1, 2. Ino ty fanontanea eritseretin’olo maro?

NISY tsunami nandrava tanà raiky. Nisy lahilahy raiky nitifitsy olo tam-piangona tao, le maro ty naratsy noho nimaty. Nimatini-kansera ty ampela raiky manan’anaky limy mbo kelikely.

² Lafa miseho ty loza bevata manahaky ani-reo, le maro ty mivola hoe: “Fa nanino loatsy?” Maro ty mieritseritsy hoe manino ro atsiky fankalaina noho fijalea tany toy. Fa nieritseritsy manahaky ani-zay koa va iha?

3, 4. a) Ino iaby ty fanontanea napetrakini-Habakoka? b) Akory ty namaleani-Jehovah azy?

³ Resahini-Baiboly, fa nisy lahilahy tena nanam-pinoa a Ndranahary koa nametraky fanontanea manahaky ani-zay. Nanontany ani-Jehovah, ohatsy, Habakoka mpaminany hoe: “Manino ro ataonao mahita raha raty aho, sady henteanao avao ty haratia? Manino ro misy fandravà noho hasatà anilako etoa, sady manino ro misy fifamalea noho fifanohera ty etoa?”—Habakoka 1:3.

⁴ Hitantsika amy Habakoka 2:2, 3 ao ty namaleani-Jehovah ani-Habakoka noho ty nampitamànany fa hanao raha ie hanarena raha zay. Teani-Jehovah marè ty olombelo. “Midary anareo ie”, hoy ty Baiboly. (1 Petera 5:7) Laha halantsika ty mahita fijalea, le mbo mandilatsy lavitsy ani-zay ty falaina-Ndranahary raha io.  (Isaia 55:8, 9) Fe manino ro maro biby ty fijalea an-tany etoa? Hodinihintsika raha zay.

5. Ino ty volanini-ankamaroani-mpitariky fivavaha mikasiky ty fijalea? Ino ty volanini-Baiboly?

⁵ Lafa misy olo mijaly, le matetiky ty pasitera na ty mompera, na ty mpitariky fivavaha ro mivola fa sitrapo-Ndranahary raha zay. Misy koa ty mivola fa lahatsy baka amy Ndranahary ze kila raha iaby miseho amin’olo raiky, anatini-zay ty loza, sady tsy ho haintsika mihintsy hoe manino raha zay ro miseho. Mety hivola mihintsy aza ty olo sisany fa alà-Ndranahary hipetraky aminy any ty olo, anatini-zay ty ajà kelikely, ka zay ty antony mahafaty azy. Fe tsy marina raha zay. Tsy manao raha raty mihintsy Jehovah. Mivola ty Baiboly fa: “Sanatria amy Ndranahary marina iny ty hanao raha raty, sady sanatria amy azy Farany Ze Mahery iny ty hanao ty tsy rariny!”—Joba 34:10.

6. Manino ty ankamaroan’olo ro manome tsiny a Ndranahary amy fijalea iaby an-tany etoa?

⁶ Maro ty olo manome tsiny a Ndranahary amy fijalea iaby an-tany etoa, satria ataon-drozy fa Ndranahary ro manday tany toy. Fe fa nianarantsika tamy Toko faha-3 tao, fa Satana Devoly ro tena manday ani-zao tontolo zao.

7, 8. Manino ro maro biby ty fijalea an-tany etoa?

⁷ Volanini-Baiboly fa “zao tontolo zao iaby, le ambany fahefàni-azy raty iny eo.” (1 Jaona 5:19) Raty fanahy noho tsy miferinay olo Satana, azy mpanday tontolo toy iny. “Mamitaky ty tany iaby misy olo” ie. (Apokalypsy 12:9) Maro ty olo manahaky azy.  Zay mahavy tany toy feno haratiam-panahy, vandy, fankalaina io.

⁸ Mbo misy antony hafa koa mahavy ty fijalea. Nanohitsy a Ndranahary, Adama noho Eva le namindra ota tamy ty taranakiny. Mpanota iaby ty olo, ka manjary ta ho anabo mandilatsy ty olo hafa. Matetiky rozy ro mialy na mandeha mialy na manerisery ty namany. Manday fijalea raha iaby zay. (Mpitoriteny 4:1; 8:9) Mety ho azon-draha ‘raty sendra miseho amy fotoa tsy ampoizy’ koa ty olo, le hijaly. (Mpitoriteny 9:11) Mety ho tratsini-loza ty olo raiky laha sendra amy pilasy nisehoani-raha zay eo ie amy fotoa io.

9. Manino ro azontsika antoky fa misy antony kanao mbo engàni- Jehovah hisy ty fijalea?

⁹ Tsy Jehovah mihintsy ro mahavy ty fijalea. Tsy ie ro tokony hamea tsiny laha misy ty aly, ty famonoa olo, noho ty faneriserea. Tsy Ndranahary ro mahavy ty loza manahaky horohoron-tany, sikilony, noho ranobe rey. Fe mety hieritseritsy iha hoe: ‘Laha Jehovah ro farany ze mahery amy zao tontolo zao, manino ro tsy sakanany mba tsy hiseho loza rey?’ Haintsika fa tena tea antsika Ndranahary. (1 Jaona 4:8) Midika zay, fa tsy maintsy misy antony kanao mbo engàny hisy ty fijalea.

10. Ino ty nivolanini-Satana mikasiky ani-Jehovah?

¹⁰ Nifitahini-Devoly, Adama noho Eva tamy zariday Edena tao. Nasarani-Satana hoe tsy mahay manday Ndranahary. Misy raha soa hoy tsy namea-Ndranahary ani-Adama noho Eva. Ie hoy ro mahay manday mandilatsy ani-Jehovah, ka tsy misy ilàn-drozy a Ndranahary.—Genesisy 3:2-5; henteo Fanazavà Hevitsy 27.

11. Ino ty fanontanea tokony hovaleantsika?

 ¹¹ Tsy nanoriky ty safàni-Jehovah, Adama noho Eva, sady nanohitsy azy. Nieritseritsy rozy fa nana zo hifily hoe ino ty soa le ino ty raty. Akory ty nampisehoani-Jehovah hoe diso rozy sady ie koa ro tena mahay ty raha mahasoa an-drozy?

12, 13. a) Nanino mpanohitsy rey ro tsy avy le naripakini-Jehovah? b) Nanino Satana ro nengàni-Jehovah handay tontolo toy, le nanino ty olombelo ro nengàny hananga fanjakà?

¹² Tsy avy le naripakini-Jehovah, Adama noho Eva, fa nengàny hanan’anaky. Bakeo nengàny hifily ty taranakini-Adama noho Eva hoe ia ty tean-drozy ho mpanday an-drozy. Teani-Jehovah ho feno olo lavorary tany toy, ka tsy maintsy ho tanteraky raha zay ndre ino ndre ino ataoni-Devoly.—Genesisy 1:28; Isaia 55:10, 11.

¹³ Anjely an-tapitrisany ro nahita ty fandratiratia nataoni-Satana ani-Jehovah. (Joba 38:7; Daniela 7:10) Nengàni-Jehovah handeha ty fotoa mba hahità hoe marina na tsy marina ty safàni-Satana. Nengàny hananga fanjakà koa ty olombelo, ka Satana ty sefon-drozy, amy zay ho hita laha tsy mila ty fanampea-Ndranahary vatany rozy.

14. Ino ty voaporofo lafa nandeha ty fotoa?

¹⁴ Fa an’arivony tao zay ty olombelo ro niezaky nanday ty fiainany, fe mbo maro avao ty raha manahira. Voaporofo hoe mpavandy Satana. Tena mila a Ndranahary ty olombelo. Marina mihintsy raha nivolanini-Jeremia iny hoe: “Haiko soa lahy Jehovah, fa tsy ahin’olombelo ty lala ombany. Tsy natao handay raiky ty fiainany koa ty olo.”—Jeremia 10:23.

15, 16. a) Manino ro mbo engàni-Jehovah haharitsy ela ty fijalea? b) Manino Jehovah ro tsy manafaky ty raha manahira nataoni-Satana?

¹⁵ Manino ro mbo engàni-Jehovah haharitsy ela ty fijalea? Manino ro engàny hiseho ty raha raty fa tsy sakanany? Mila fotoa lavalava vo ho hita fa tsy mahay manday Satana. Nananga fanjakà sankarazany ty olombelo, fe tsy nisy tafaboaky. Ndre nivoatsy ty teknolozy noho ty siansy, le vomaiky manjeky avao ty tsy rariny, ty fahantrà, ty vonoan’olo, noho ty aly. Tsy ho sambatsy mihintsy tsika laha tsy Ndranahary ro manday antsika.

¹⁶ Sahala manoha ty fanjakàni-Satana Jehovah laha manafaky ty raha manahira nataoni-Satana. Raha tsy hataony mihintsy zay. Sady hanjary hieritseritsy koa ty olo hoe mahay manday raiky ty fiainany rozy. Fe vandy raha zay ka tsy hanoha ani-zay Jehovah. Tsy mavandy mihintsy ie.—Hebreo 6:18.

17, 18. Hataoni-Jehovah akory raha nisimbàni-Satana rey?

¹⁷ Haini-Jehovah areny ty raha raty nataoni-Satana noho nataon’olo tsy manoriky safà. Tsy misy raha tsy vita-Ndranahary. Haini-Jehovah hoe ombia vo tena ho voaporofo fa mpavandy Satana. Bakeo hataony paradisa amy zay tany toy. Hovelomy ndraiky ze “an-dolo any” iaby. (Jaona 5:28, 29) Tsy harary na ho maty sasy ty olo. Halàni-Jesosy tsy ho eo iaby ze kila raha raty nataoni-Satana. Hampiasa ani-Jesosy, Jehovah mba “handrava ty asani-Devoly.” (1 Jaona 3:8) Soa avao fa nahaliny Jehovah. Laha tsy zay, le tsy ho nahay azy tsika sady tsy ho niafaky nifily azy ho Mpanday antsika. (Vakio 2 Petera 3:9, 10.) Mbo mijaly tsika henanizao, fe  ampeany mba ho afaky hiaritsy.—Jaona 4:23; vakio 1 Korintianina 10:13.

¹⁸ Tsy miforosè antsika hanompo azy Jehovah. Nengàny hifily ze teantsika hatao tsika. Hodinihintsika ty mikasiky ani-raha zay.

19. Ino ty mampiavaky antsika olombelo? Manino ro tokony hahafaly antsika raha zay?

¹⁹ Tsy nataoni-Jehovah manahaky biby io tsika satria afaky mifily ze teantsika. Komandy voajanahary aminy ao ro manday ty biby, fa tsika afaky mifily ty fiaina teantsika, sady afaky manapa-kevitsy hanao raha mahafalifaly ani-Jehovah na tsy hanao ani-zay. (Ohabolana 30:24) Tsy manahaky masìny koa tsika, ka hoe ze raha ampanovy antsika avao ro tsy maintsy ataontsika. Teani-Jehovah ho sambatsy tsika ka nengàny hifily ty toetsy teantsika hanana, ty olo teantsika ho nama noho ty raha teantsika hatao amy ty fiainantsika.

20, 21. Tokony hifily hanao ino iha?

²⁰ Teani-Jehovah ho tea azy tsika. (Matio 22:37, 38) Falifaly ty baba raiky lafa mivola ty anakiny hoe: “Teako iha baba”, laha baka am-pony ty ivolanany raha zay, fa tsy niforosèva. Manahaky ani-zay koa Jehovah. Nengàny tsika hifily na hanompo azy na tsy hanompo azy. Nifily ty tsy hanompo azy Adama noho Eva voho Satana. Ka iha? Ino ty hofilinao?

²¹ Manompoa ani-Jehovah. An-tapitrisany ty olo fa nifily hanao ty raha teani-Jehovah ka hanohitsy ani-Satana. (Ohabolana 27:11) Ino ty azonao atao manomboky henanizao, mba ho avy amy tontolo vaovao any iha, ka tsy hijaly sasy? Hamaly ani-zay ty toko manaraky.