Ho ahinareo ze tea any Jehovah,

“Ho hainareo ty marina, le ty marina hanafaky anareo”, hoy ty asa Jesosy. (Jaona 8:32) Mampahery vatany safà reo! Sa tsy zay? Mbo afaky mahay ty marina avao hoy tsika ndre atsiky vandivandy ty fiaina amy “andro farany” toy. (2 Timoty 3:1) Tiaronao va tamy iha vo naneky vatany ty fahamarina amy Safà Ndranahary ao iny? Nanitranitra biby iha tamy zay!

Ilà vatany ty mahay soa ty fahamarina noho manambara raha zay amin’olo hafa. Fe mila miay mifanaraky amy fahamarina koa tsika. Mila mijano amy fitiava Ndranahary ao tsika, laha ta hanao raha zay. Manao akory zao? Nihazavàny Jesosy raha zay tamy haliky taloha nahafatesany iny. Nivola tamy apostoliny tsy nivaliky rey ie hoe: “Tsy hiala amy ty fitiavako nareo, laha manoriky ty didiko, manahaky ty anorihako ty didy Baba noho tsy ialako amy ty fitiavana.”—Jaona 15:10.

Henteo soa fa tsy niala tamy ty fitiava Ndranahary, Jesosy, lafa nanoriky ty didy Babany. Mila manoriky ty fahamarina avao koa tsika sanandro, mba tsy hiala amy ty fitiava Ndranahary. Hoy koa Jesosy tamy haliky iny: “Laha hainareo raha rezay, le sambatsy nareo laha manoriky azy.”—Jaona 13:17.

Le fa mitamà lahy zahay fa hanampy anao hanoriky ty fahamarina avao boky toy. ‘Hijano amy fitiava Ndranahary ao’ avao iha amy zay, sady ‘hijilo ty fiaina zisiky farany.’—Joda 21.