1, 2. Ino ty asa fanorena ataonao henanikio? Manino raha io ro mila ataonao soa?

HAINAO va fa mikofokofoky mamboatsy trano iha henanikio? Fa maromaro ty asa vita, fe mbo be ty tavela. Tapa-kevitsy iha fa ndre ho vy ndre ho vato, le tsy haneky hijano iha, sady tsy hiveraky. Hainao fa mila ataonao soa raha io satria mianky amy zay ty fiainanao, noho ty hoavinao mihintsy aza. Fa manino? Satria iha mihintsy ro ohary amy trano aory io!

² Nitindria Joda mpianatsy soa asa fanorena ataonao amy ty vatanao io. Lafa nampirisiky ty Kristiana ‘hijano amy fitiava ndranahary ao’ ie, le nivola koa hoe ino ty tena hanampy an-drozy hahavita raha zay. Hoy ty asany: “Miorena soa amy ty finoanareo farany ze masy.” (Joda 20, 21) Ka ino ty azonao atao mba hahavy anao hiory soa, na hoe hana finoa matanjaky marè, mba hijànonanao amy fitiava Ndranahary ao? Ndao tsika handiniky karazan-draha telo afaky manampy anao.

3-5. a) Manao akory ty tea Satana hieritseretantsika ty lalàna Ndranahary? b) Manao akory ty tokony ho fahitàntsika raha rey? Hazavao amy ohatsy.

³ Voalohany, mila hamafisintsika ty finoantsika hoe mahasoa ty lalàna Ndranahary. Maromaro ty fitsipiky mikasiky  fandaisam-bata nihitanao tamy boky toy tato. Manao akory ty fahitànao raha rey? Ta hamitaky anao Satana, mba hahavy anao hieritseritsy hoe maneritery ty lalàna Jehovah noho ty torolalany, sady mampijaly mihintsy aza. Nahavoa tetikiny io ta Edena any, ka le liany nampiasàny zisiky henanizao. (Genesisy 3:1-6) Ho azony amy tetiky zay koa va iha? Mianky amy ty fanenteanao raha avao ty valiny zay.

⁴ Eritsereto moa hoe mandehandeha amy pilasy raiky soasoa biby iha. Henteanao, misy vala vy miranga ty aloha ao. Ataho raha mahakinto ty anatiny ao! Mety ho tsy ilà loatsy ty fahitànao vala iny, fa raha manakantsaka anao avao. Fe lafa manerinery soa iha, le mahita liona masiaky mitingatinga tindroky raiky! Hainao amy zay ty dika vala iny: Fiarova raha io. Misy mpitindroky loza mitingatinga anao koa va? Zay aza! Mamepetsy ho zao ty Baiboly hoe: “Mieritsereta soa noho miambena, satria ty Devoly fahavalonareo miriorio manahaky liona mieronero mila olo hakapany io.”—1 Petera 5:8.

⁵ Mpitindroky tsy saky Satana. Tsy tea Jehovah ho azony tsika, ka nanao lalàna ie mba hiarova antsika amy ty ‘teti-dratiny’ maro biby. (Efesianina 6:11) Ka lafa mametsivetsy ty lalàna Ndranahary tsika, le tokony hahatiaro fa porofo ty fitiava Babantsika an-danitsy any iny raha rey. Amy zay, le ho fiarova noho hafalea ty ho fahitàntsika raha rey. Hoy ty asa Jakoba mpianatsy: “Ze manenty soa ty lalàna tsy misy handra manday fanafaha, noho mahavita manao raha zay avao, ... le ho sambatsy ie lafa manoriky.”—Jakoba 1:25.

6. Ino ty fomba farany ze soa hanampy antsika hino fa mahasoa ty lalàna Ndranahary noho ty torolalany? Manomeza ohatsy.

⁶ Ty fanoriha ty didy Ndranahary, azy Mpanome lalàna iny, ro fomba farany ze soa hanatanjaha ty finoa azy. Hieky koa tsika amy zay fa misy antony kanao nameany lalàna rey. Tafilitsy amy “lalàna Kristy”, ohatsy, ty hoe ampianaro ty olo mba ‘hanaraky ze raha iaby nandidiany.’  (Galatianina 6:2; Matio 28:19, 20) Vatan-draha amy ty Kristiana koa ty miaraky mivory avao, mba hanompo any Jehovah noho hifampahery. (Hebreo 10:24, 25) Mampirisiky antsika hivavaky matetiky noho baka amy fo koa Ndranahary. (Matio 6:5-8; 1 Tesalonianina 5:17) Lafa manoriky didy reo tsika, le mieky fa baka amy fitiava ty nanomeza raha rey. Hahatsapa fifalea noho fahafaham-po tsy ho hitantsika amy tontolo mikoronta toy eto mihintsy tsika amy zay. Ka laha eritseretinao ty soa fa nirambesinao tamy fanoriha ty lalàna Ndranahary, tsy vomaiky va iha mino hoe mahasoa vatany raha rey?

7, 8. Laha misy matahotsy hoe mety tsy ho vitany ty hanoriky avao ty safà Jehovah, ino ty fampahereza amea ty Baiboly azy?

⁷ Matahotsy ty olo sisany hoe mety ho sarotsy loatsy aminy ty hanoriky ty lalàna Jehovah, lafa mandeha ty fotoa. Laha sendra mieritseritsy ho zay iha, le tiarovo Isaia 48:17, 18 toy: “Zaho Jehovah ro Ndranaharinao, Azy mampianatsy anao hana fiaina soa iny, Azy mampandeha anao amy lala tokony handehananao iny. Laha mba nanaraky ty didiko iha zay, le ho nanahaky vavarano io ty fiadananao sady ho nanahaky lozoky an-driaky eny io ty fahamarinanao!”  (Isaia 48:17, 18) Tsy hitanao va hoe mampahery vatany safà reo? Fa nieritseretinao va ty tena dikany raha reo?

⁸ Ampitiarovy Jehovah antsika eo, fa mahita hasoava tsika laha manoriky ty safàny. Misy raha roe ampitamàniny antsika, laha manao raha zay tsika. Voalohany, hanahaky vavarano io ty fiadanantsika, na hoe hanahaky rano be mivary moramora noho tsy mienieny. Faharoe, hanahaky lozoky an-driaky eny io ty fahamarinantsika. Laha mitsanga an-tsonin-driaky eny iha le hahita lozoky midofotsy eo. Hainao fa tozoro ho avy eo avao lozoky rey, sady tsy hijano mihintsy. Mampitamà Jehovah fa hanahaky zay koa ty fahamarinanao. Tsy hengàny ho lavo mihintsy iha, laha mbo miezaky tsy hivaliky aminy! (Vakio ty Salamo 55:22.) Midosiky ty fo vatany fampitamàna reo! Tsy manatanjaky ty finoantsika any Jehovah va raha zay? Tsy vomaiky va tsika mino fa mahasoa ty lalànany?

9, 10. a) Manino ro raha kendrè soa vatany ho ahy ty Kristiana ty fahamatora? b) Manino ro ahazoa fifalea ty fomba fanentean-drahan’olo araky ty fanahy?

⁹ Hiresaky ty raha faharoe amy fanorena iny tsika henanizao. Hoy ty Baiboly: “Mba mandrosoa malaky ho amy fahamatora tsika.” (Hebreo 6:1) Raha kendrè soa ho ahy ty Kristiana vatany ty fahamatora, sady azony tratsiry soa. Tsy manahaky fahalavoraria io raha zay. Tsy afaky ho lavorary tsika, fe afaky ho matotsy vatany. Sady ho soasoa ty manompo any Jehovah lafa mihamatotsy tsika. Ino ty antony?

¹⁰ Olo araky ty fanahy ty Kristiana matotsy. Mitovy fomba fanentean-draha amy Jehovah ie. (Jaona 4:23) Hoy Paoly: “Ty olo araky ty fanahy, mampifantoky ty sainy amy ty raha ty fanahy.” (Romanina 8:5) Tsy manday fifalea ty fomba fanentean-drahan’olo araky ty nofotsy, satria mahavy ty olo tsy hieritseritsy laha tsy ty vatany avao, tsy hahajilo lavitsy, sady ho tandrena amy drala noho hanana. Fa ty olo mana  fomba fanentean-draha araky ty fanahy, le falifaly avao, satria mahavy ty olo hahatiaro any Jehovah, azy “Ndranahary falifaly” iny raha io. (1 Timoty 1:11) Maniry marè hampifalifaly any Jehovah ty olo araky ty fanahy, sady falifaly avao ndre eo aza ty fitsapà. Ino ty antony? Satria afaky mampiseho ie amy zay hoe tsy mivaliky, sady afaky manaporofo hoe mpavandy Satana. Mahafalifaly ty fo azy Babantsika an-danitsy any iny raha zay!—Ohabolana 27:11; vakio ty Jakoba 1:2, 3.

11, 12. a) Ino ty raha nivolany Paoly mikasiky ty fahaiza mandiniky? Ino ty dika ty safà nadika hoe “nizary”? b) Ino ty ilà mba hahavy ty vata hahavita fihetsiky mifanaraky soa?

¹¹ Mila mizatsy tsika, vo manjary olo araky ty fanahy noho matotsy. Henteo moa andinin-teny toy: “Ty ventin-kany, le natao ho ahy ty olo matotsy, mana fahaiza mandiniky fa nizary hanavaky ty soa noho ty raty, satria nampiasà.” (Hebreo 5:14) Mariho fa nivola Paoly eo hoe “nizary” ty fahaiza mandiniky. Nampiasa safà grika raiky fivolanin’olo amy pilasy fanaova sporo ta Gresy any ie teo. Azo adika koa raha io hoe ‘nizary manahaky mpanao sporo io.’ Ino iaby ty atao amy fanazaram-bata zay?

¹² Mbo tsy zatsy manao fihetsiky mifanaraky ty vatantsika, laha vo teraky tsika. Tsy hay ty anakajà, ohatsy, ty handehana ty tombony na ty tanany lafa ahetsiny. Farany, ty tanany avao ro mety hahavoa ty tarehiny, ka mety hahataitsy na hahasosotsy azy. Fe mihazatsy tsikelitsikely ty vatany, lafa ampiasàny. Manjary mahay milaly ie, mianatsy mandeha, bakeo manomboky lomay lafa bebe. * Zay ty ahy ty ajà, fa manao akory, hoasanao azy mpanao sporo iny? Mitsamboko marè ie, bakeo mivalibaliky anabo eny. Tsy misy pitotsy  amin’io ty fihetsikiny fa mifanaraky soa. Mieky marina iha hoe fa zatsy ie! Tsy niaviavy fahatany fahaiza zay, fa nila fanazaram-bata tanaty ty lera maro. Fe ndre eo zay, le “mahasoa kelikely avao fampiasàm-bata” zay hoy ty Baiboly, fa laha ty fahaiza mandiniky ro zary, le ho maro biby mandilatsy any zay ty hasoava ho azo!—1 Timoty 4:8.

13. Manao akory ty azontsika anazara ty fahaizantsika mandiniky?

¹³ Maro ty hevitsy nihitantsika tamy boky toy tato, hanampy anao hanazatsy ty fahaizanao mandiniky. Ty hahavy anao ho olo araky ty fanahy noho tsy hivaliky amy Jehovah ro kendrè amy fanazara zay. Saky hanapa-kevitsy iha, le diniho soa ty torolala noho ty lalàna Ndranahary, sady mivavaha mikasiky raha zay. Eritsereto avao hoe: ‘Ino ty lalàna na torolala ty Baiboly mifandramby amy raha zay? Manao akory ty hanorihako raha zay? Ino ty hampifalifaly azy Babako an-danitsy any iny?’ (Vakio ty Ohabolana 3:5, 6; Jakoba 1:5) Manazatsy marèrè ty fahaizanao mandiniky iha, laha manao ho zay avao saky hanapa-kevitsy. Ho olo araky ty fanahy iha, lafa manao fanazara zay.

14. Tokony haniry hanao ino tsika laha ta handroso avao? Fe ino ty raha tsy tokony hohalinontsika?

¹⁴ Mbo mila mitombo na mandroso amy ara-panahy avao tsika, ndre fa matotsy aza. Ty hany ro mampitombo. Hoy Paoly: “Ty ventin-kany, le natao ho ahy ty olo matotsy.” Mila ventin-kany ara-panahy avao vatany iha, mba hana finoa matanjaky marè. Hendry iha lafa manoriky ty raha ianaranao, sady “ty fahendrea ro vatan-draha marè”,  hoy ty Baiboly. Dikany zay, mila miezaky tsika mba haniry hihina ty hany ara-panahy lafovily baka amy Babantsika iny. (Ohabolana 4:5-7; 1 Petera 2:2) Fe tsy tokony haha bohaboha antsika ty fahaiza noho ty fahendrea azontsika. Mila mandiniky ty vatantsika matetiky tsika, tsy no ho misy firengerengea na toetsy raty hafa, mamahatsy noho mitombo am-pontsika ao. Nivola Paoly hoe: “Mandiniha tena avao mba hahità laha amy finoa ao nareo na tsy ao, sady anovo hay avao ty vatanareo.”—2 Korintianina 13:5.

15. Manino ro ilà vatany ty fitiava mba hahavy antsika handroso ara-panahy?

¹⁵ Ndre fa vita ty famboara trano raiky, le mbo misy asa atao avao. Ilà ty mikolokolo raha io, mamboatsy ty simba, le vasa koa manampy efitsy. Ka manao akory ty amintsika? Ino koa ty ilà mba hahavy antsika ho matotsy noho mba hikolokoloa ty finoantsika? Ty fitiava ro ilà marè. Mila miezaky ho tea any Jehovah noho ty finoa raiky amintsika tsika. Laha tsy manam-pitiava tsika, le tsy hisy dikany ty fahaizantsika noho ty raha ataontsika, fa hanahaky feo mantsintsiny io avao. (1 Korintianina 13:1-3) Ty fitiava ro hahavy antsika ho Kristiana matotsy noho handroso ara-panahy.

16. Ino ty toe-tsay tea Satana hanana ty olo, le ino ty fitaova namea Jehovah antsika mba hiarovantsika ty vatantsika amy raha zay?

¹⁶ Ino amy zay ty raha fahatelo manampy amy fanorena iny? Mila miamby soa amy ty fandinihinao raha iha, laha ta hiory soa noho hanori-dia any Kristy vatany. Hay azy mpanday tontolo toy iny ty manao ze hahavy ty olo hifantoky amy lafy ratin-draha, noho ho marikari-dava voho hamoy fo. (Efesianina 2:2) Mikai-doza amy ty Kristiana toe-tsay zay, manahaky trano hazo hany neno io. Soa avao fa amea Jehovah fitaova hiarovantsika ty vatantsika amy raha zay tsika. Tsy ino zay fa ty fitamàna.

17. Manao akory ty ampisehoa ty Baiboly fa vatan-draha ty fitamàna?

 ¹⁷ Mitanisa fialia ilàntsika amy aly atao amy Satana noho ty tontolony, ty Baiboly. Ilà vatany, ohatsy, ty fiarovan-doha, na ty “fitamàna fanavota.” (1 Tesalonianina 5:8) Hay ty maramila taloha tany fa tsiela avao le ho maty ie, laha tsy manao fiarovan-doha. Vita amy vy raha io matetiky, le anisia anabo satroky lamba na angozy. Miaro ty loha tsy ho voadofotsy marè loatsy raha io, satria miebotsy avao ze raha midofotsy eo, ka tsy maharary marè. Manahaky fiarovan-doha io ty fitamàna, satria miaro ty sainao, na ty fandinihanao raha.

18, 19. Ino ty modely nengà Jesosy ho ahintsika? Manao akory ty hanahafantsika azy?

¹⁸ Nitiarovy Jesosy avao ty raha nitamaniny. Modely farany ze soa ho ahintsika ie amy raha zay. Tiaronao va ty raha nahazo azy tamy haliky taloha nahafatesany iny? Nisy namany marìny raiky namadiky azy mba hahazoa drala. Ty raiky nanao kisary tsy nahay azy. Ty ilany nilay, ka nanenga azy. Nandà azy koa ty firenena raiky taminy, ka nangataky tamy ty maramila romanina mba hamono azy amy hazo fijalea eo. Mbo tsy nisy olo niaritsy fitsapà sarotsy manahaky zay ndraiky! Ka ino ty nanampy azy hiaritsy? Hoy ty Hebreo 12:2: “Sady lomay tsika ro manenty soa azy Mpitariky Bevata Marè noho Mpandavorary ty finoantsika iny, tsy ia zay fa Jesosy. Niaritsy fijalea moa ie, satria teo fifalea natao talohany teo iny, ka tsy nidary henatsy, le nipetraky tankavana sezi-mpanjakà Ndranahary teo.” Nitiarovy Jesosy avao “fifalea natao talohany teo iny.”

¹⁹ Fifalea manao akory natao talohany eo io? Falifaly ie satria hainy fa handramby anjara amy fanamasina ty anara Jehova ie, laha miaritsy. Hainy koa fa hanome porofo bevata marè ie hoe mpavandy Satana. Zay ty raha nitamàniny, le tsy nisy nahafalifaly azy mandilatsy any zay! Hainy koa fa laha tsy mivaliky ie, le hamea Jehovah kadò bevata toy: Ho  tafaraky amy Babany ndraiky ie lafa afaky kelikely. Hasoan-draha zay! Nitiarovy Jesosy avao fitamàna mahafalifaly zay, lafa niaritsy raha farany ze sarotsy ie. Mila manao manahaky zay koa tsika. Misy fifalea koa ty alohantsika eo: Amea Jehovah voninahitsy tsika kiraidraiky, satria engany handramby anjara amy ty fanamasina ty anarany bevata. Afaky manaporofo koa tsika fa mpavandy Satana, laha mifily any Jehovah ho mpanday antsika, sady mijano amy fitiavany ao, ndre ino ndre ino fitsapà na fakam-panahy mahazo antsika.

20. Ino ty hanampy anao hieritseritsy raha soa noho ho be fitamàna?

²⁰ Tsy hoe maniry hanome kadò ty mpanompony tsy mivaliky avao Jehovah, fa fa tsy lininy mihintsy ty hanao raha zay! (Isaia 30:18; vakio ty Malakia 3:10.) Mahafalifaly azy ty manome ze raha soa tea ty mpanompony. (Salamo 37:4) Laha zay, le tiarovo soa ty raha tamaninao. Falio ty manahaky tontolo Satana toy, satria lafy ratin-draha avao ro ifantohany, sady maloto say, noho mieritseritsy ty raha raty ho soa. Laha ambiambinao hoe militsy tsikelitsikely an-tsainao ao noho am-ponao ao ty toe-tsay zao tontolo zao, le misolohoa amy Jehovah mba hahazo “ty fiadana Ndranahary azy bevata marè mandilatsy ty eritseritsy iaby iny.” Hiaro ty fonao noho ty sainao fiadana io.—Filipiana 4:6, 7.

21, 22. a) Ino ty raha soa biby tamàny ty “vahoaky be”? b) Ino amy raha tamàny io ro teanao marè? Tapa-kevitsy hanao ino iha?

 ²¹ Mana fitamàna soa biby vatany iha! Mba eritsereto tse moa ty fiaina mandìny anao tsy ho ela, laha anaty ty “vahoaky be” ho tafaboaky velo amy “fahoria bevata” iha! (Apokalypsy 7:9, 14) Ho hetra iha amy zay, satria fa tsy eo sasy Satana noho ty demoniany. Ho sarotsy aminao aloha ty hametsivetsy any zay. Ia amintsika vatany moa ro fa niay tamy tontolo tsy misy fitaoman-draty Satana zao? Hasoan-draha ty hanova tany toy ho paradisa, ambany fitariha Jesosy noho ty 144 000! Manitranitra biby tsika mieritseritsy hoe tsy hisy sasy ty arety noho ty handra iaby, hitsena ty longontsika fa nimaty rey tsika, le hanahaky ty naniria Ndranahary azy ty fiainantsika! Lafa miova tsikelitsikely ho lavorary tsika, le mihamarìny koa ty kadò bevata raiky resahiny amy Romanina 8:21 ao. Tsy ino zay fa “ty fahafaha be voninahitsy ahy anaky Ndranahary reo.”

²² Bevata lavitsy mandilatsy ty azonao eritserety fahafaha tea Jehovah ho azonao zay. Ho azonao raha zay laha manoriky safà iha. Ka sandra miezaha marè hanoriky ty safàny avao, sanandro sanandro. Ataovo vatany ze hahavy anao hiory soa amy ty finoanao masy marè, le hijano amy fitiava Ndranahary ao zisiky farany iha!