1, 2. Ia ty sisany amy ty nama-Jehovah?

IA TY teanao hinamà? Azo antoky fa ty olo teanao avao ro hataonao nama. Teanao laha mifankahazo soa nareo sady teanao ty toetsiny.

² Nisy olo nifilìni-Jehovah ho namany. Tanatini-zay, ohatsy, Abrahama. (Isaia 41:8; Jakoba 2:23) Niteani-Jehovah koa Davida. Nivola ie hoe ‘lahilahy teani-fony’ Davida. (Asan’ny Apostoly 13:22) ‘Farany ze teani-Jehovah’ koa Daniela mpaminany.—Daniela 9:23.

3. Ino ty nahavy ani-Abrahama, Davida, noho Daniela ho nama-Jehovah?

³ Akory ty nahavy ani-Abrahama, Davida, noho Daniela ho nama-Jehovah? Nivola tamy Abrahama, Jehovah hoe: “Nijanjy ty safàko iha.” (Genesisy 22:18) Ze olo miambany sady manoriky ty safàny ro ataoni-Jehovah nama. Afaky ho namany ndre firenena raiky. Nanazava tamy firenenan’Israely Jehovah hoe: “Oriho ty safàko, le ho Ndranaharinareo aho, le nareo ho oloko.” (Jeremia 7:23) Mila manoriky ty safàny koa iha laha ta ho namany.

4, 5. Ino ty ataoni-Jehovah mba hiarovany ty namany?

⁴ Mivola ty Baiboly fa mila fomba “hampitoroany ty heriny hanavota ze olo mivahatsy aminy amy ty fony iaby” Jehovah. (2 Tantara 16:9) Mampitamà ty namany Jehovah amy Salamo 32:8 ao hoe: “Hanoviko ze hahavy anao hahihitsy, le hatoroko anao ty lala tokony  hombanao. Hanoro hevitsy anao aho le hijilo anao ty masoko.”

⁵ Misy fahavalo mahery ta hanaka antsika tsy ho nama-Ndranahary. Fe ta hiaro antsika Jehovah. (Vakio Salamo 55:22.) Nama-Jehovah tsika ka manompo azy amy ty fontsika iaby. Tsy mivaliky aminy tsika ndre misy raha manahira marè aza. Nisy mpanao salamo natoky hoe ‘tsy hihozonkozo ie satria ankavanany eo Ndranahary’, le manahaky azy koa tsika. (Salamo 16:8; 63:8) Ino ty ataoni-Satana mba hanakàna antsika tsy hinama amy Ndranahary?

6. Akory ty nandratiratiani-Satana ty olombelo?

⁶ Nianarantsika tamy Toko faha-11 tao fa nasarani-Satana ho mpavandy noho tsy manao ty rariny Jehovah lafa tsy nanenga ani-Adama noho Eva hifily ze raha soa noho raty amin-drozy. Mivola koa ty Baiboly amy bokini-Joba ao fa mandratiraty ze olo ta hinama amy Jehovah koa Satana. Mivola Satana fa tsy fitiava a Ndranahary ro mahavy ty olo hanompo azy fa fitamànan-draha. Mivola mihintsy aza ie fa vitany ty mampivaliky ndre ia ndre ia amy Ndranahary. Hianatsy raha baka amy Joba noho ty fomba niarovani-Jehovah azy tsika.

7, 8. a) Nanao akory ty fahitàni-Jehovah ani-Joba? b) Ino ty nivolanini-Satana mikasiky ani-Joba?

⁷ Lahilahy soa fanahy Joba. Fa 3 600 tao teo ho eo zay ty nahafaty azy. Nivola Jehovah hoe tsy nisy nanahaky azy ty olo tan-tany etoy tamy zay. Nanaja marè ani-Jehovah ie, sady nalay raha raty. (Joba 1:8) Tena ninama-Jehovah vatany Joba.

⁸ Nivola Satana fa fitiavan-tena ro nahavy ani-Joba hanompo a Ndranahary. Hoy Satana tamy Jehovah:  “Tsy iha moa ro niaro azy noho ty tranony voho ty hananany iaby? Nitahìnao ty asa nataoni-tanany, le nanjary atsiky ty biby hareny tany toy. Fa mba amparo tse moa ty tananao, azafady, le kasiho ty hananany iaby, le henteo laha tsy hanozo anao amasonao eo ie.”—Joba 1:10, 11.

9. Nengàni-Jehovah hanao ino Satana?

⁹ Nandratiraty ani-Joba, Satana. Nivola ie fa fitamànan-draha avao ro anompoany ani-Jehovah. Vitany koa hoasany ty mampiala ani-Joba amy Jehovah. Tsy nekèni-Jehovah hevitsini-Satana zay, fe nengàny hitsapa ani-Joba ie mba hahità laha tena fitiava ro nahavy ani-Joba hinama amy Jehovah.

10. Nanao akory ty nanafihani-Satana ani-Joba, le nanao akory Joba?

¹⁰ Voalohany, nangalarini-Satana noho nivonoany iaby ty biby niharèni-Joba. Bakeo nivonoany ty ankamaroani-mpanompony. Rava iaby ty hanànani-Joba. Farany, nivonoani-Satana tamy tsioky mahery anakini-Joba folo rey. Fe tsy nivaliky tamy Jehovah mihintsy Joba. “Tsy nanota Joba tamy raha iaby rezay, sady tsy nanome tsiny a Ndranahary mihintsy.”—Joba 1:12-19, 22.

11. a) Ino koa ty nataoni-Satana tamy Joba? b) Ino ty nataoni-Joba?

¹¹ Mbo tsy nanekineky Satana. Nivola tamy Ndranahary ie hoe: “Kasiho zisiky amy ty taolany noho ty nofotsiny, le henteo laha tsy hanozo anao amasonao eo ie.” Le nataoni-Satana marary marè Joba. (Joba 2:5, 7) Fe mbo tsy nivaliky tamy Jehovah avao ie. Nivola Joba hoe: “Tsy haneky hivaliky mihintsy aho, zisiky itampera ty aiko.”—Joba 27:5.

12. Akory ty nampisehoani-Joba hoe mpavandy Satana?

 ¹² Tsy nisy fahaizani-Joba hoe Satana mandratiraty azy io, sady tsy hainy hoe nanino ie ro nijaly marè. Nieritseritsy ie hoe Jehovah ro nahavy ty fijaleany. (Joba 6:4; 16:11-14) Fe ndre zay, le tsy nivaliky tamy Jehovah mihintsy Joba. Mazava henanizay hoe tsy tea tena Joba. Tena tea a Ndranahary ie, le zay ro nahavy azy ho namany. Vandy iaby raha nivolanini-Satana rey!

13. Tsy nivaliky tamy Jehovah Joba. Ino ty vokatsini-raha zay?

¹³ Ndre tsy nihaini-Joba ty raha niseho tan-danitsy any, le tsy nivaliky tamy Jehovah ie sady nanaporofo fa raty Satana. Nameani-Jehovah raha soa maro Joba, satria tsy nivaliky taminy.—Joba 42:12-17.

14, 15. Ino ty fandratiratia ataoni-Satana amy ty lahilahy noho ty ampela iaby?

¹⁴ Misy fianara bevata azonao rambesy baka amy raha niseho tamy Joba iny. Mandratiraty antsika Satana henanizao. Volaniny hoe fitamànan-draha avao ro anompoantsika ani-Jehovah. Ho zao ty volanini-Satana amy Joba 2:4 ao: “Nofotsy soloni-nofotsy, sady ty raha iaby ananan’olo, le hameany hiarova ty ainy.” Midika zay fa ty lahilahy noho ampela iaby ro nasarani-Satana hoe tea tena, fa tsy Joba raiky avao. An-jatony tao tafarani-nahafaty ani-Joba, le mbo nandratiraty ani-Jehovah noho ty mpanompony avao Satana. Mivola, ohatsy, ty Ohabolana 27:11 hoe: “Mihendrea anako, le ampifalifaleo ty foko, mba hamaleako azy manaraty [na mandratiraty] ahy iny.”

¹⁵ Laha manapa-kevitsy hanoriky ty safàni-Jehovah noho tsy hivaliky aminy iha, le hanaporofo fa mpavandy Satana. Fanapahan-kevitsy farany ze soa ty hoe hanjary nama-Jehovah, ndre mila manao fiovà bevata aza  iha! Tena vatan-draha fanapahan-kevitsy io. Mivola Satana hoe hivaliky amy Jehovah iha lafa misy raha manahira. Fitahiny tsika soa hivaliky amy Jehovah. Ino ty ataony?

16. a) Ino iaby ty raha ataoni-Satana mba hisakàna antsika tsy hanompo ani-Jehovah? b) Ino ty raha mety hataoni-Devoly mba hisakàna anao tsy hanompo ani-Jehovah?

¹⁶ Mampiasa fomba maro sankarazany Satana mba hisakàna antsika tsy ho nama-Jehovah. Manafiky “manahaky liona mieronero mila olo hakapany io” ie. (1 Petera 5:8) Ka tseriky laha manaka anao tsy hianatsy Baiboly noho hanao ty marina ty namanao, na ty longonao, na ty olo hafa. Mety hieritseritsy iha hoe manafiky anao Satana. * (Jaona 15:19, 20) Manao kisary “anjelini-mazava” Satana. Fitahiny tsika soa hivaliky amy Jehovah. (2 Korintianina 11:14) Misy fomba hafa koa ampiasàny hisakàna antsika tsy hanompo ani-Jehovah. Ataony ze hahavy antsika hieritseritsy hoe tsy hisy dikany mihintsy ty fanompoantsika ani-Jehovah.—Ohabolana 24:10.

17. Manino tsika ro manoriky ty safàni-Jehovah?

¹⁷ Lafa manoriky ty safàni-Jehovah tsika, le manaporofo fa mpavandy Satana. Ino ty hanampy antsika hanoriky safà? Mivola ty Baiboly hoe: “Tiavo Jehovah Ndranaharinao amy ty fonao iaby noho ty vatanao iaby voho ty herinao iaby.” (Deoteronomia 6:5) Manoriky ty safàni-Jehovah tsika satria tea azy. Lafa  mitombo ty fitiavantsika ani-Jehovah, le teantsika hatao iaby ze raha ampanoviny antsika. Nanoratsy ho zao ty apostoly Jaona: “Ho zao fitiava a Ndranahary zao, le ty hanorihantsika ty didiny. Fe tsy mavesatsy ty didiny.”—1 Jaona 5:3.

18, 19. a) Ino ty raha sisany volanini-Jehovah hoe raty? b) Akory ty ahaizantsika fa tsy ampanovini-Jehovah raha tsy ho vitantsika mihintsy tsika?

¹⁸ Ino ty raha sisany volanini-Jehovah hoe raty? Misy ohatsy vitsivitsy amy efajoro hoe “ Ka Manao ze Raha Tsy Teani-Jehovah.” Mety hieritseritsy iha amy voalohany hoe tsy tena raty ty sisany amy raha reo. Fe lafa vakinao noho dinihinao soa andininy amy Baiboly ao reo, le ho hitanao fa fahendrea ty manoriky ty lalànani-Jehovah. Mety ho hitanao koa fa misy raha mila ovà amy fiainanao. Ndre mety ho sarotsy aminao aza ty miova kindraiky, le hilamin-tsay noho ho sambatsy  iha, satria nama-Ndranahary sady tsy mivaliky aminy. (Isaia 48:17, 18) Akory ty ahaizantsika fa ho vitantsika ty hiova?

¹⁹ Tsy ampanovini-Jehovah raha tsy ho vitantsika mihintsy tsika. (Deoteronomia 30:11-14) Manahaky tena nama io Jehovah, ka mahay antsika mandilatsy ty vatantsika. Hainy ty raha vitantsika noho tsy vitantsika. (Salamo 103:14) Nivola ty apostoly Paoly hoe: “Tsy mivaliky amy ty safàny Ndranahary, ka tsy hengàny hisy fakam-panahy hahazo anareo mihoatsy ze zakanareo, fa lafa misy fakam-panahy le hasiany lala hiboaha koa, soa ho zakanareo raha zay.” (1 Korintianina 10:13) Afaky matoky tsika fa hanome hery antsika avao Jehovah mba hahavitàntsika hanao raha soa. Hameany anao “ty hery fanampiny” soa hanampy anao hiaritsy raha manahira. (2 Korintianina 4:7) Afaky nivola ho zao Paoly lafa nahazo ty fanampeani-Jehovah  tanatini-fotoa manahaky ani-zay: “Mana hery handesiko mialy amy ty raha iaby aho, amy alalani-azy manome hery ahy iny.”—Filipianina 4:13.

20. Ino iaby ty toetsy tokony hotahafinao, le ino ty antony?

²⁰ Laha ta ho nama-Jehovah tsika, le tsy hoe miala amy ty raha volanini-Jehovah hoe raty avao, fa tea ty raha teany koa. (Romanina 12:9) Mivola ani-raha reo ty Salamo 15:1-5. (Vakio.) Miezaky hanahaky ty toetsini-Jehovah ty namany ka mampiseho “fitiava, hafalea, fiadana, fahari-po, hasoam-panahy, hasoa toetsy, finoa, fahalemeam-panahy, fifehezam-bata.”—Galatianina 5:22, 23.

21. Akory ty hampisehoanao ty toetsy tea-Ndranahary?

²¹ Akory ty ataonao mba hanananao toetsy soa reo? Mila mamaky noho mianatsy Baiboly tsy tampaky iha mba hahaizanao ty raha teani-Jehovah. (Isaia 30:20, 21) Laha ataonao raha reo, le hitombo ty fitiavanao ani-Jehovah. Hahavy anao ho ta hanoriky ty safàny raha zay.

22. Ino ty vokatsiny laha manoriky safàni-Jehovah iha?

²² Lafa misy fiovà tokony hataonao, le azo ampitovizy amin’olo manafaky akanjo fa raty raha zay, le misiky raiky vaovao. Mivola ty Baiboly fa tokony ‘hariantsika ty fomba raty taloha’, le sikinantsika “ty fomba vaovao.” (Kolosianina 3:9, 10) Mety tsy ho mora ty manao ani-zay. Fe lafa miova tsika sady manoriky ty safàni-Jehovah, le mampitamà hanome “raha soa bevata” antsika ie. (Salamo 19:11) Oriho ty safàni-Jehovah, le asehò fa mpavandy Satana. Manompoa ani-Jehovah amy fo tsy misy fitiavan-tena, fa tsy amy fitamàna raha amy hoavy. Hanjary tena nama-Ndranahary iha amy zay!