FIANARA 17

Olo Nanao Akory Jesosy?

HANENTY

Lafa mandiniky ty raha nivolanini-Jesosy noho ty raha nataony tan-tany etoy tsika, le mahita hoe mana toetsy soa maro ie noho Jehovah Babany. Mahavy antsika ho voatosiky hinama marè amin-drozy toetsy rezay. Ino ty sisany amy toetsini-Jesosy reo? Le akory ty hanahafantsika azy?

1. Ino ty anahafani-Jesosy ani-Babany?

Fa an’arivony tapitrisa tao ty niarahani-Jesosy niay tamy Babany tan-danitsy any, ka afaky nandiniky ty toetsiny noho nianatsy raha maro taminy ie tanatini-fotoa reo. Vokany, lasa mitovy amy Jehovah ty fomba fieritseretany, ty fihetseham-pony, noho ty fanaovany raha. (Vakio Jaona 5:19.) Mitovy tanteraky amy toetsini-Jehovah ty toetsini-Jesosy, ka hoy ty asany: “Ze nahita ahy, le nahita ani-Baba koa.” (Jaona 14:9) Laha iha zany mianatsy mikasiky ty toetsini-Jesosy, le ho hainao soa koa ty toetsini-Jehovah. Hita baka amy fikarakarà noho fanampea olo nataoni-Jesosy rey, ohatsy, fa tea anao Jehovah.

2. Akory ty nampisehoani-Jesosy hoe tea ani-Jehovah ie?

Nivola Jesosy hoe: “Mba hahaizani-zao tontolo zao fa teako Baba, le araky ty nandidiani-Baba ahy ro ataoko.” (Jaona 14:31) Tamy Jesosy tan-tany etoy, le nasehony hoe tena tea ani-Babany ie, ka ndre nisarotsy ty raha natrehiny, le naneky ani-Jehovah avao ie. Niresaky mikasiky ani-Babany koa ie, sady nanampy olo mba hinama aminy.—Jaona 14:23.

3. Akory ty nampisehoani-Jesosy hoe tea olo ie?

Mivola ty Baiboly hoe tena teani-Jesosy ty olombelo. (Ohabolana 8:31) Akory ty nampisehoany ani-zay? Nampahery noho nanampy olo ie. Tsy hoe mba hampisehoany ty heriny avao ty antony nanaovany fahagagà, fa fiferinesany ani-olo rey koa. (Marka 1:40-42) Soa fanahy noho tsy nanavakavaky ie. Nampionona ani-ze nijanjy azy noho nahavy an-drozy hana raha tamany ty raha nivolaniny. Parè hijaly noho ho maty Jesosy satria teany ty olo iaby. Fe ze olo tea noho manoriky ty raha nampianariny ro teany marè.—Vakio Jaona 15:13, 14.

DINIHO LALIKY

Ianaro marerè ty toetsini-Jesosy. Diniho koa hoe akory ty hampisehoantsika fa tea olo noho matariky na tea manome manahaky ani-Jesosy tsika.

4. Tea ani-Babany Jesosy

Lafa mandiniky ty modelini-Jesosy tsika, le ho haintsika ty raha azo atao mba hampisehoantsika ty fitiavantsika a-Ndranahary. Vakio Lioka 6:12 noho Jaona 15:10; 17:26. Lafa voavaky ty andinin-teny kiraidraiky, le iaraho midiniky fanontanea toy:

Laha hentea ty modelini-Jesosy, akory ty ampisehoantsika hoe tea ani-Jehovah tsika?

Tea ani-Babany an-danitsy any iny Jesosy ka nivavaky mba hiresaha aminy matetiky

5. Mikarakara ani-ze mijaly Jesosy

Ze hahasoa olo tse ro nilani-Jesosy zay vo ze hahasoa ty vatany. Ndre nivozaky ie, le mbo nampiasa ty heriny noho ty fotoany mba hanampea olo avao. Vakio Marka 6:30-44, bakeo iaraho midiniky fanontanea retoa:

Ino ty raha sisany nataoni-Jesosy ka mampiseho hoe nieritseritsy ze hahasoa ty hafa ie? (Henteo ty andininy 31, 34, 41, noho 42.)
Ino ty nanosiky ani-Jesosy hanampy olo? (Henteo ty andininy 34.)
Mitovy amy toetsini-Jehovah ty toetsini-Jesosy. Ka ino zany ty toetsini-Jehovah hitantsika baka amy tantara io?
Nieritseritsy ze hahasoa ty hafa Jesosy. Ino ty azontsika atao mba hanahafa azy?

6. Matariky Jesosy

Natariky Jesosy ndre tsy nanan-kanana aza. Mampirisiky antsika mba ho tea manome koa ie. Vakio Asan’ny Apostoly 20:35, bakeo iaraho midiniky fanontanea toy:

Ino ty mahasambatsy araky ty nivolanini-Jesosy?

Alefaso VIDEO toy, bakeo iaraho midiniky fanontanea io:

VIDEO: “Mahasambatsy Marè ty Manome”—Tampatampany (4:00)

Akory ty azontsika ampisehoa hoe tea manome tsika ndre tsy manan-kanana aza?

Fa nihainao va?

Ampianarini-Baiboly hoe lafa mivavaky amy Jehovah tsika, le tokony hatao amy anarani-Jesosy. (Vakio Jaona 16:23, 24.) Lafa manao ani-zay tsika, le asehontsika hoe ankasitrahantsika ty raha nataoni-Jesosy mba hanampea antsika hinama amy Jehovah.

MIERITSERITSY TY OLO SISANY HOE: “Tsy midary ty fijaleantsika Ndranahary zao.”

Manino ty raha nataoni-Jesosy ro mampiseho hoe tea noho midary antsika Jehovah?

FAMINTINA

Tea ani-Jehovah Jesosy sady tea olo. Manahaky ty toetsini-Babany ty toetsini-Jesosy, ka hahay soa ani-Jehovah tsika lafa mianatsy mikasiky ani-Jesosy.