Laha fitiava vatany Ndranahary, manino ro manao raha raty maro ty fivavaha mivola fa manompo azy? Satria fivavaha diso fivavaha rey, ka mampianatsy raha vandy mikasiky a-Ndranahary. Manino tsika ro mivola ani-zay? Akory ty fahità-Ndranahary ty raha ataon-drozy? Le hataony akory fivavaha diso rey?

1. Manino ro manafa-baraka a-Ndranahary ty raha ampianarini-fivavaha diso?

“Nanakalo ty fahamarina-Ndranahary tamy vandy” ty fivavaha diso. (Romanina 1:25) Tsy mampianatsy mikasiky ty anara-Ndranahary, ohatsy, ty ankamaroani-fivavaha kanefa mivola ty Baiboly hoe tokony hampiasà ty anara-Ndranahary. (Romanina 10:13, 14) Lafa misy loza miseho koa, le mivola ty mpanday fivavaha sisany hoe zay ty sitrapo-Ndranahary. Fe vandy raha zay. Tsy manao raha raty mihintsy Ndranahary. (Vakio Jakoba 1:13.) Mampalahelo fa lasa malay a-Ndranahary ty olo sisany, vokatsini-fampianarani-fivavaha diso reo.

2. Manino ro manafa-baraka a-Ndranahary ty raha ataoni-fivavaha diso?

Tea olo Jehovah, fe tsy ho zay ty fivavaha diso. Ho zao ty volanini-Baiboly mikasiky ty fivavaha diso: “Miavotsy zisiky an-danitsy eny ty fahotàny.” (Apokalypsy 18:5) Nilitsy amy politiky noho nandramby anjara tamy aly ty fivavaha, tanatini-taonjato maro. Maro koa ty olo maty vokatsy ty raha nataon-drozy. Ty mpanday fivavaha sisany ta hanan-kanana, le ampandoaviny drala ty mpivavaky aminy ao. Hita baka amy raha ataon-drozy reo, fa tsy mahay a-Ndranahary ty fivavaha diso, ka tsy mana zo hisolo tena azy.​—Vakio 1 Jaona 4:8.

3. Akory ty fahità-Ndranahary ty fivavaha diso?

Laha iha aza meloky mahita ty raha ataoni-fivavaha diso, handraky Jehovah! Tea olo Jehovah, fe mampeloky azy mpanday fivavaha mivola vandy mikasiky azy sady mampijaly olo reo. Mampitamà Jehovah fa horavàny ty fivavaha diso, le “tsy ho hita sasy.” (Apokalypsy 18:21) Sisa kely, le haripaky ty fivavaha diso iaby.​—Apokalypsy 18:8.

 DINIHO LALIKY

4. Tsy ty fivavaha iaby ro ekè-Ndranahary

Maro ty mieritseritsy hoe ndre samby hafa ty fivavaha, le manompo a-Ndranahary raiky avao rozy iaby. Marina va zay? Vakio Matio 7:13, 14, bakeo iaraho midiniky fanontanea toy:

• Manao akory ty lala mana amy fiaina any, laha hentea ty Baiboly?

Alefaso VIDEO toy, bakeo iaraho midiniky fanontanea io:

• Mivola va ty Baiboly hoe maro ty fivavaha ekè-Ndranahary?

 6. Tea-Ndranahary hampea mba hiala amy fivavaha diso ty olo

Vakio Apokalypsy 18:4, a bakeo iaraho midiniky fanontanea toy:

• Ino ty tsapanao lafa hainao hoe tea-Ndranahary hampea ty olo voafitakini-fivavaha diso?

7. Tohizo avao ty fianaranao mikasiky ani-Ndranahary marina iny

Tokony hampiova ty fahitanao a-Ndranahary va ty raha raty ataoni-fivavaha diso? Eritsereto hoe misy ajà lahilahy raiky tsy manaraky ty anatsini-babany. Niala tan-tranon-drozy ao ie, le nanao raha raty sankarazany. Tsy teani-babany iny raha raty ataony reo. Fe rariny va laha babany iny koa ro amea tsiny amy ty raha raty ataoni-anakiny io?

• Rariny va laha manome tsiny ani-Jehovah noho tsy mianatsy mikasiky azy sasy tsika satria manao raha raty maro ty fivavaha diso?

 FAMINTINA

Manafa-baraka a-Ndranahary ty fivavaha diso, satria mampianatsy raha diso sady manao raha raty. Haripaki-Ndranahary ty fivavaha diso.

Famerena

• Ino ty tsapanao lafa hainao ty raha ampianarini-fivavaha diso noho ataony?

• Akory ty fahitani-Jehovah ty fivavaha diso?

• Hatao-Ndranahary akory ty fivavaha diso?