LAFA mamaky gazety, na manenty telè, na mijanjy radio iha, le misy resaky vonoan’olo, halatsy, aly, na raha raty avao ty ao. Mety ho iha mihintsy koa ro marary, na maty longo.

Eritsereto hoe:

• Zao va ty tea-Ndranahary hiainako noho hiainani- fianakaviako?

• Ia ty mba afaky manampy ahy amy raha mahazo ahy toy?

• Mba hisy va zao fiadana zao?

Mamaly ani-fanontanea reo ty Baiboly.

• Tsy hijaly sasy noho tsy ho antitsy voho tsy ho maty sasy ty olo.—Apokalypsy 21:4

• Ho afaky hitsambotsamboko ty malemy tomboky.—Isaia 35:6

• “Hahita ty masoni-jiky.”—Isaia 35:5

•  Hovelomy ndraiky ty maty. —Jaona 5:28, 29

• Tsy harary sasy ty olo. —Isaia 33:24

• Hana hany maro ty olo iaby. —Salamo 72:16

Mety hieritseritsy iha hoe: ‘Tsy nofy avao va zao?’ Fe Ndranahary mihintsy ro mampitamà fa sisa kely le hataony raha reo. Hazavanini-Baiboly hoe manao akory ty hanaovany ani-raha reo.

Manampy antsika amy raha hafa koa ty Baiboly. Atorony koa hoe ino ty tokony hatao laha ta ho sambatsy noho ho afa-po amy fiaina amy henanizao. Maro ty raha mampanahira antsika. Mety ho tsy fananan-drala ohatsy zay, na fikorontanani-tokantrano, na arety, na fahafatesani-longo. Afaky mampahery anao noho manampy anao amy raha zay ty Baiboly. Valeany ao, ohatsy, fanontanea retoa:

• Manino tsika ro mijaly?

• Ino ty hataoko amy raha manahira ahy toy?

• Afaky ho sambatsy va zahay trano raiky?

• Manao akory ty olo lafa maty?

• Mbo ho hitantsika va longontsika fa nimaty rey?

• Azo antoky va fa hatao-Ndranahary iaby ty raha nampitamàniny?

 Ta hahay ty raha ampianarini-Baiboly iha, kanao mamaky ani-boky toy. Henteo fanontanea ambany pejy reo, satria hanampy anao hahazo soa ty raha volanini-Baiboly raha zay. Olo an-tapitrisany ro tea mianatsy Baiboly miaraky amy Vavolombeloni-Jehovah. Mitamà zahay fa ho teanao koa raha zay. Loniky lahy iha hotahì-Ndranahary lafa mianatsy Baiboly!