FIANARA 06
Nanao Akory ty Nampisy ani-Raha Iaby Zao?
“Namoro ty raha iaby [Ndranahary].” (Apokalypsy 4:11) Mino ani-zay va iha? Mieritseritsy ty olo sisany hoe tsy nisy namoro raha iaby zao. Laha zay ie, le nisinisy fahatany avao zany tsika. Fa laha Jehovah Ndranahary ro namoro antsika, le azo antoky hoe misy antony kanao nanao ani-zay ie. a Diniho ty raha volanini-Baiboly mikasiky ty nampisy ani-raha iaby zao, le manino ro marina raha zay.
1. Nanao akory ty nampisy ani-raha iaby zao?
Hoy ty Baiboly: “Tamy voalohany any, le namoro ty lanitsy noho ty tany Ndranahary.” (Genesisy 1:1) Mieky ty ankamaroani-mpahay siansy hoe nisy fanombohany raha iaby zao. Ino ty natao-Ndranahary lafa namoro ie? Nampiasa ty heriny ie, zany hoe ty fanahy masy, mba hanaova ani-raha iaby zao, anatini-zay ty vahindanitra, ty basia noho ty planety.—Genesisy 1:2.
2. Manino Ndranahary ro namoro ani-tany toy?
“Tsy hoe tsy misy dikany” ty namoronani-Jehovah ani-tany toy “fa nataony hipetraha.” (Isaia 45:18) Lafa namboatsy ani-tany toy ie, le nataony mahatamà noho hipetrahan’olo zisiky farany ty eto. (Vakio Isaia 40:28; 42:5.) Hitani-mpahay siansy reo hoe tena miavaky planety misy antsika toy. Ty tany raiky avao ro planety misy ty raha iaby ilàn’olombelo amy fiainany.
3. Ino ty tsy mampitovy ty olombelo amy ty biby?
Lafa baka namboatsy ani-tany toy Jehovah, le namoro raha miay koa. Nasiany raha mitiry noho biby tse tany toy. Bakeo, ‘namoro olo mitovy soraky aminy Ndranahary.’ (Vakio Genesisy 1:27.) Manino ro miavaky ty olombelo? Natao-Ndranahary mitovy soraky aminy tsika lafa niforoniny, le afaky manahaky ty toetsiny. Afaky ho tea olo noho ho tea raha mahity, ohatsy, tsika. Nataony afaky mianatsy mivola, tea raha soa noho mahazo tavy moziky koa tsika. Tsy mitovy amy biby tsika, fa afaky manompo ani-Mpamoro antsika iny.
DINIHO LALIKY
Diniho ty porofo ahità hoe nisy namoro raha iaby zao, le henteo vasa marina ty raha volanini-Baiboly mikasiky ty famorona. Diniho koa hoe ino ty haintsika mikasiky a-Ndranahary lafa hentea ty toetsin’olombelo.
4. Nisy namoro raha iaby zao
Mahazo voninahitsy ty olombelo, lafa mangala tahaky ty zavaboary mba hanaova raha. Ka manao akory azy namoro ty zavaboary iny? Alefaso VIDEO toy, le iaraho midiniky fanontanea toy:
-
Ino ty raha namboarin’olombelo fe nalà tahaky baka amy zavaboary?
Tsy maintsy nisy namboatsy azy ty trano iaby. Fe ia ty namboatsy ty zavaboary? Vakio Hebreo 3:4, le iaraho midiniky fanontanea retoa:
-
Ino amy zavaboary rey ro tena mahatseriky anao?
-
Marina va ty hoe nisy namoro raha iaby zao? Ino ty antony?
Fa nihainao va?
Afaky mahita lahatsoratsy noho video mikasiky famorona iha amy jw.org ao. Henteo ty hoe “Nisy Namorona Ve?” noho ty hoe “Hevitsin’Olo Mikasiky ty Nanombohani-Fiaina.”
“Mazava ho azy fa nisy namboatsy ty trano iaby, fa ty namboatsy ty raha iaby, le Ndranahary.”
5. Marina ty raha volanini-Baiboly mikasiky ty famorona
Resahini-Baiboly amy Genesisy toko 1 ao, ty namorona ty tany noho ty raha miay aminy eo. Tena marina va raha io sa tapasiry avao? Alefaso VIDEO toy, le iaraho midiniky fanontanea retoa:
-
Mivola va ty Baiboly hoe enin’andro misy 24 lera, ty andro kiraidraiky namorona ani-tany toy noho ty raha miay iaby?
-
Akory ty hevitsinao, marina noho azo inoa va ty raha volanini-Baiboly mikasiky ty famorona? Ino ty antony?
Vakio Genesisy 1:1, le iaraho midiniky fanontanea toy:
-
Mivola ty mpahay siansy hoe nisy fanombohany raha iaby zao. Manino raha zay ro mifanaraky amy andinin-teny io?
Mieritseritsy ty olo sisany hoe nampiasa evolision Ndranahary mba hamorona ty raha miay. Vakio Genesisy 1:21, 25, 27, le iaraho midiniky fanontanea retoa:
-
Mivola va ty Baiboly hoe namoro raha miay tsotsotra tse Ndranahary, le iny ro niova tsikelikely bakeo nanjary fia noho biby voho olombelo? Sa ie namoro raha miay sankarazany?
6. Zavaboary miavaky niforoni-Ndranahary ty olombelo
Tsy manahaky biby iaby niforonini-Jehovah rey tsika. Vakio Genesisy 1:26, le iaraho midiniky fanontanea toy:
-
Natao-Ndranahary mitovy soraky aminy tsika, le afaky mampiseho fitiava noho miferinay olo. Manao akory koa zany ty toetsi-Ndranahary?
MIERITSERITSY TY OLO SISANY HOE: “Tapasiry avao raha volanini-Baiboly mikasiky famorona zao.”
-
Akory ty hevitsinao? Ino ty antony?
FAMINTINA
Jehovah ro namoro ani-raha iaby zao.
Famerena
-
Ino ty raha volanini-Baiboly mikasiky ty fanombohani-raha iaby zao?
-
Natao-Ndranahary niova tsikelikely baka amy raha miay raiky va ty raha miay iaby iaby, sa namoro raha miay sankarazany ie?
-
Ino ty mampiavaky ty olombelo?
DINIHO KOA RETOA
Henteo ato hoe ino ty zavaboary manaporofo fa misy ty Mpamoro.
“Inona no Ianarantsika avy Amin’ny Zavaboary?” (Mifohaza! Septambra 2006)
Henteo ato ty raha ataoni-lahilahy raiky lafa manazava amy ty anakilahiny mikasiky famorona ie.
Diniho ato hoe mifanaraky amy Baiboly va ty evolision.
Nahita poti-kazo noho taolam-biby fa ela biby tany ty mpikaroky sady nanao fikaroha koa. Manaporofo va raha rey hoe nisy namoro tsika sa nisinisy amy zao avao?
Ahoana no Nampisy Antsika? Fanontaniana Dimy Mila Dinihina (bokikely)
a Hodinihy amy fianara 25 ao ty antony namorona-Ndranahary ty olombelo.
Mety ho Teanao Koa
FANONTANEA FAPETRAKIN’OLO
Ino ro Atao hoe Fianara Baiboly?
Anovo hay ty valy fanontanea mikasiky fandahara fampianara Baiboly tsy andoava drala ataonay.
