FIANARA 19

Ty Vavolombeloni-Jehovah va ro Tena Kristiana?

HANENTY

Mino zahay Vavolombeloni-Jehovah fa zahay ro tena Kristiana. Ino ty antony? Diniho hoe miory amin’ino ty raha inoanay, manino ro miavaky ty anaranay, le ino ty mampiseho hoe mifankatea zahay.

1. Miory amin’ino ty raha inoani-Vavolombeloni-Jehovah?

Nivola Jesosy hoe: “Ty [safà-Ndranahary] ro fahamarina.” (Jaona 17:17) Manahaky ani-Jesosy ty Vavolombeloni-Jehovah, ka ze raha amy Safà-Ndranahary ao avao ro ninoan-drozy liany bakany zay. Mba diniho moa ty tantaranay tamy tao 1870 tany ho any. Nisy mpianatsy Baiboly vitsivitsy tamy zay, nanomboky nandiniky soa ty raha amy Baiboly ao. Ze nianaran-drozy baka ao ro ninoan-drozy, ndre tsy mitovy amy fampianarani-fivavaha hafa aza raha zay. Bakeo niresahin-drozy amin’olo fahamarina amy Baiboly ao rey. a

2. Manino zahay ro nifily ty anara hoe Vavolombeloni-Jehovah?

Kaihini-Jehovah hoe vavolombelony ty mpanompony satria mivola ty marina mikasiky azy. (Hebreo 11:4–12:1) Niresaky tamy vahoakiny taloha, ohatsy, Ndranahary hoe: “Nareo ro vavolombeloko.” (Vakio Isaia 43:10.) Kaihy hoe “Vavolombelo Tsy Mivaliky” koa Jesosy. (Apokalypsy 1:5) Tamy 1931 amy zay zahay nifily ty anara hoe Vavolombeloni-Jehovah. Falifaly zahay manday ani-anara zay.

3. Akory ty ampisehoani-Vavolombeloni-Jehovah hoe be fitiava manahaky ani-Jesosy rozy?

Teani-Jesosy marè mpianatsiny rey, le nirambesiny sahala fianakaviany mihintsy. (Vakio Marka 3:35.) Sahala fianakavia raiky koa ty Vavolombeloni-Jehovah amy tany toy iaby. Zay mahavy anay mifampikaiky hoe rahalahy noho anabavy io. (Filemona 1, 2) Manoriky ani-didy toy koa zahay: “Tiavo ty rahalahy iaby amy finoa ao.” (1 Petera 2:17) Sankarazany ty fomba ampisehoanay hoe teanay ty finoa raiky aminay amy tany toy iaby. Mifanampy, ohatsy, zahay lafa misy loza miseho.

DINIHO LALIKY

Ianaro marerè ty tantarani-Vavolombeloni-Jehovah. Henteo koa ty porofo ahità hoe tena Kristiana zahay.

Miory amy Baiboly ty raha inoani-tena Kristiana sady resahin-drozy amin’olo ty raha nianaran-drozy

4. Baka amy Baiboly ao ty raha inoanay

Nivola Jehovah hoe hihamazava tsikelikely amy mpanompony ty fahamarina amy Baiboly ao. Vakio Daniela 12:4, bakeo iaraho midiniky fanontanea toy:

Ino ty raha “hitombo marè” lafa manohy mandiniky soa ty raha amy Baiboly ao ty vahoaki-Ndranahary?

Nisy olo vitsivitsy mpianatsy Baiboly nandiniky ty Safà-Ndranahary. Raiky amin-drozy Charles Russell. Ino ty nataon-drozy? Alefaso VIDEO toy, le iaraho midiniky fanontanea io:

VIDEO: Nihita Ndraiky ty Marina (7:45)

Ino ty nataoni-Charles Russell noho namany rey lafa nianatsy Baiboly?

Fa nihainao va?

Areninay kindraiky ty raha inoanay. Ino ty antony? Lafa mazava ty andro, le hita mazava soa ty raha iaby manodidy an-tena. Atao-Ndranahary mazava tsikelikely ho zay koa ty Safàny. (Vakio Ohabolana 4:18.) Tsy miovaova mihintsy ty Baiboly, fe lafa misy hevitsy lasa mazava soa aminay ty ao, le areninay ty raha inoanay mba hifanaraky amy ty raha volany ao.

5. Mifanaraky amy ty anaranay hoe Vavolombeloni-Jehovah ty raha ataonay

Manino zahay ro nifily ty anara hoe Vavolombeloni-Jehovah? Alefaso VIDEO toy, bakeo iaraho midiniky fanontanea io.

VIDEO: Anara Raiky Mampiavaky Antsika (2:40)

Manino ro mety soa ty anara hoe Vavolombeloni-Jehovah?

Nanino Jehovah ro nifily olombelo mba ho vavolombelony? Satria maro marè ty vandy volanin’olo mikasiky azy, le mila vavolombelo ie mba hanambara ty marina. Handiniky ty roe amy vandy rezay tsika.

Mampianatsy ty mpivavaky aminy ao ty fivavaha sisany hoe tea-Ndranahary hampiasa sarivongana rozy lafa mivavaky aminy. Fe, vakio Levitikosy 26:1, bakeo iaraho midiniky fanontanea retoa:

Ino ty marina? Teani-Jehovah hivavaky amy sarivongana va tsika?

Mampianatsy ty mpanday fivavaha sisany hoe mbo Jesosy avao Ndranahary zao. Fe, vakio Jaona 20:17, bakeo iaraho midiniky fanontanea retoa:

Ino ty marina? Mbo Jesosy avao va Ndranahary io?
Ino ty tsapanao lafa mahay iha hoe nirahini-Jehovah ty Vavolombelony mba hivola ty marina mikasiky azy noho Anakilahiny iny?

6. Mifankatea zahay

Ampitovizini-Baiboly amy rantsambata ty Kristiana. Vakio 1 Korintianina 12:25, 26, bakeo iaraho midiniky fanontanea retoa:

Ino ty ataoni-tena Kristiana laha misy namany mijaly?
Akory ty fahitanao ty fifankatiavani-Vavolombeloni-Jehovah?

Lafa mijaly ty Vavolombeloni-Jehovah amy tany raiky, le manao raha malaky ty Vavolombeloni-Jehovah amy tany toy iaby mba hanampea an-drozy. Mba hahità ohatsy amy zay, le alefaso VIDEO toy. Bakeo iaraho midiniky fanontanea reo.

VIDEO: Nandalo ta Haiti any ty Siklony Matthew (5:29)

Manino ro hita fa mifankatea ty Vavolombeloni-Jehovah laha hentea ty fanampean-drozy ty olo tra-doza?

Be fitiava ty tena Kristiana, le manampy ani-ze mila fanampea

MIERITSERITSY TY OLO SISANY HOE: “Fivavaha vo betibety Vavolombeloni-Jehovah zao.”

Nanomboky nombia Jehovah ro nikaiky ty mpanompony hoe vavolombelony?

FAMINTINA

Ty Vavolombeloni-Jehovah ro tena Kristiana. Fianakavia raiky miparitaky amy tany toy iaby zahay. Miory amy Baiboly ty raha inoanay sady ambaranay amin’olo ty marina mikasiky ani-Jehovah.