12, 13.

22. Ino ty raha soa ho azontsika baka amy tsy fivalihani-Jesosy?

²² Teani-Jehovah hiay amy paradisa an-tany etoy tsika. Afaky mahazo raha zay tsika henanizao, satria tsy nivaliky tamy Babany mihintsy Jesosy. Hodinihintsika amy toko manaraky ao hoe manino ty fahafatesani-Jesosy ro mahavy antsika afaky hiay zisiky farany.