FIANARA 15
Ia Jesosy Zao?
Olo niavaky noho nalaza tan-tany etoy Jesosy. Fe ndre mahay ty anarany ty ankamaroan’olo, le tsy hain-drozy hoe ia marina ie. Tsy mitovy koa ty hevitsin’olo mikasiky azy. Ino ty raha volanini-Baiboly mikasiky ani-Jesosy?
1. Ia Jesosy zao?
Anjely mahery mipetraky an-danitsy any Jesosy. Niforonini-Jehovah talohani-raha iaby ie. Zay mahavy azy kaihy hoe “talanolo amy zavaboary iaby.” (Kolosianina 1:15) Volanini-Baiboly hoe ‘Anaky lahitoka-Ndranahary’ Jesosy, satria ie raiky avao ro niforonini-Jehovah mivanta. (Jaona 3:16) Niaraky niasa marìny amy Jehovah Babany Jesosy, le nanampy azy namoro ty raha hafa iaby. (Vakio Ohabolana 8:30.) Mbo mifandramby marìny avao Jehovah noho Jesosy henanizao. Kaihy hoe “ty Safà” koa ie, satria mpanday ty safà-Ndranahary, zany hoe mpivola ty hafatsy noho ty toromariky baka amy Ndranahary.—Jaona 1:14.
2. Manino Jesosy ro niavy tan-tany etoy?
Fa 2000 tao teo ho eo zay, nanao fahagagà Jehovah, ka nampiasa ty fanahy masy mba hamindrà ty aini-Jesosy baka an-danitsy any ho amy kiboni-ampela virjiny raiky kaihy hoe Maria. Zay nahavy ani-Jesosy nanjary olombelo io. (Vakio Lioka 1:34, 35.) Niavy an-tany etoy Jesosy mba ho Mesia, na Kristy, hanavotsy ty olombelo. a Nitanteraky taminy ty faminania iaby amy Baiboly ao mikasiky ty Mesia. Nanampy ty olo hahay raha zay hoe Jesosy vatany “Kristy, Anaki-Ndranahary velo iny.”—Matio 16:16.
3. Aia Jesosy henanizao?
Lafa nimaty Jesosy tamy ie tan-tany teto, le nivelomy ka nanjary anjely, le nimpoly an-danitsy any. Lafa niavy any ie, le ‘nasondrotsi-Ndranahary ho amy pilasy anabonabo.’ (Filipianina 2:9) Mana fahefà anabo Jesosy henanizao, ka Jehovah raiky avao ro amboniny.
DINIHO LALIKY
Anovo hay soa hoe ia marina Jesosy zao, le manino ro tena ilà ty mianatsy mikasiky azy.
4. Tsy Jesosy ro Ndranahary Farani-Ze Mahery iny
Ampianarini-Baiboly hoe ndre anjely mahery an-danitsy any Jesosy, le mbo maneky ani-Jehovah Babany avao. Manino tsika ro mivola ani-zay? Alefaso VIDEO toy mba hahità hoe manino ro tsy mitovy amy Ndranahary Farani-Ze Mahery iny Jesosy.
Manampy antsika hahay ty fifandrambesa misy amy Jehovah noho Jesosy andinin-teny manaraky retoa. Vakio kiraidraiky andinin-teny reo, bakeo iaraho midiniky fanontanea reo:
Vakio Lioka 1:30-32.
-
Ino ty nivolanini-anjely iny mikasiky ty fifandrambesani-Jesosy noho Jehovah Ndranahary, azy “Farany Anabo” iny?
Vakio Matio 3:16, 17.
-
Tamy batisani-Jesosy iny, ino ty raha nivolanini-feo baka an-danitsy any iny?
-
Feon’ia io araky ty hevitsinao?
Vakio Jaona 14:28.
-
Ia ty bevata noho mana fahefà marè, ty Baba sa ty anaky?
-
Nikaihini-Jesosy hoe Babany Jehovah. Midika ino raha zay?
Vakio Jaona 12:49.
-
Nieritseritsy va Jesosy hoe olo raiky avao ie noho Babany? Akory ty hevitsinao?
5. Voaporofo hoe Jesosy ro Mesia
Hita amy Baiboly ao ty faminania maro mikasiky Mesia, zany hoe azy nifilì-Ndranahary hanavotsy ty olombelo iny. Nanampy olo hahay raha rey hoe ia ty voafily ho Mesia. Alefaso VIDEO toy fa resahy ao ty sisany amy faminania tanteraky tamy Jesosy tamin’ie tan-tany etoy.
Vakio faminania amy Baiboly ao retoa, bakeo iaraho midiniky fanontanea reo:
Vakio Mika 5:2 mba hahaiza hoe tokony hateraky aia ty Mesia. b
-
Tanteraky tamy Jesosy va faminania io?—Matio 2:1.
Vakio Salamo 34:20 noho Zakaria 12:10 mba hahità hoe ino ty hiseho lafa vonoa ty Mesia.
-
Tanteraky va faminania reo?—Jaona 19:33-37.
-
Akory ty hevitsinao, nataoni-Jesosy va ze hahatanteraky ani-faminania reo taminy?
-
Ia Jesosy laha hentea porofo reo?
6. Mandramby soa tsika lafa mahay soa ani-Jesosy
Resahini-Baiboly hoe tena ilà ty mianatsy mikasiky ani-Jesosy noho ty raha ampanaovi-Ndranahary azy. Vakio Jaona 14:6 noho 17:3, bakeo iaraho midiniky fanontanea toy:
-
Manino ro tena ilà ty mianatsy mikasiky ani-Jesosy?
Jesosy ro lala satria nanampy antsika hanjary nama-Ndranahary ie. Nampianatsy ty marina mikasiky ani-Jehovah ie, le kaihy hoe fahamarina. Kaihy koa hoe fiaina ie satria tamy alalany ro ahafahantsika mahazo fiaina zisiky farany
MIERITSERITSY TY OLO SISANY HOE: “Tsy mino ani-Jesosy ty Vavolombeloni-Jehovah.”
-
Akory ty hamaleanao ani-zay?
FAMINTINA
Anjely mahery Jesosy. Anaki-Ndranahary ie. Mesia koa ie.
Famerena
-
Manino ro kaihy hoe “talanolo amy zavaboary iaby” Jesosy?
-
Ino ty nataoni-Jesosy talohani-niaviany tan-tany etoy?
-
Ino ty ahaizantsika fa Jesosy ro Mesia?
DINIHO KOA RETOA
Ianaro marerè ty porofo ahaiza hoe Jesosy vatany ro Mesia.
Anaki-Ndranahary Jesosy. Midika va raha zay hoe nanambaly manahaky olombelo io Ndranahary amy zay hiteraky?
“Nahoana i Jesosy no Antsoina hoe Zanak’Andriamanitra?” (Lahatsoratsy amy jw.org ao)
Henteo ty porofo ahità hoe tsy ampianarini-Baiboly ty mikasiky Trinitè na Ndranahary telo fe raiky.
“Andriamanitra ve i Jesosy?” (Ny Tilikambo Fiambenana 1 Aprily 2009)
Manino ro niova ty fiainan’ampela raiky lafa nahay soa ty raha volanini-Baiboly mikasiky ani-Jesosy ie?
“Namerina Nandinika ny Zavatra Ninoany Ilay Vehivavy Jiosy” (Mifohaza! Mey 2013)
a Hodinihy amy fianara 26 noho 27 hoe manino ty olombelo ro mila fanavota, le akory ty nanavotani-Jesosy antsika.
b Misy faminania raiky miresaky ty fotoa niaviani-Jesosy tan-tany etoy. Henteo Fanazavà Hevitsy 2.
Mety ho Teanao Koa
FANONTANEA FAPETRAKIN’OLO
Ino ro Atao hoe Fianara Baiboly?
Anovo hay ty valy fanontanea mikasiky fandahara fampianara Baiboly tsy andoava drala ataonay.
