Lafa mbia ty ampela kristiana ro mila misaron-doha, le ino ty antony? Nahazo ty hery ty fanahy masy Paoly mba hanoratsy mikasiky raha zay. Mila ty tari-dala nameany tsika mba hahaiza ty tokony hatao mba hanome voninahitsy Ndranahary. Nivolany Paoly amy 1 Korintianina 11:3-16 ao ty raha telo mila dinihy: 1) Lafa manao ino ty ampela ro mila misaran-doha? 2) Aia ty tokony hanaovany raha zay? 3) Ino ty antony anaovany raha zay?

Lafa manao ino ty ampela ro mila misaron-doha? Lafa mivavaky noho maminany. (Andininy 4, 5) Miresaky amim-panajà amy Jehovah ty hoe mivavaky. Fa ty hoe maminany henanizao, le midika hoe mampianatsy ty fahamarina amy Baiboly ao. Ta hivola va Paoly hoe mila misaron-doha avao ty ampela, saky mivavaky na mampianatsy Baiboly? Tsy zay, fa mianky amy ty hoe aia ty anaovany raha reo.

Aia ty tokony hanaovany raha zay? Amy ty fianakavia noho ty fiangona eo. Hoy ty asa Paoly: ‘Ty lahilahy ro loha ty ampela, ze ampela iaby mivavaky na maminany ka tsy misaron-doha, le mampahamenatsy ty lohany.’ (Andininy 3, 5) Ty lahilahy ro natao Jehovah ho loha ty ampela  amy fianakavia eo. Hampahamenatsy ty valiny ty ampela, laha manao ty andraikitsy amea Jehovah ty lahilahy, fe tsy mampiseho hoe maneky ty fahefàny. Laha voatery mampianatsy Baiboly anila valiny eo ohatsy ie, le mila misaron-doha mba hampisehoa fa ekèny ty fahefàny. Hisaron-doha avao ie, ndre vita batisa ndre tsy vita batisa ty valiny, satria ie ro loham-pianakavia.  * Manahaky any zay avao koa, fa hisaron-doha ie lafa mivavaky na mampianatsy, laha eo ty anany tsy ampy tao vita batisa. Tsy hoe ie ro loham-pianakavia, fa rahalahy ie, ka ty lahilahy vita batisa ro namea fahefà amy fiangona eo.

Ka ty amy fiangona eo? Hoy Paoly: “Laha misy ta hifanankany mba hanaraha lily hafa, le tsy mana lily hafa zahay, ndre fiangona Ndranahary reo.” (Andininy 16) Ty lahilahy vita batisa ro voatingy ho lohany amy fiangona kristiana eo. (1 Timoty 2:11-14; Hebreo 13:17) Ty lahilahy avao ro voatingy ho anti-panahy noho mpanampy amy fanompoa, mba hikarakara ty aondry Ndranahary. (Asan’ny Apostoly 20:28) Fe mety hampanaovy ty andraikitsy ty rahalahy mahafeno fepetra ty ampela Kristiana kindraindraiky. Mety hampitarihy fivoria aloha ty fanompoa, ohatsy, ie laha tsy misy rahalahy mahafeno fepetra ty manatriky eo. Mety hitariky fampianara Baiboly an-tranon’olo any miaraky amy rahalahy raiky koa ie. * Hisaron-doha ie amy zay, mba hampisehoa fa ekèny ty hoe andraikitsy atoka ho ahy ty lahilahy ro ataony. Mbo asa ty fiangona avao koa raha reo, laha ty marina.

Fe tsy voatery hisaron-doha ty ranabavy amy ty raha hafa maro. Tsy mila manao raha zay, ohatsy, ie lafa mamaly teny am-pivoria any, mitory santrano miaraky amy valiny  na lahilahy hafa vita batisa, mampianatsy ty anany tsy vita batisa na mivavaky miaraky aminy. Laha mana fanontanea ty ranabavy, ka tsy hainy soa ty valiny, le afaky manao fikaroha ie.  * Laha mbo tsy azony antoky avao ty tokony hataony, sady mivola aminy ty feo ty fieritseretany hoe mila misaron-doha ie, le azony atao soa raha zay, araky ty hita amy sary eo.

Ino ty antony anaovany raha zay? Hoy ty andininy faha- 10: “Zay ty antony andesa ty ampela mariky amy lohany eo, le mariky ty fanajà fahefà, satria eo ty anjely.” Misy antony roe volaniny eo. Voalohany, ho “mariky ty fanajà fahefà.” Atoro ty ampela amy raha zay fa manaja ty fahefà namea Jehovah ty lahilahy amy fiangona eo ie, lafa misaron-doha. Atorony amy zay koa fa tea any Jehovah noho tsy mivaliky aminy ie. Faharoe, “satria eo ty anjely.” Manino ro misy vokany amy ty zavaboary ara-panahy mahery reo ty fanaova ty ampela saron-doha?

Mahakinto ty anjely ty mahita hoe ekè ty fahefà Jehovah amy fandaminany ao, ndre an-danitsy any zay, ndre an-tany etoy. Mahasoa an-drozy koa ty mahita olombelo tsy lavorary maneky any fahefà io. Mila maneky ty fahefà Jehovah rozy satria fa nisy anjely maro tsy nanao raha zay. (Joda 6) Mety ho hita ty anjely hoe misy ranabavy mana traikefa noho nahita fianara sady mahay mihoatsy ty rahalahy raiky amy fiangona eo, fe maneky soa ty fahefàny. Vasa Kristiana voahosotsy mihintsy ranabavy io, sady mpiray lova amy Kristy. Hanjary ho anabo mandilatsy ty anjely mihintsy  ranabavy zay, sady hiaraky manjaka amy Kristy an-danitsy any. Modely ho ahy ty anjely tokoa rozy rey henanizao! Voninahitsy bevata ho ahy ty ranabavy iaby ty mampiseho tsy fivaliha amy ty anjely tsy mivaliky an-tapitrisany reo, satria miambany noho manoriky safà ie, ka tsy mivaliky noho maneky azy mitariky reo!